ខេត្តប៉ៃលិន៖ ថ្លែងក្នុងកិច្ចប្រជុំសាម័ញ្ញលើកទី៣០ អាណត្តទី២របស់ក្រុមប្រឹក្សាខេត្តប៉ៃលិន លោក ឡី ចាន់ឆាយ ប្រធានក្រុមប្រឹក្សាខេត្ត បានស្នើអោយគណៈអភិបាលបន្តជជែកជាមួយផ្នែកធនាគា និងស្ថាប័នមីក្រូហិរញ្ញវត្ថុក្នុងខេត្ត កុំអោយមានការរឹបអូស ដី ឬ ផ្ទះសំបែងរបស់ប្រជាពលរដ្ឋ ដែលជាកូនបំណុល ។ ក្នុងកិច្ចប្រជុំនេះត្រួវបានធ្វើឡើងកាលពីថ្ងៃទី៣ ខែវិច្ឆិកា ឆ្នាំ២០១៦ ក្នុងសាលប្រជុំក្រុមប្រឹក្សាខេត្ត ក្រោមអធិបតីភាព លោក ឡី ចាន់ឆាយ ប្រធានក្រុមប្រឹក្សាខេត្ត និងដោយមានការចូលរួមពីលោក លោកស្រីអភិបាលរងខេត្ត ,លោកប្រធាន អនុប្រធានមន្ទីរ មន្ត្រីរាជការ សមត្ថកិច្ចនគរបាលខេត្ត កងរាជអាវុធហត្ថខេត្ត លោកមេឃុំ ចៅសង្កាត់ និងតំណាងអង្គការសង្គមស៊ីវិល យ៉ាងច្រើនកុះករ ។
បន្ទាប់ពីការលើកឡើងពីមេភូមិ មេឃុំ/ចៅសង្កាត់ អំពីបញ្ហាពាក់ព័ន្ធនិងធនាគាក្នុងរិបអួសដី ផ្ទះប្រជាពលរដ្ឋរួចមក លោក ឡី ចានា់យ ប្រធានក្រុមប្រឹក្សាខេត្តប៉ៃលិន បាន ស្នើអោយគណអភិបាលបន្តជជែកគ្នាអោយបានជាក់លាក់ជាមួយផ្នែកធនាគា និងស្ថាប័នមីក្រូហិរញ្ញវត្ថុក្នុងខេត្តប៉ៃលិន ធ្វើយ៉ាងណាកុំអោយមានការរឹបអូស ដី ឬផ្ទះសំបែងរបស់ប្រជាពលរដ្ឋកូនបំណុល តែទុកឱកាសអោយពួកគាត់បន្តទៀត ដើម្បីរកប្រាក់មកសងធនាគារ និងមីក្រូហិរញ្ញវត្ថុវិញ ។
ប្រធានក្រុមប្រឹក្សាខេត្ត បានលើកឡើងថា៖ ដោយសារកត្តាអាការធាតុ គួបផ្សំនឹងកត្តាតម្លៃកសិផល នៅលើទីផ្សារ និងកត្តាផ្សេងៗមួយចំនួនទៀត ធ្វើ អោយប្រជាពលរដ្ឋយើងបានខាតបង់ជាច្រើនលើមុខរបរធ្វើស្រែ ចំការ និងមិនមានលទ្ធភាពបង្វឹលថវិកាមកសងធនាគារ ឬមីក្រូហិរញ្ញវត្ថុវិញ។ ហើយកន្លងមកអាជ្ញាធរខេត្តក៏មានការផ្សព្វផ្សាយ, ហើយទាំងស្ថាប័នមីក្រូហិរញ្ញវត្ថុ និង ធនាគារផ្ទាល់នោះ, ក៏បានដឹងហើយពីការចុះហត្ថលេខាយោគយល់គ្នាមួយ រវាងធនាគារជាតិ ក្រសួងសេដ្ឋកិច្ច និងហិរញ្ញវត្ថុ ជាមួយផ្នែកធនាគារ និងស្ថាប័នមីក្រូហិរញ្ញវត្ថុ ដែលមិនតម្រូវអោយមានការរឹបអូសយកដី ផ្ទះសំបែងរបស់ប្រជាពលរដ្ឋកូនបំណុល តែត្រូវទុកពេលអោយប្រជាពលរដ្ឋកូនបំណុលរកថវិកាមកសងវិញ។
លោកប្រធានក្រុមប្រឹក្សាខេត្ត បានលើកឡើងបន្តថា៖ ផ្នែកធនាគារ និងមីក្រូហិរញ្ញវត្ថុមួយចំនួន ហាក់មិនគោរពតាមការខ្លឹមសារនៃឯកសារយោគយល់គ្នា ដែលបានចុះហត្ថលេខានោះឡើយ។ ជាក់ស្តែងកន្លងមកនេះ នៅក្នុងភូមិអូតាប្រាង សង្កាត់អូតាវ៉ៅ ក៏មានករណីបង្ខិតបង្ខំអោយប្រជាពលរដ្ឋកូនបំណុលលក់ផ្ទះ លក់ដីយកលុយមកសងធនាគារ -មីក្រូហិរញ្ញវត្ថុជាម្ចាស់បំណុលវិញផងដែរ។
ក្នុងកិច្ចប្រជុំសាម័ញ្ញលើកទី៣០នេះដែរ ក្រុមប្រឹក្សាខេត្តក៏បានស្នើអោយគណអភិបាលពិនិត្យមើលមន្ត្រីនគរបាល ដែលគេនិយាយថា បានយកលុយច្រើនហួសប្រមាណ ពីការធ្វើអត្រានុកូលដ្ឋាននិង សៀវភៅគ្រួសារ ហើយក៏មានមន្ត្រីនៃមន្ទីររៀបចំដែនដីនគររូបនីយកម្មសំណង់ និងសុរិយោដី ដែលបានយកលុយច្រើនលើសពីតម្លៃសេវាកម្មបានកំណត់ ក្នុងការធ្វើប្លង់កម្មសិទ្ធកាន់កាប់ដីធ្លី ។
ក្រុមប្រឹក្សាខេត្តក៏បានស្នើផងដែរ សូមអោយមន្ទីរធនធានទឹកយកចិត្តទុកដាក់អោយបានខ្លាំងក្លាក្នុងការកសាងទំនប់ស្ទាក់ទឹក សំរាប់ស្តុកទឹកទុកប្រើប្រាស់នៅរដូវរាំងស្ងួត ចំណែកមន្ទីរពាណិជ្ជកម្ម និងមន្ទីរកសិកម្មត្រូវប្រឹងប្រែងអោយបានខ្លាំងថែមទៀត ក្នុងការទំនាក់ទំនងទីផ្សារលក់កសិផលរបស់ប្រជាពលរដ្ឋ អោយបានតម្លៃខ្ពស់។
លោក អៀង វុធ អភិបាលរងខេត្តប៉ៃលិន តំណាងឯកឧត្តម កើត សុធា អភិបាលនៃគណអភិបាលខេត្តប៉ៃលិនបានមានប្រសាសន៍ថា៖ នឹងយកសំណើររបស់ក្រុមប្រឹក្សារទៅអនុវត្តអោយបានល្អប្រសើរ ហើយក៏បានណែនាំអោយមន្ទីរ អង្គភាពដែលជាប់ពាក់ព័ន្ធនឹងសំណើរ ការលើកឡើងរបស់ក្រុមប្រឹក្សាខេត្ត នាពេលនេះ ត្រូវធ្វើការបំភ្លឺជាលាយលាក់អក្សរ ហើយបញ្ជូនមកសាលាខេត្តអោយបានយ៉ាងយូថ្ងៃទី២០ ខែវិច្ឆិកា ឆ្នាំ២០១៦នេះ ផងដែរ ៕
សារិត
