ភ្នំពេញ៖ ព្រះរាជពិធីបុណ្យអុំទុក បណ្តែតប្រទីប អកអុំបុកនិងសំពះព្រះខែឆ្នាំ២០១៦នេះបានបញ្ចប់ទៅដោយភាពជោគជ័យ និងសប្បាយរីករាយ ក្រោមព្រះរាជធីបតីភាពដ៏ខ្ពង់ខ្ពស់របស់ព្រះករុណាជាអម្ចាស់ ជីវិតលើត្បូង។
នៅថ្ងៃទី១៥ខែវិច្ឆិកាឆ្នាំ ២០១៦នេះ ដែលជាថ្ងៃទីបី បិទបញ្ចប់នៃព្រះរាជពិធីបុណ្យអុំទូក ព្រះករុណាព្រះបាទសម្តេចព្រះបរមនាថនរោត្តមសីហមុនី ព្រះមហាក្សត្រនៃព្រះរាជាណាចក្រ កម្ពុជា បានសព្វព្រះរាជហឬទ័យស្តេចយាងទតដោយផ្ទាល់ពីសកម្មភាពការប្រណាំងទូកង ទូក មួងរបស់ក្រុមកីឡាករ កីឡាការិនីមកពីតាមបណ្តាខេត្ត។
បន្ថែមពីនេះទៀតព្រះករុណាជាអម្ចាស់ជីវិតលើត្បូងបានសព្វព្រះរាជហឬទ័យប្រទានពាន រង្វាន់ដល់ក្រុមកីឡាករ កីឡាការិនីទូកង ទូកចែវ ដែលទទួលបានជ័យលាភីទូកឆ្នើមលេខ១ ដែលមានល្បឿនលឿនជាងគេ រួមទាំងទូកដែលមានសោភ័ណភាពស្អាតជាងគេផងដែរ។
សូមបញ្ជាក់ថា បើទោះបីជាព្រះរាជពិធីបុណ្យអុំទូកឆ្នាំ២០១៦បានបញ្ចប់ជាផ្លូវការហើយក្តីប៉ុន្តែ ការបើកឲ្យប្រជាពលរដ្ឋដើរកំសាន្តនៅតែបន្តមានពេញមួយរាត្រីទៀត ជាមួយនឹងវិធានការការពារសន្តិសុខជូនប្រជាពលរដ្ឋដដែល ៕
ដោយ ហុក វិបុល
