រតនគិរី ៖ កម្លាំងអ-ហ មូលដ្ឋានស្រុកអូរយ៉ាដាវ សហការជាមួយកម្លាំងនគរបាលប៉ុស្តិ៍ឃុំប៉ក់ញ៉ៃ និងកម្លាំងនគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ កាលពីវេលាម៉ោង ១២ និង ៤៨ នាទីថ្ងៃត្រង់ម្សិលមិញ ត្រង់ចំណុចភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ។
ក្នុងប្រតិបត្តិការនេះ ដឹកនាំបញ្ជាផ្ទាល់ដោយលោកម៉ម វណ្ណដា ព្រះរាជអាជ្ញារងអមសាលាដំបូងខេត្តរតនគិរី ។
មេបញ្ជាការអ-ហមូលដ្ឋានស្រុកអូរយ៉ាដាវ លោក សុខមីន ប្រាប់ឲ្យដឹងថា ក្រោយពីទទួលព័ត៌មានពីកម្លាំងសម្ងាត់ថា មានជនជាតិវៀតណាមលួចជីករ៉ែខុសច្បាប់ក្នុងភូមិសាស្ត្រខាងលើរួចមក រូបលោកបានសុំយោបល់លោកឧត្តមសេនីយ៍ត្រី គឹម រស្មី មេបញ្ជាការអ-ហ ខេត្តរតនគិរីចុះបង្ក្រាបជាក់ស្តែង ដោយមានតំណាងអធ្យការអមសាលាដំបូងខេត្តដឹកនាំបញ្ជាផ្ទាល់តែម្តង ។
លោក សុខ មីន បន្តថា ជនជាតិវៀតណាមចំនួន5នាក់នេះទី1-ឈ្មោះឡេ វ៉ាន់គឿង ភេទប្រុសអាយុ 52 ឆ្នាំ មានស្រុកកំណើតក្រុងថាញ់វៀន ខេត្តញ៉ៃវៀន ទី2-ឈ្មោះឡា ឌឹកតាំងភេទប្រុសអាយុ 22 ឆ្នាំ មានទីលំនៅភូមិជាង ឃុំទៀនញឹង ស្រុកឃឿងទុន ខេត្តថាញ់ហ៊ ទី3-ឈ្មោះវៀង ទន់ឌឹក ភេទប្រុសអាយុ 46 ឆ្នាំមានស្រុកកំណើតភូមិថ្មី ឃុំហ៊ជុំ ស្រុកដុងហ៊ី ខេត្តថាញ់វៀនទី4-ឈ្មោះ ចិន ម៉ីង៉ង ភេទប្រុស អាយុ38ឆ្នាំ មានទីលំនៅភូមិតូហាយ ឃុំហ៊ីជីញ ស្រុកដុងហ៊ី ខេត្តញ៉ៃវៀន និងទី5-ឈ្មោះ វ៉ី ថាញ់ដាយ ភេទប្រុស អាយុ48ឆ្នាំ មានទីលំនៅភូមិថូនដាក់ថាញ់ ឃុំណាមទន់ ក្រុងណូ ខេត្តដាក់ណុង។
លោកសុខ មីន បញ្ជាក់ឲ្យដឹងទៀតថា សម្ភារៈសម្រាប់ជីករ៉ែដកហូតរួមមានម៉ាស៊ីភ្លើងធំ១គ្រឿង ម៉ូទ័របូមទឹកចំនួន២ រថយន្តឡង់គ្រីស័រ១គ្រឿង និងឧបករណ៍សំរាប់ជីករ៉ែមួយចំនួនទៀត។
បច្ចុប្បន្ន ជនសង្ស័យចំនួន៥នាក់ លួចចូលជីករ៉ែត្រូវបានកម្លាំងសមត្ថកិច្ចដែលចុះប្រតិបត្តិការបញ្ជូនមកស្នងការនគរបាលខេត្តរតនគិរីដើម្បីចាត់ការបន្តទៅតាមផ្លូវច្បាប់។
ប្រភពព័ត៌មានដោយឡែកទៀតប្រាប់ឲ្យដឹងថា ជនជាតិវៀតណាម5នាក់នេះ ត្រូវបានថៅកែជនជាតិវៀតណាមម្នាក់ឈ្មោះគឿង នាំចូលតាមច្រកលេខ១៩ ដោយធ្វើសកម្មភាពលួចជីករ៉ែប្រមាណ១០ថ្ងៃកន្លងមកហើយ ដោយពេលថ្ងៃធ្វើការកន្លែងទីតាំងខាងលើលុះពេលយប់នាំគ្នាទៅសំរាកនៅផ្ទះលោកឡុង រុក្ខា ប្រធាននគរបាលអន្តោប្រវេសន៍ប្រចាំច្រកទ្វារអន្តរជាតិអូរយ៉ាដាវ។
គេកំពុងតែឆ្ងល់ថា ជនជាតិវៀតណាមទាំងនេះលួចចូលមកដីខ្មែរដោយខុសច្បាប់ និងមានសម្ភារៈជីករ៉ែជាច្រើន តើមានការជាប់ពាក់ព័ន្ធនឹងលោកឡុង រុក្ខា ដែរឫទេ? ៕
