ខេត្តបន្ទាយមានជ័យ ៖ ប្រភពពីមន្ត្រីអាជ្ញាធរមូលដ្ឋាន ក្នុងសង្កាត់ផ្សារកណ្ដាល ក្រុងប៉ោយប៉ែត បានឲ្យដឹងថា
លោកអនុសេនីយ៍ឯក ភឹម សំណាង ដែលជានាយប៉ុស្ដិ៍ ច្រករបៀងលេខ១០ ស្ទឹងបត់ ភូមិស្ទឹងបត់ មានប្រពន្ធជាអ្នកនាំទំនិញខុសច្បាប់ ចូលទៅលក់ នៅលើទឹកដីសៀមផង និងនាំចូល ទំនិញខុសច្បាប់ ពីប្រទេសសៀម ចូលទឹកដីខ្មែរផង។ ក្នុងមួយថ្ងៃៗ ប្រពន្ធលោក ភឹម សំណាង នាំចេញនាំចូលទំនិញគេចពន្ធ និងទំនិញខុសច្បាប់ តាមអំពើចិត្ត ដែលជាហេតុធ្វើឲ្យ រដ្ឋត្រូវខាតបង់ចំណូលពន្ធ យ៉ាងច្រើនសន្ធឹកសន្ធាប់។
ចំណែកលោក ហាំ វណ្ណៈ មេបញ្ជាការនគរបាល វរការពារព្រំដែនគោកលេខ៨៩១ បានរក្សា ភាពស្ងៀមស្ងាត់ បណ្ដោយឲ្យបទល្មើស កើតឡើងយ៉ាងរាលដាល ហើយរង់ចាំទទួល ផលប្រយោជន៍យ៉ាងសុខស្រួល។ គួររំលឹកដែរថា កន្លងមកលោក អាត់ ខែម ស្នងការនគរបាល ខេត្តបន្ទាយមានជ័យ ធ្លាប់ដាក់បទបញ្ជា ឲ្យមន្ត្រីនគរបាលការពារព្រំដែន ចាត់វិធានការទប់ស្កាត់ បទល្មើសឆ្លងដែន ដូចជា ការហូរចូល ទំនិញគេចពន្ធ ទំនិញខុសច្បាប់ ក៏ដូចជាទប់ស្កាត់ ករណីពលករ ចំណាកស្រុក ខុសច្បាប់ជាដើម។
ប្រភពពីប្រជាពលរដ្ឋ រស់នៅក្នុងភូមិស្ទឹងបត់ សង្កាត់ផ្សារកណ្ដាល ក្រុងប៉ោយប៉ែត បានឲ្យដឹងថា ច្រករបៀង ក្នុងមូលដ្ឋានរបស់ពួកគាត់ មានការ នាំចូល ទំនិញគេចពន្ធ និងទំនិញខុសច្បាប់ យ៉ាងពេញបន្ទុក ដោយសារឈ្មួញ មានការឃុបឃិត ជាមួយ មន្ត្រីនគរបាល វរការពារព្រំដែនគោក លេខ៨៩១ ហើយគេដឹងថា លោក ហាំ វណ្ណៈ ជា មេបញ្ជាការ វរសេនាតូចលេខ៨៩១ ត្រូវបានគេដឹងថា ជាអ្នកបើកដៃឲ្យឈ្មួញនិងបក្ខពួក របស់ខ្លួន នាំចូលទំនិញគេចពន្ធ និងទំនិញខុសច្បាប់ តាមអំពើចិត្ត។
ជាក់ស្ដែង មន្ត្រីនគរបាល វរការពារព្រំដែនគោកលេខ៨៩១ ប្រចាំប៉ុស្ដិ៍លេខ១០ ស្ទឹងបត់ ភូមិស្ទឹងបត់ សង្កាត់ផ្សារកណ្ដាល ក្រុងប៉ោយប៉ែត មិនអនុវត្តន៍តាម បទបញ្ជារបស់លោក អាត់ខែម នោះទេ ហើយបទល្មើសឆ្លងដែន នៅតែកើតឡើង យ៉ាងអនាធិបតេយ្យ។ បទល្មើស មិនត្រូវតែកើតឡើង តាមតំបន់ព្រំដែន ក្នុងក្រុងប៉ោយប៉ែត ប៉ុណ្ណោះទេ គឺនៅក្នុងស្រុកថ្មពួក ស្រុក ស្វាយចេក ស្រុកអូរជ្រៅ និងស្រុកម៉ាឡៃ ក៏កើតមាន យ៉ាងរាលដាលដែរ ហើយថែមទាំង មានករណីឈ្មួញ នាំចូលរថយន្តអត់ពន្ធ ម៉ូតូគេចពន្ធ និងឈើគ្រញូង ពីទឹកដីសៀម ចូលទឹកដីខ្មែរទៀតផង។
ពាក់ព័ន្ធនឹងព័តមានខាងលើសារព័តមានយើងពុំអាចសុំបំភ្លឺពីមេបញ្ជាការ វរសេនាតូចលេខ៨៩១លោក ហាំ វណ្ណៈបានទេនៅកាលពីម្សិលមិញនេះ?៕
hem
