ខេត្តប៉ៃលិន៖ នៅរសៀលថ្ងៃទី០៥ ខែវិច្ឆិកា ឆ្នាំ២០១៦ នៅទីបញ្ជាការកងការពារព្រំដែនលេខ៥០៤ មានរៀបចំពិធីចែកអំណោយអាវរងា របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់កងកម្លាំងប្រដាប់អាវុធ ចំណុះឲ្យយោធភូមិភាគទី០៥ ក្នុងប៉ៃលិន ដែលមាននាយទាហាន ពលទាហាន ប្រមាណជា៥០០នាក់ចូលរួម ។ ពិធីនេះដែរស្ថិតក្រោមអធិបតីភាពឯកឧត្តម នាយឧត្តមសេនីយ៏ គន់ គីម អគ្គមេបញ្ជាការរង នាយសេនាធិកាចម្រុះកងយោធពលខេមរភូមិន្ទ ព្រមទាំងមានការអញ្ជើញចូលរួមពី ឯកឧត្តមមេបញ្ជាការយោធភូមិភាគទី០៥ ,ឯកឧត្តមមេបញ្ជាការតំបន់ប្រតិបត្តិការសឹករងខេត្តប៉ៃលិន ,នាយទាហាន ,នាយទាហានរង, ពលទាហាន ,នាយពលអាវុធហត្ថ និងអង្គភាពពាក់ព័ន្ធមួយចំនួនទៀត ។
ពិធីនេះប្រារព្ធធ្វើនៅក្នុងទីបញ្ជាការកងការពារព្រំដែនលេខ៥០៤ (ស្រែម្អម ) ស្ថិតក្នុងភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
បើតាមរបាយការណ៏ដែលអ្នកយកព័ត៌មានទទួលបាន ៖ កងកម្លាំងប្រដាប់អាវុធ ដែលមកទទួលអាវរងានាពេលនេះ មកពីស្រុកសំពៅលូន ,ស្រុកភ្នំព្រឹក ,ស្រុកកំរៀង ,ស្រុកសំឡូត នៃខេត្តបាត់ដំបង និងកងកម្លាំងប្រដាប់អាវុធក្នុងខេត្តប៉ៃលិននេះតែម្តង ។
នៅក្នុងឱកាសចុះសួរសុខទុក្ខ និងចែកអំណោយអាវរងា របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នាពេលនេះ ឯកឧត្តម នាយឧត្តមសេនីយ៏ បណ្ទិត គន់ គីម អគ្គមេបញ្ជាការរង នាយសេនាធិកាចម្រុះកងយោធពលខេមរភូមិន្ទ និងជា អគ្គលេខាធិការសមាគមអតិតយុទ្ធជនកម្ពុជា បានមានប្រសាសន៏ផ្តាំផ្ញើរ សាកសួរសុខទុក្ខ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានសមាគមអតិតយុទ្ធជនកម្ពុជា ដែលសម្តេចមិនភ្លេចទេនូវគុណបំណាច់ របស់បងប្អូនអតីតយុទ្ធជន និងក្រុមគ្រួសារ ដែលបានលះបង់ សាច់ស្រស់ ឈាមស្រស់ ដើម្បីបុព្ធហេតុជាតិ មាតិភូមិ និងប្រជាជន ។
ឯកឧត្តម នាយឧត្តមសេនីយ៏ មានប្រសាសន៏បន្តថា៖ ក្នុងនាមយើងជាកងកម្លាំងប្រដាប់អាវុធ យើងត្រូវរក្សាឲ្យបាននូវបទបញ្ជារផ្ទៃក្នុងរបស់អង្គភាព ហើយប្រសិនមានបញ្ហាអ្វីមួយកើតឡើង នៅក្នុងអង្គភាព យើងមិនត្រួវផ្សព្វផ្សាយឲ្យមជ្ឍដ្ឋានខាងក្រៅដឹងនោះទេ ពិសេស គឺបណ្តាញសង្គមហ្វេសបុកជាដើម ដូច្នោះធ្វើយ៉ាងណាយើងត្រូវចេះសាមគ្គីគ្នា មិនត្រួវបែកបាក់គ្នាឡើយ ។ នាយឧត្តមសេនីយ៏ មានប្រសាសន៏បន្តទៀតថា៖ ក្នុងអំឡុងពេលចុះឈ្មោះបោះឆ្នោតនេះ សូមឲ្យបងប្អូនកងកម្លាំងទាំងអស់ នាំប្រពន្ធកូន ដែលគ្រប់អាយុទៅចុះឈ្មោះបោះឆ្នោត ឲ្យបានគ្រប់ៗគ្នា ដើម្បីបំពេញកាតព្វកិច្ចជាប្រជាពលរដ្ឋល្អ ចូលរួមបោះឆ្នោតជ្រើសរើសក្រុមប្រឹក្សាឃុំ/សង្កាត់ ដែលជាតំណាងយើងទាំងអស់គ្នា ឲ្យទទួលបានជោគជ័យនាពេលខាងមុខនេះ ។
ក្នុងពិធីជួបសំណោះសំណាល សាកសួរសុខទុក្ខ និងចែកអាវរងារ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្តម នាយឧត្តមសេនីយ៏ ព្រមទាំងក្រុមការងារ បានចែកអាវរងាចំនួន៤០៩១អាវ ជូនដល់នាយទាហាន ,នាយទាហានរង, ពលទាហាន ,នាយពលអាវុធហត្ថ ចំនួនជាង៥០០នាក់ផងដែរ ៕
សារ៉េត ហៅសារឿន នាគខៀវជាយដែន
