ខេត្តប៉ៃលិន ៖ នៅរដូវភ្ជុំបិណ្ឌនេះ គេសង្កេតឃើញប្រជាពលរដ្ឋជាច្រើននាក់ បាន នាំគ្នាធ្វើដំណើរមកពីខេត្តនានាជាច្រើន ដូចជា ខេត្តបាត់ដំបង បន្ទាយមានជ័យ ពោធិ៍សាត់ បាននាំគ្នាទៅកំសាន្តនៅតាមរមណីយដ្ឋានកែច្នៃ និងរមណីយដ្ឋានប្រវតិ្តសាស្ត្រមួយចំនួននៅក្នុងខេត្តប៉ៃលិន ជាពិសេសរមណីយដ្ឋានភ្នំយ៉ាត ជារមណីយដ្ឋានប្រវត្តិសាស្ត្រកំពុងតែ ល្បីរន្ទីរដ៏គួរឱ្យទាក់ទាញ ព្រោះមានរូបសំណាក លោកយាយយ៉ាតដ៏ធំត្រូវបានអាជ្ញាធរខេ ត្តដាក់តាំងនៅក្បែរជើងភ្នំជាប់នឹងផ្លូវជាតិលេខ៥៧ផងដែរ ។
ជាក់ស្តែង កាលពីព្រឹកថ្ងៃទី០២ ខែតុលា កន្លងទៅនេះ មានមនុស្សក្មេងចាស់ប្រុសស្រីជា ច្រើននាក់ ដោយអ្នកខ្លះជិះម៉ូតូ ខ្លះទៀតបើកបររថយន្ត ចូលទៅដុតធូបផ្សងសំណាងពីរូបសំណាកលោកយាយយ៉ាត ឱ្យរកស៊ីមានបាន ត្រជាក់ត្រជុំធ្វើដំណើរមានសុវត្ថិភាពជាដើម ។
ប្រភពព័ត៌មានពីភ្ញៀវទេសចរជាតិ និងអន្តរជាតិ ដែលដើរលេងកំសាន្តទស្សនារម ណីយដ្ឋាន ក្នុងខេត្តប៉ៃលិន បានឱ្យដឹងថា នៅរដូវបុណ្យទានម្តងៗ ជាពិសេសរដូវចូលឆ្នាំថ្មីប្រពៃណីជាតិ និងរដូវភ្ជុំបិណ្ឌនេះ ពួកគេតែងតែនាំគ្នាធ្វើដំណើរមកពីខេត្តផ្សេងៗ និងភ្ញៀវ បរទេសមកពីប្រទេសថៃ ឆ្លងទៅលេងកំសាន្តនៅតាមរមណីយដ្ឋាន ក្នុងខេត្តប៉ៃលិន ។
ប្រភពបន្តទៀតថា រមណីយដ្ឋាន ដែលធ្វើឱ្យពួកគេចូលចិត្តទៅលេងកំសាន្ត ជាញឹកញយគឺរមណីយដ្ឋានចម្ការខ្នុរ រមណីយដ្ឋានទឹកធ្លាក់អូរតាវ៉ៅ ហៅភ្នំខៀវ និងរមណីយដ្ឋានប្រវត្តិសាស្ត្រភ្នំយ៉ាត ស្ថិតនៅក្នុងក្រុងប៉ៃលិន ។ ជាពិសេសពួកគេចូលទៅដុតធូបបន់ស្រន់សុំលា ភសំណាងពីរូបសំណាកលោកយាយយ៉ាត ជួយឱ្យរកស៊ីមានបាន ព្រមទាំងឱ្យសេចក្តីសុខសាន្ត ក្នុងក្រុមគ្រួសារផងដែរ ។
ចំណែកអ្នកលក់ដូរនៅតាមដងផ្លូវក្បែររូបសំណាកយាយយ៉ាត បានឱ្យដឹងថា រដូវភ្ជុំបិណ្ឌនេះ ពួកគេលក់ដូរនំចំណី ធូប ទៀន និងផ្លែឈើគ្រប់មុខដាច់គួរសមដែរ ដោយក្នុងមួយថ្ងៃៗ មានភ្ញៀវចេញចូលទៅមកតាំងពីព្រឹករហូតដល់ល្ងាច ហើយចំណេញបានថវិកាជាច្រើន សម្រាប់ចិញ្ចឹមជីវិត ។ អ្នកខ្លះទៀតលក់ផ្កាម្លិះ ផ្កាចំប៉ា ចំប៉ី ទាន ធូប ផ្លែចេក និងគ្រឿងសំណែនផ្សេងៗមួយចំនួន ដើម្បីឱ្យភ្ញៀវទេសចរទិញយកទៅថ្វាយរូបសំណាកលោ កយាយយ៉ាត លុះពេលពួកគេទទួលបានជោគជ័យ ក៏មិនភ្លេច ទិញក្បាលជ្រូក មាន់ខ្វៃ ទាខ្វៃ យកទៅសែនជូនលោកយាយយ៉ាតផងដែរ ។
សូមបញ្ជាក់ថា ចំណែកអ្នកលក់ត្បូងច្នៃវិញ ដូចជាត្បូងកណ្តៀង ត្បូងទទឹម នៅក្បែរ ៗទល់មុខ នឹងរមណីយដ្ឋានភ្នំយ៉ាត ក៏ដាច់មួយៗផងដែរ នារដូវភ្ជុំបិណ្ឌនេះ ដោយភ្ញៀវទេ សចរខ្លះទិញយកទៅធ្វើបន្តោងខ្សែក. ខ្លះទៀតយកទៅដាំធ្វើត្បូងចិញ្ចៀនពាក់ដ៏ស្រស់ស្អា ត ៕
ដោយ ៖ នីយ៉ា
