មណ្ឌលគិរី៖ កិច្ចប្រជុំស្តីពីការផ្សព្វផ្សាយការលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ បានប្រព្រឹត្តទៅនៅរសៀលថ្ងៃទី២៦ខែកញ្ញានេះនៅសាលប្រជុំសាលាខេត្តមណ្ឌលគិរី ក្រោមអធិបតីភាព លោកជំទាវ អាយស៊ី សុគន្ធារី អភិបាលរងខេត្ត តំណាងដ៏ខ្ពង់ខ្ពស់របស់ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តមណ្ឌលគិរី នឹងមានការអញ្ជើញចូលរួមពីលោក លោកស្រីមន្ត្រីរាជការសាលាខេត្តមណ្ឌលគិរី កងកម្លាំងប្រដាប់អាវុធទាំង៣ប្រភេទ និងមន្ទីរអង្គភាពជុំវិញខេត្តជាច្រើននាក់ផងដែរ។
ហើយនៅក្នុងកិច្ចប្រជុំនោះដែរ លោកជំទាវ អាយស៊ី សុគន្ធារី អភិបាលរងខេត្ត បានមានប្រសាសន៍ថា ការមានសីលធម៌នៅក្នុងខ្លួនគឺនាំឲ្យមនុស្សទាំងនោះអនុវត្តនូវភាពត្រឹមត្រូវ ដើម្បីសង្គមជាតិទទួលបាន ការរស់នៅមានសីលធម៌ គុណធម៌ និងមានព្រះវិហាធម៌រវាងគ្នា និងគ្នា ធ្វើឲ្យសង្គមមានសុវត្ថិភាព យុត្តិធម៌ និងកិច្ចអភិវឌ្ឍ ព្រមទាំងធ្វើឲ្យប្រជាពលរដ្ឋទទួលបានការចេះដឹង ដោយចេះផ្លាស់ប្តូរនូវឥរិយាបទពីការធ្វើអំពើអាក្រក់មកធ្វើអំពើល្អវិញ ។
លោកជំទាវបានបន្ត សីលធម៌ដែលប្រជាពលរដ្ឋខ្មែរត្រូវការចាំបាច់ ដើម្បីជីវិតគឺតម្លៃនៃគុណធម៌របស់មនុស្ស តម្លៃតំបូន្មានរបស់ដូនតា តម្លៃវប្បធម៌ អារ្យធម៌ ទំនៀមទម្លាប់ប្រពៃណីខ្មែរតាំងពីអតីតកាលមកដល់បច្ចុប្បន្ននេះ។
លោកជំទាវបានបន្តទៀតថា ការមានសីលធម៌ សុជីវធម៌ រួមទាំងការស្លៀកពាក់ ការប្រើពាក្យសម្តី កាយវិកា និងខ្លឹមសារ សម្តែងឲ្យមានភាពសមរ្យ និងថ្លៃថ្នូរ ដើម្បីឆ្លុះបញ្ចាំងពីអត្តសញ្ញាណជាតិមួយដែលមានអារ្យធម៌ខ្ពស់តាំងពីយូរលង់មកហើយ។
បន្ទាប់មកលោកជំទាវបានសំណូមពរដល់លោក លោកស្រីទាំងអស់នៅក្នុងកិច្ចប្រជុំពេលនោះ សូមមេត្តាយកចិត្តទុកដាក់ខ្ពស់ចូលរួមឲ្យបានផុសផុល ព្រមទាំងនាំយកនូវអនុសាសន៍ទាំង០៦ចំណុចរបស់ សម្តេចកត្តិព្រឹទ្ធបណ្ឌិតប៊ុន រ៉ានី ហ៊ុនសែន ទៅធ្វើការផ្សព្វផ្សាយបន្តដល់មន្ត្រីរាជការនៅតាមមន្ទីរអង្គភាព និងប្រជាពលរដ្ឋនៅតាមមូលដ្ឋានផងដែរ៕
