ខេត្តប៉ៃលិន ៖ មានករណីប្រជាពលរដ្ឋនាំគ្នាជីកដី ដើម្បីរែងរករ៉ែត្បូង ស្រាប់តែប្រទះឃើញគ្រាប់មីន ដែលសេសសល់ពីសម័យសង្គ្រាម ចំនួន០២គ្រាប់ កប់នៅក្នុងដីជម្រៅជាងកន្លះម៉ែត្រ ទើបបង្កឲ្យមានការភ្ញាក់ផ្អើល រត់ចែកជើងគ្នាព្រាតតែម្តង ។ តែបន្ទាប់ពីប្រទះឃើញគ្រាប់មីនរួចមក ក៏រាយការណ៍ប្រាប់អាជ្ញាធរមូលដ្ឋាន ដើម្បីយកទៅរក្សាទុកនៅកន្លែងសុវត្ថិភា ព ។
ហេតុការណ៍នេះ បានកើតឡើងកាលពីវេលាព្រឹកថ្ងៃទី៩ ខែកញ្ញា ឆ្នាំ២០១៦នេះ ស្ថិតក្នុងភូមិថ្នល់ទទឹង ឃុំអូរអណ្តូង ស្រុកសាលាក្រៅ ។
ប្រភពព័ត៌មានពីប្រជាពលរដ្ឋជាច្រើននាក់ រស់នៅក្នុងឃុំអូរអណ្តូងបានរៀបរាប់ឲ្យដឹងកាលពីព្រឹកថ្ងៃទី៩ ខែកញ្ញា ខណៈពួកគាត់កំពុងតែជីកដីដើម្បីរែងរករ៉ែត្បូង ស្រាប់តែឃើញគ្រាប់មីនកប់នៅក្នុងដី ដោយក្នុងនោះមានមីនស្គរ១គ្រាប់ និងមីន៦៩មួយគ្រាប់ផងដែរ ហើយពួកគាត់មានការព្រួយបារម្ភយ៉ាងខ្លាំងចំពោះសុវត្ថិភាព ព្រោះឃើញមាននៅរាយពាសពេញក្នុ ងដី មិនថាដីដែលអាជ្ញាធរកំចាត់មីនបានសំអាតរួចហើយ និងដីមិនទាន់បោសសំអាតនោះទេ សុទ្ធតែសល់គ្រាប់មីនទាំងអស់ ។
បើតាមស្ត្រីម្នាក់ ឈ្មោះ យិន សំណាង អាយុ៤៥ឆ្នាំ រស់នៅភូមិថ្នល់ទទឹង ឃុំអូរអណ្តូង បានឲ្យដឹងថា ពួកគាត់មានការព្រួយបារម្ភយ៉ាងខ្លាំងចំពោះបញ្ហាគ្រាប់មីន នៅលើដីដែលអាជ្ញាធរកំចាត់មីន បានបោសសំអាតរួចហើយ ព្រមទាំងបានប្រគល់ឲ្យពួកគាត់ទៅរស់នៅលើដីនោះ ។ តែនៅថ្ងៃនេះ ខណៈពួកគាត់ ជីកដីរករ៉ែត្បូង ស្រាប់តែប្រទះឃើញ ក៏មានការភ្ញាក់ផ្អើល និងភ័យខ្លាចតែម្តង ។ គាត់ក៏បានសំណូមពរដល់អាជ្ញាធរកំចាត់មីនផង ឱ្យយកចិត្តទុក ដាក់ចំពោះបញ្ហានេះ ដោយត្រូវពិនិត្យឡើងវិញចំពោះដីដែលបានបោសសំអាតរួច និងដីដែលនៅសេសសល់ ដើម្បីរក្សាសុវត្ថិភាពជូនពួកគាត់ ដែលកំពុងតែរស់នៅលើដីនោះ ។
ពាក់ព័ន្ធនឹងបញ្ហានេះ លោក គង់ ណន អធិការរងនគរបាលស្រុកសាលាក្រៅ បានឲ្យដឹងថា បើតាមលោកដឹង ដីនៅចំណុចកើតហេតុខាងលើ ដែលពលរដ្ឋប្រទះឃើញគ្រាប់មីននោះ ជាដីដែលអាជ្ញាធរកំចាត់មីន បានដោះរួចរាល់អស់ហើយ ព្រមទាំងប្រគល់ឲ្យប្រជាពល រដ្ឋរស់នៅផងដែរ ហើយគ្រាប់មីន ដែលពលរដ្ឋប្រទះឃើញជាមីនស្គរ និងមីន៦៩ ដែលសល់ពីសម័យសង្គ្រាម ។ លោកបន្តទៀតថា ទោះបីជារដ្ឋាភិបាល និងប្រទេសជាម្ចាស់ជំនួយ បានប្រឹងប្រែងយ៉ាងខ្លាំងទៅលើសកម្មភាពរំដោះគ្រាប់មីន និងយុទ្ធភ័ណ្ឌមិនទាន់ផ្ទុះចេញពីផ្ទៃដីនៃប្រទេសកម្ពុជា រយៈពេលជាង២០ឆ្នាំកន្លងមកក៏ដោយ គ្រាប់មីន និងយុទ្ធភណ្ឌទាំងនោះនៅតែបង្កគ្រោះថ្នាក់ និងគំរាមកំហែងដល់ប្រជាពលរដ្ឋរស់នៅលើតំបន់នោះផងដែរ ៕ ដោយ ៖នីយ៉ា
