ខេត្តប៉ៃលិន ៖ អាជ្ញាធរបានរៀបចំពិធីជួបសំណេះសំណាលជាមួយលោកគ្រូ អ្នកគ្រូ សិស្សានុសិស្ស និងជូនរង្វាន់ដល់បេក្ខជន ដែលទទួលបានជ័យលាភី ក្នុងការប្រឡងជាប់សញ្ញាបត្រមធ្យមសិក្សាទុតិយភូមិ “និទ្ទេសA.B.C” ទូទាំងខេត្តប៉ៃលិន កាលពីរសៀលថ្ងៃទី២៦ ខែកញ្ញា កន្លងទៅនេះ ក្នុងសាលាប្រជុំ ស្ថិតនៅកន្លែងពន្ធនាគារចាស់ ក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ក្រោមអធិបតីលោក អ៊ី ឈាន រដ្ឋលេខាធិការក្រសួងការពារជាតិ ដោយមានការចូលរួមពីលោក អៀង វុធ លោក ធូ ភា អភិបាលរងខេត្តប៉ៃលិន លោកជំទាវ បាន ស្រីមុំ ប្រធានសភាពសហព័ន្ធយុវជនកម្ពុជាប្រចាំខេត្តប៉ៃលិន ព្រមទាំងយុវជនស្ម័គចិត្ត ឪពុកម្តាយសិស្សមួយចំនួនផងដែរ ។
លោក អ៊ី ឈាន បានលើកឡើងថា យុវជនជាទំពាំងស្នងឫស្សី ពោលគឺយុវជនមានតួនាទីសំខាន់ណាស់ ក្នុងការជួយអភិវឌ្ឍសង្គមជាតិ ឱ្យមានការរីកចម្រើន នាពេលថ្ងៃអនា គត បន្ទាប់ពីចាស់ៗ ធ្វើការលែងកើត ដោយចូលនិវឌ្ឍន៍ជាបណ្តើរៗ ។
លោកបន្តទៀតថា ទី១. យុវជន ត្រូវតបស្នងចំពោះក្រុមគ្រួសាររបស់ខ្លួន និងខ្លួនឯងជាមុនសិន ដោយត្រូវខិត ខំប្រឹងប្រែងរៀនសូត្រក្រេបយកចំណេះដឹង មុខជំនាញណាមួយដែលខ្លួនពេញចិត្ត ដើម្បីបានការងារធ្វើសម្រាប់ចិញ្ចឹមក្រុមគ្រួសារឱ្យមានជីវភាពធូរធា ទី២. តបស្នងចំពោះសង្គមជាតិ គឺត្រូវខិតខំប្រឹងប្រែងបម្រើបងប្អូនប្រជាពលរដ្ឋ ខណៈពួកគាត់ត្រូវការ ពឹងពាក់ឱ្យយើ ងជួយដោះស្រាយបញ្ហាអ្វីមួយ ដោយមិនត្រូវរើសអើង ប្រកាន់វណ្ណៈអ្វីនោះឡើយ ។ លើសពីនេះ យុវជនត្រូវតែខិតខំបំពេញតួនាទីរបស់ខ្លួនឱ្យក្លាយទៅជាកូនល្អ សិស្សល្អ មិត្តល្អ និ ងពលរដ្ឋល្អ ដោយធ្វើយ៉ាងណាខិតខំបង្កើនសមត្ថភាពរបស់ខ្លួនឱ្យកាន់តែមានចំណេះវិជ្ជាខ្លាំងពូកែ រួមជាមួយនឹងសុជីវធម៌ល្អផងដែរ ។ លោកបញ្ជាក់ទៀតថា ចំពោះអ្នកដែលមិនទទួលបាននិទ្ទេសល្អ សូមកុំឱ្យអស់សង្ឃឹម ត្រូវតែប្រឹងប្រែងតស៊ូឡើង រីឯអ្នកដែលប្រឡងមិនជាប់ ក៏មិនត្រូវបាក់ទឹកចិត្តដែរ ត្រូវព្យាយាមម្តងហើយម្តងទៀត រហូតដល់ទទួលបានជោគជ័យ ។ បើសិនជាសមត្ថភាពទៅមិនរួចទេ អាចទាញយកជំនាញណាមួយច្បាស់លា ស់ ដើម្បីប្រកបរបរចិញ្ចឹមជីវិត នោះក៏ជាកត្តាមួយដ៏សំខាន់ផងដែរ ។
ជាចុងក្រោយ ឯកឧត្តម ក៏បានប្រគល់អំណោយ កាបូបស្ពាយ១ និងម៉ូតូមួយគ្រឿងម៉ាកស្កូពី ដែលជាអំណោយរបស់លោក ជំទាវ បាន ស្រីមុំ ជូនដល់សិស្សជាប់និទ្ទេសA និងកុំព្យូទ័រឡេបថបមួយគ្រឿង ជាអំណោយរបស់សាលាខេត្តប៉ៃលិន ។ សិស្សជាប់និទ្ទេសB ទទួលបានកាបូបស្ពាយ១ ថវិកាចំនួន២០ម៉ឺនរៀល រីឯសិស្សជាប់និទ្ទេសC បានកាបូប១ នថវិកា១០ម៉ឺនរៀលផងដែរ ។
សូមបញ្ជាក់ថា ខេត្តប៉ៃលិន មានមណ្ឌលសំណេរចំនួន១ មានបេក្ខជនក្នុងបញ្ជីសរុបចំនួន៣៥៩នាក់ ស្រីចំនួន១៧៣នាក់ បានចូលរួមប្រឡងចំនួន៣៥៧នាក់ ស្រី១៧២នាក់ អវត្តមាន២នាក់ ក្នុងនោះស្រី១ ដោយទទួលបានលទ្ធផលជាប់និទ្ទេសល្អប្រសើរ(A) ម្នាក់ និទ្ទេសល្អណាស់ (B) ៧នាក់ ក្នុងនោះស្រី១ និទ្ទេសល្អ (C) ២៣នាក់ ស្រី១២នាក់ និទ្ទេសល្អបង្គួរ (D) ៤៨នាក់ ស្រី២២នាក់ និទ្ទេសមធ្យម (E) ១៨២នាក់ ស្រី៩៤នាក់ ។ ដូច្នេះការប្រឡ ងមធ្យមសិក្សាទុតិយភូមិ ឆ្នាំសិក្សា២០១៥-២០១៦នេះ ទទួលបានលទ្ធផលគាប់ប្រសើរ ពោលគឺភាគរយជាប់ស្មើនឹង៧៣.១១% បើប្រៀបធៀបនឹងឆ្នាំ២០១៤-២០១៥កន្លងមកស្មើនឹង៥៩.៤៨%ប៉ុណ្ណោះ ឃើញថា ខ្ពស់ជាង១៣.៦៣% ៕
ដោយ ៖ នីយ៉ា
