ខេត្តរតនគិរី ៖ សេចក្តីរាយការណ៍បានដឹងថា សកម្មភាពចរាចរណ៍ឈើប្រណិតបានកក្រើកឡើងវិញបន្ទាប់បានបិទអស់មួយរយៈ ដោយសារកម្លាំងអាវុធហត្ថលើផ្ទៃប្រទេសចុះបង្ក្រាបទាំងយប់ទាំងថ្ងៃដូចភ្លៀងរលឹម មើលទៅសភាពការណ៍ទាំងនោះហាក់បីដូចជាស្ងប់ស្ងាត់មួយរយៈកន្លងមកហើយ ។ ប៉ុន្តែនៅពេលថ្មីៗនេះ គេសង្កេតឃើញមានរថយន្តដឹកឈើទាំងតូចទាំងធំ ដឹកជញ្ជូនឈើទាំងយប់ទាំងថ្ងៃ យកទៅលក់នៅប្រទេសវៀតណាមតាមច្រករបៀងភូមិភិៈ ច្រកភ្នំក្រហម ច្រកភូមិឡុំនិងច្រក១៩ហៅច្រកបារី ។
ចំណែកសមត្ថកិច្ចគ្រប់ស្ថាប័នទាំងអស់ចាប់ថ្នាក់ខេត្តដល់ព្រំដែនអូរយ៉ាដាវគ្មានការទប់ស្កាត់ និងបង្ក្រាបរថយន្តដឹកឈើនេះទេ ។
តាមប្រភពប្រជាពលរដ្ឋដែលរស់នៅតាមផ្លូវជាតិលេខ៧៨A ប្រជាពលរដ្ឋទាំងនោះសង្កេតឃើញមន្ត្រីជំនាញទាំងនោះអង្គុយរាប់ក្បាលឡានយកលុយ ឫមួយក៏តេទូរស័ព្ទយកលុយពីថៅកែឈើទាំងនោះដោយដាក់ខែ ដាក់ថ្ងៃ ធ្វើមានធ្វើបានមិនគិតពីការហិនហោចព្រៃឈើ ឬសម្បិត្តជាតិនោះទេ។
ជាក់ស្តែងមានឈ្មួញឈ្មោះណូ និងប្រពន្ធដែលជាមេឈ្មួញដុះស្លែម្នាក់នៅក្នុងខេត្តរតនគិរីដែលមានរថយន្តជាច្រើនគ្រឿងដូចជាម៉ាកបាឡែន និងសាំយ៉ុង ពណ៌ស ស្លាកលេខព្រះសីហនុ2A-2610 ដែលសម្រុកដឹកឈើទាំងយប់ទាំងថ្ងៃពុំមានមន្ត្រីមេព្រៃចាប់ថ្នាក់សង្កាត់រដ្ឋបាលព្រៃឈើ រហូតដល់លោកកែបកត់នាយខណ្ឌរដ្ឋបាលព្រៃឈើមិនហ៊ានចាប់រថយន្តដឹកឈើឈ្មោះណូនោះទេ ព្រោះបានទទួលលុយជារៀងរាល់ខែ ពីថៅកែឈើឈ្មោះណូនេះ។
ប្រភពប្រជាពលរដ្ឋក្នុងក្រុងបាលុងគេសង្កេតឃើញឈ្មោះណូនេះពេលដាច់ខែម្តងៗ បានស្ពាយកាបូបលុយជិះឡានអោយលុយគ្រប់ស្ថាប័នមានដូចជាប៉ូលិសសេដ្ឋកិច្ចខេត្តនិងក្រសួង ឌឺបេ ។ល។ នេះជាសារមួយដល់កម្លាំងអាវុធហត្ថលើផ្ទៃប្រទេស ជ្រាបជាពត៌មានដល់មន្ត្រីនៅខេត្តរតនគិរីព្រោះនៅពេលកន្លងមកបង្ក្រាបតែរថយន្តដឹកឈើណាដែលមិនបង់លុយអោយតែប៉ុណ្ណោះ ។
ពាក់ពន្ធ័ព័ត៌មានចោទប្រកាន់ខាងលើសារព័ត៌មានយើងរង់ចាំបកស្រាយរាល់ម៉ោងធើ្វការ៕
