ខេត្តរតនគិរី ៖ សមត្ថកិច្ចពីរប្រភេទ របស់ខេត្តរតនគិរី នៅថ្ងៃ៩វិច្ឆិកាម្សិលមិញ បានសហការគ្នាចុះបង្ក្រាបទីតាំងស្តុកឈើមួយកន្លែង រឹបអូសបានជិត៣០០កំណាត់ ព្រមទាំងបានដកហូតរថយន្តកាមរី១គ្រឿង ផ្ទុកឈើឈើប្រណិតពេញប្រៀប ដែលគេសង្ស័យថា ឈ្មួញបានត្រៀមដឹកយកទៅធ្វើជំនួញឆ្លងប្រទេស ប៉ុន្តែ សមត្ថកិច្ចមិនបានធ្វើការឃាត់ខ្លួនជនសង្ស័យ ជាម្ចាស់ឈើ និងតៃកុងរថយន្តដឹកឈើនោះទេ។
ប្រតិបត្តិការចុះបង្ក្រាបនេះ បានធ្វើឡើងដោយកម្លាំងខណ្ឌរដ្ឋបាលព្រៃឈើខេត្ត សហការណ៍ជាមួយ កម្លាំងនគរបាលប្រឆាំងបទល្មើសសេដ្ឋកិច្ចខេត្ត បង្ក្រាបបាននៅភូមិសោមគល់ ឃុំសោមធំ ស្រុកអូយ៉ាដាវ ខេត្តរតនគិរី។
សមត្ថកិច្ចនៅក្នុងការបង្ក្រាបបានប្រាប់ឲ្យដឹងថា ការចុះបង្ក្រាបទីតាំងស្តុកឈើ និងរថយន្តដឹកឈើខាងលើនោះ បានធ្វើឡើងក្រោមការដឹកនាំបញ្ជាពី លោកជា សុភ័ក្រ ព្រះរាជអាជ្ញារង អមសាលាដំបូងខេត្ត បានចាប់ឃាត់ការធ្វើសន្និធិឈើជ្រុង ប្រភេទប្រណិតធ្នង់បានចំនួន១៩៥ដុំ ស្មើនឹង២ម៉ែត្រគូប ២១២ផ្លាន ព្រមទាំងបានធ្វើការរឹបអូសរថយន្ត១គ្រឿង ប្រភេទកាមរីបាឡែន ពណ៌ទឹកប្រាក់ គ្មានស្លាកលេខ ដែលបានធ្វើការដឹកញ្ជូនឈើធ្នង់ ចំនួន៦២ដុំ ស្មើនឹង០ម៉ែត្រគូប ៣៥៨ផ្លាននោះថែមទៀត។
លោកថា ក្រោយការបង្ក្រាប និងរឹបអូសយកវត្ថុតាងនោះរួចមក កម្លាំងសមត្ថកិច្ចជំនាញបានធ្វើការរាប់ចំនួនឈើ ដែលបង្ក្រាបបានទាំងពីរករណីនេះ មានចំនួន២៧៥កំណាត់ ស្មើនឹង២ម៉ែត្រគូប ៥៧០ផ្លាន ឈើទាំងនេះ ត្រូវគេរាការណ៍ឲ្យដឹងថា ឈ្មួញបានស្តុកទុកត្រៀមដឹកជញ្ជូនយកទៅលក់ នៅប្រទេសវៀតណាម ក្រោយទទួលដំណឹងនេះ សមត្ថកិច្ចបានចុះបង្ក្រាប និងរឹបអូសបានតែម្តង។ ហើយនៅព្រឹកថ្ងៃ១០វិច្ឆិកានេះ ឈើទាំងជិត៣០០កំណាត់ព្រមទាំងរថយន្ត១គ្រឿង ត្រូវបានបញ្ជូនមករក្សាទុក នៅស្នាក់ការផ្នែករដ្ឋបាលព្រៃឈើបរកែវ ដើម្បីចងក្រងសំណុំរឿង ចាត់ការតាមនីតិវិធី៕
