ខេត្តប៉ៃលិន ៖ យ៉ាងហោចណាស់ ក៏មានប្រជាពលរដ្ឋ និងអាជីវករមកពីតាមបណ្តាខេត្តនានា ចំនួនប្រហែល៥០នាក់ បានមកជួបជុំគ្នានៅក្នុងបរិវេណមន្ទីរកសិកម្មខេត្តប៉ៃលិ ន ដើម្បីតវ៉ាសុំឱ្យអាជ្ញាធរខេត្ត និងមន្ទីរពាក់ព័ន្ធទាំងអស់ ពិសេសគឺមន្ទីរកសិកម្មខេត្តប៉ៃលិ ន ជួយរកដំណោះស្រាយ និងរកវិធានការ សម្របសម្រួលទៅខាងភាគីថៃ ក្នុងការនាំចេញនូវផ្លែស្វាយតាមច្រកទ្វារអន្តរជាតិព្រំដូចពេលមុន ខណៈកាលពីថ្ងៃទី៨ ខែកញ្ញា ឆ្នាំ២០១៦ ខាងភាគីថៃសម្រេចផ្អាកមិនឱ្យនាំផ្លែស្វាយចូលទៅលក់ដូរនៅប្រទេសគេទៀត ដោយទា មទារនូវលក្ខខណ្ឌមួយចំនួន ។ តែខាងអាជ្ញាធរ និងមន្ទីរជំនាញ មិនអើពើ និងជួយដោះស្រាយជូនពួកគាត់នោះឡើយ ទើបនាំគ្នាមកតវ៉ាយ៉ាងដូច្នេះ ។
ក្នុងនោះដែរ គេសង្កេតឃើញលោក ហែម ឫទ្ធី នាយករដ្ឋបាលសាលាខេត្តប៉ៃលិន លោក សុខ សាវុធ ប្រធានការិ យាល័យច្រកទ្វារអន្តរជាតិព្រំ និងលោក សាយ សុផាត ប្រធានមន្ទីរកសិកម្មខេត្តប៉ៃលិន ចុះមកអន្តរាគមន៍ និងពន្យល់ដល់អាជីវករ និងប្រជាពលរដ្ឋផងដែរ ។
ការតវ៉ាឱ្យអាជ្ញាធរខេត្តជួយរកដំណោះស្រាយនេះ បានកើតឡើងនៅព្រឹកថ្ងៃទី១៣ ខែកញ្ញា ឆ្នាំ២០១៦ ស្ថិតនៅក្នុងមន្ទីរកសិកម្មខេត្តប៉ៃលិន ។
តំណាងអាជីវករ ឈ្មោះ អោម ពេជ្រ ភេទប្រុស អាយុ៣៨ឆ្នាំ មកពីខេត្តកណ្តាល និង ឈ្មោះ ហុក ស្រីមុំ ភេទស្រី អាយុ៣៥ឆ្នាំ រស់នៅខេត្តប៉ៃលិន បានឱ្យដឹងដូចៗ គ្នាថា គោលបំណងដែលពួកគាត់មកមន្ទីរកសិកម្មខេត្តប៉ៃលិននេះ គឺដើម្បីទាមទារឱ្យខាងអាជ្ញាធរខេត្ត និងក្រសួងកសិកម្ម ជួយរកដំណោះស្រាយ ការនាំចេញនូវផ្លែស្វាយកែវល្មៀត ដែលប្រជាពលរដ្ឋបានដាំនៅតាមចម្ការនានាទូទាំងប្រទេស ដើម្បីយកទៅលក់ដូរនៅប្រទេសថៃតាមច្រកអន្តរជាតិព្រំ នៃខេត្តប៉ៃលិន ។
តែកាលពីថ្ងៃទី៨ ខែកញ្ញា កន្លងទៅ ខាងភាគីថៃ បានប្រជុំគ្នាសម្រេចផ្អាក ការឱ្យនាំចូលផ្លែស្វាយរបស់ខ្មែរ មិនឱ្យបន្តលក់ដូរនៅក្នុងទឹកដីប្រទេសគេតទៅទៀត ព្រោះគេយកលេសពីនេះ ពីនោះ ថាគ្មានគុណភាព ហើយក៏សម្រេ ចផ្អាកយ៉ាងនេះតែម្តង ។
ពួកគាត់បន្តទៀតថា សូមឱ្យអាជ្ញាធរពាក់ព័ន្ធទាំងអស់ មេត្តាពន្លឿនក្នុងការដោះស្រាយបញ្ហានេះ ព្រោះជិតដល់រដូវប្រមូលផលហើយ បើសិនជាគ្មានដំណោះស្រាយណាមួយទេ ប្រជាពលរដ្ឋនឹងជួបការលំបាកក្នុងជីវភាពគ្រួសារ ។ ម្យ៉ាងវិញទៀត ខាងអាជីវករ និងប្រជាពលរដ្ឋនឹងនាំគ្នាតវ៉ាម្តងទៀតជាទ្រង់ទ្រាយធំ បើគ្មានដំណោះស្រាយជូនពួកគាត់ នោះទេ ។
ពួកគាត់បញ្ជាក់ថា ការនាំផ្លែស្វាយចេញទៅលក់នៅប្រទេសថៃ គឺមានតែច្រកទ្វារអន្តរជាតិព្រំ នៃខេត្តប៉ៃលិនមួយប៉ុណ្ណោះ ដែលអាចនាំចេញទៅបាននាពេលកន្លងមក ។
ចំណែក លោក សាយ សុផាត ប្រធានមន្ទីរកសិកម្មខេត្តប៉ៃលិន បានឱ្យដឹងថា ពាក់ ព័ន្ធនឹងបញ្ហាខាងលើ ខាងមន្ទីរបានធ្វើរបាយការណ៍ទៅក្រសួងកសិកម្មហើយ ដោយខាង អាជ្ញាធរខេត្ត ក៏បានបង្កើតគណៈកម្មការ (ក្រុមការងារជម្រុញការនាំចេញកសិផលទៅប្រ ទេសថៃ) ដែលមានលោក ទុំ ណូ ប្រធានសាខាគយ និងរដ្ឋាករខេត្តជាប្រធាន ហើយលោ កជាអនុប្រធាន ព្រមទាំងមានសមាសភាពទាំងអស់ចំនួន១៣រូប ដើម្បីដោះស្រាយជាមួយភាគីថៃនៅថ្ងៃទី១៤ ខែកញ្ញា ស្អែកនេះ ។ លោកបន្តទៀតថា ខាងភាគីថៃ គេពិនិត្យឃើញថា ផ្លែស្វាយរបស់ខ្មែរយើង មានបញ្ហា៣យ៉ាង ទី១. មានសត្វល្អិតមួយចំនួននៅក្នុងគ្រាប់ ទី២. ព្រួយបារម្ភក្រែងផ្លែស្វាយមានបាក់តេរីនៅក្នុងផ្លែ និងទី៣. ផ្លែស្វាយមានមេរោគផ្សិតនៅក្នុងផ្លែផងដែរ ទើបភាគីថៃ គេផ្អាកការនាំចូល និងឱ្យខាងភាគីខ្មែរធ្វើកន្លែងពិនិត្យគុណភាពទាំងនោះជាមុន ។
លោកបញ្ជាក់ថា ខាងខ្មែរយើង កំពុងរៀបចំកន្លែង ពិនិត្យគុណភាពផ្លែឈើមួយកន្លែងនៅស្រុកបវេល ខេត្តបាត់ដំបង ដើម្បីឱ្យភាគីថៃទទួលស្គាល់ពីគុណភាពកសិផលរបស់ខ្មែរយើង ៕
ដោយ ៖នីយ៉ា
