អំណោយជាគ្រឿងឧបភោគបរិភោគ ព្រមទាំងថវិកាមួយចំនួន ត្រូវបានលោក ហ៊ួត រឹទ្ឋ តំណាងឲ្យលោកឧត្តមសេនីយ៏ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរី យកទៅចែកជូនស្រី្តពិការ តាមការអំពាវនាវរបស់អ្នកសារព័ត៌មានក្នុងខេត្ត កាលពីព្រឹកថ្ងៃទី២ វិច្ឆិកា ២០១៦ នៅភូមិឡាប៉ាខេ ឃុំស្រែខ្ទុម ស្រុកកែវសីមា។
លោកហ៊ួត រឹទ្ធ មេបញ្ជាការរងតំបន់ប្រតិបត្តការសឹករងមណ្ឌលគិរី និងជាតំណាងរបស់លោកឃិន ម៉េងស្រេង មេបញ្ជាការតំបន់សឹក បានឲ្យដឹងថា ក្រោមការផ្តួចផ្តើមរបស់លោកមេបញ្ជាការយោធាខេត្ត លោកបានដឹកនាំ មន្ត្រីយោធានាំយកស្បៀងអាហារ និងថវិកាមួយចំនួនប្រគល់ឲ្យស្ត្រីមេម៉ាយ ព្រមទាំងកូនៗដែលមានឈ្មោះ ពួន ណេង អាយុ៥០ឆ្នាំ មានកូនប្រុសស្រីពីរនាក់ រស់នៅភូមិឃុំខាងលើ។
លោកថា ទោះបីជាអំណោយដែលនាំយកនៅថ្ងៃនេះមានចំនួនតិចតួចយ៉ាងណា ប៉ុន្តែនេះជាជំហ៊ានទី១ដែលលោកមេបញ្ជារការឲ្យចុះមកពិនិត្យភាពជាក់ស្តែង។នៅពេលខាងមុខដ៏ខ្លីលោកមេបញ្ជាការយោធាខេត្តសន្យាថានិងសង់ផ្ទះតូចមួយខ្នងជូន ដែលមានទីតាំងនៅក្បែរទីប្រជុំជន។
លោក ប៊ន វិមាន មេភូមិឡាប៉ាខេ បានឲ្យដឹងថា កន្លងមកស្ត្រីមេម៉ាយឈ្មោះពួន ណេង ធ្លាប់មានក្រុមមនុស្សធម៍ឈ្មោះ(ខ្លីខ្លឹម) ជួយឧបត្ថមម្តងរួចមកហើយ ។ ហើយព័ត៌មានដែលទទួលបាននេះគឺដោយសារតែក្រុមខ្លីខ្លឹម ក្នុងនាមជាអ្នកសារព័ត៌មាន បានជួយផ្សព្វផ្សាយរហូតស្ត្រីខាងលើទទួលបានការជួយឧបត្ថមជាបន្តបន្ទាប់ ។
លោកមេភូមិបញ្ជាក់ថា ស្ត្រី ឈ្មោះពួន ណេងនេះ ជាស្ត្រីពិការជើងទាំងពីរ រស់នៅសព្វថ្ងៃ ពឹងផ្អែកទាំងស្រុងលើកូនប្រុសច្បងអាយុ១៧ឆ្នាំ ស៊ីឈ្នួលធ្វើចម្ការឲ្យគេបានកម្រៃ១ ៥០០០រៀលក្នុង១ថ្ងៃទុកចិញ្ចឹមម្តាយ ចំណែកកូនស្រីពៅម្នាក់ទៀតអាយុ១៤ឆ្នាំ ដោយសារតែជីវភាពខ្វះខាត មិនបានចូលរៀនអក្សរដូចក្មេងដទៃនោះទេ។
អំណោយដែលទទួលបាននោះក្រោមការជួយឧបត្ថមពីលោកឃិន ម៉េងស្រេង មេបញ្ជាការយោធាខេត្ត លោកហ៊ួត រឹទ្ធ មេបញ្ជាការរងយោធាខេត្ត លោក ព្រហ្ម សុផា ជំនួយការផ្ទាល់មេបញ្ជាការខេត្ត លោកហ៊ួត រ័ត្ន មេបញ្ជាការយោធាស្រុកកែវសីមា អ្នកស្រីស្រ៊ុន ណាវី អាជីវករផ្សារកែវសីមា រួមជាមួយក្រុមមនុស្សធម៍ខ្លីខ្លឹម បានយកទៅជូនដល់ស្ត្រីមេម៉ាយខាងលើមានដូចជាអង្ករ៤បាវ មី ត្រីខកំប៉ុង ព្រមទាំងថវិការ៧៥ម៉ឺនរៀលផងដែរ។
គួរបញ្ជាក់ផងដែរថា ស្ត្រីពិការជើងខាងលើគឺកំពុងតែរស់នៅលើដីចម្ការស្វាយចន្ទីរមួយកន្លែង ដែលម្ចាស់ចម្ការផ្តល់ឲ្យរស់នៅបណ្តោះអាសន្ន មានចម្ងាយឆ្ងាយពីទីប្រជុំជន ។ ចំណែកលំនៅដ្ឋាន គឺមានសភាពតូចចង្អៀត ធ្លុះធ្លាយដំបូល ជញ្ជាំងមិនសមរម្យ និយាយរួម គឺបញ្ហាជីវភាព កំពុងតែប្រឈមជាមួយនិងការខ្វះខាតយ៉ាងខ្លាំង ។
ស្ត្រីខាងលើបានស្នើរសូមឲ្យមានការជួយឧបត្ថមបន្ថែមដើម្បីបានផ្ទះមួយខ្នងតូចក្បែរទីប្រជុំជន ងាយស្រួលដល់កូនស្រីពៅរបស់គាត់បានចូលរៀនផងខណៈក្មេងស្រីនោះ អាយុ១៤ឆ្នាំទៅហើយ នៅតែមិនទាន់ទទួលបានការអប់រំពីសាលារៀននៅឡើយ ៕
