គ្លីនិចព្យាបាលឯកជនមួយកន្លែងកម្មសិទ្ធិ របស់មន្ត្រីមន្ទីរសុខាភិបាលខេត្តមណ្ឌលគិរីម្នាក់ ត្រូវបានថ្នាក់លើខ្លួនបិទ មិនអោយដំណើរការព្យាបាលអ្នកជំងឺទាំងស្រុង បន្ទាប់ពីរកឃើញថា មន្ត្រីរូបនោះបានយកទួនាទី របស់ខ្លួនរំលោភលើ ច្បាប់របស់ក្រសួងសុខាភិបាល ។ ការបិទទីតាំងគ្លីនិចឯកជនមួយកន្លែងដែលមិនធ្លាប់មាននៅក្នុងខេត្តមណ្ឌលគិរីនេះ គឺបានធ្វើឡើងនៅល្ងាចថ្ងៃ១០សីហា ២០១៦ ក្រោមការចុះហត្ថលេខាពីសំណាក់លោក ប៊ុន សួរ ប្រធានមន្ទីរសុខា ភិបាល ខេត្តមណ្ឌលគិរី។
ទីតាំងគ្លីនិចមួយកន្លែងស្ថិតនៅចំកណ្តាលក្រុងសែនមនោរម្យជាកម្មសិទ្ធរបស់លោក ភោគ វិទូ មន្ត្រីមន្ទីរសុខាភិបាល និងជាបុគ្គលិករបស់កម្មវិធី ប្រយុទ្ធប្រឆាំងជំងឺគ្រុនចាញ់ ត្រូវបានប្រធានមន្ទីរសុខាភិបាលខេត្តមណ្ឌលគិរី អះអាងថា បានបិទជាស្ថាពររួចរាល់ហើយ ក្រោយមន្ទីរបានហៅគ្រូពេទ្យឈ្មោះភោគ វិទូ នេះមកព្រមាននិងចាត់វិធានការបញ្ឍប់ ដំណើរការរបស់គ្លីនិចម្តងរួចមកហើយ ក្រោយរកឃើញថា គ្លីនិចបានលួចព្យាបាលអ្នកជំងឺគ្រុនឈាមខុស ពីច្បាប់ ដែល ក្រសួងសុខាភិបាលបានចែងនោះ។
ប្រធានមន្ទីរសុខាភិបាលខេត្តមណ្ឌលគិរី បានថ្លែងប្រាប់អ្នកកាសែតតាមរយះទូរស័ព្ទនៅល្ងាចថ្ងៃ១០សីហានេះថា ការបិទទីតាំងពិនិត្យព្យាបាលរបស់មន្ត្រីរបស់មន្ទីរសុខាភិបាលខាងលើនៅថ្ងៃនេះ គឺដំបូងឡើយទីតាំងខាងលើបាន ប្រព្រឹត្តនូវទង្វើរដែលច្បាប់ហាមប្រាម គឺលួចព្យាបាលអ្នកជំងឺគ្រុនឈាម ហើយមន្ទីរបានហៅម្ចាស់គ្លីនិចឈ្មោះ ភោគ វិទូនេះ មកព្រមានម្តងរួចមកហើយ។ទោះជាបែបនោះក្តី មន្ត្រីខាងលើមិនបានបញ្ឍប់សកម្មភាពរបស់ខ្លួននោះទេ ថែម ទាំងផ្គើនទៅនិងច្បាប់សុខាភិបាលម្តងទៀតពិសេសគឺខ្លួនជាមន្ត្រីមន្ទីរសុខាភិបាលផងនិងជាបុគ្គលិក កម្មវិធីប្រយុទ្ធ ប្រឆាំងជំងឺគ្រុនឈាមផង មន្ទីរក៏សម្រេចបញ្ឈប់មិនអោយគ្រូពេទ្យខាងលើបន្តពិនិត្យព្យាបាលក្នុងទីតាំងរបស់ខ្លួនទាំង ស្រុងនៅថ្ងៃ១០សីហានេះតែម្តង។
សូមជម្រាបថា ប៉ុន្មានថ្ងៃចុងក្រោយនេះគេបានទទូលព័ត៍មានថា អត្រាជំងឺគ្រុនឈាមនៅក្នុងខេត្តមណ្ឌលគិរី នៅតែ មាន ការកើនឡើងច្រើនដដែល បន្ទាប់ពីមន្ទីរសុខាភិបាលថ្លែងថា អត្រាជំងឺគ្រុនឈាមគឺបានថមថយនោះហើយ។
ជុំវិញបញ្ហានេះដែរ លោក ប៊ុន សួរ ក៏បានឆ្លើយតបថា លោកមានការហួសចិត្តខ្លាំងណាស់ចំពោះព័ត៍មានមួយនេះ ហើយលោក ក៏បានចាត់តាំងអោយក្រុមគ្រូពេទ្យជំនាញ ចុះទៅតាមដាននិងត្រួតពិនិត្យគ្រប់មន្ទីរពេទ្យឯកជន និងគ្លីនិច ព្យាបាលជំងឺនានាក្នុងក្រុងក៏ដូចតាមបណ្តាស្រុក ប៉ុន្តែលោកមិនបានរកឃើញថា មានអ្នកជំងឺគ្រុនឈាមសំរាក ព្យាបាលនៅទីនោះ នោះទេ ដោយរកឃើញតែក្នុងទីតាំងព្យាបាលរបស់លោក ភោគ វិទូ តែប៉ុណ្ណោះ ដែលនៅមាន លួចព្យាបាលអ្នកជំងឺនេះ ។
លោកថា នៅតាមបណ្តាគ្លីនិចឬកន្លែងព្យាបាលឯកជន បានប្រើប្រាស់ឧបករណ៍តេស្តឈាម មិនមានលក្ខណះស្តង់ដា ដូចច្នេះ ក្រោយពិនិត្យនោះលទ្ធផលចេញមកមិនមានភាពប្រក្រតីនោះទេ។មួយវិញទៀត ទាល់តែមន្ទីរពេទ្យបង្អែកទើបមានម៉ាស៊ីន ស្វ័យប្រវត្តដែលអាចវិនិច្ឆ័យលក្ខណះជំងឺគ្រុនឈាមនេះបាន រាល់ការ វិនិច្ឆ័យមិនប្រក្រតីនេះហើយ ទើបមានព័ត៍មានថា ជំងឺគ្រុនឈាមមានការកើនឡើងនោះ។
នៅល្ងាចថ្ងៃនៃការបិទទីតាំងព្យបាលរបស់មន្ត្រីមន្ទីរសុខាភិបាលខាងលើ យើងមិនអាចស្វែងរកសូមការបញ្ជាក់ ណាមួយ ពីម្ចាស់ទីតាំងគឺលោកភោគ វិទូ នេះបាននៅឡើយ។
មជ្ឍដ្ឋានពលរដ្ឋ សាទរយ៉ាងខ្លាំងទៅនិងចំណាត់ការរបស់មន្ទីរសុខាភិបាលខេត្តមណ្ឌលគិរីនៅពេលនេះ ព្រោះថា មិនអាចបំផុសបំផុលពាក្យមិនពិតបែបនេះបាននោះទេ គឺសុទ្ធសឹងតែជាអាយុជិវិតមនុស្ស។
ពាក់ព័ន្ធជាមួយនិងជំងឺគ្រុនឈាមនេះផងដែរ លោកប្រធានមន្ទីរបញ្ជាក់ថា ជំងឺគ្រុនឈាមមានការថមថយហើយ ដោយក្នុង១ថ្ងៃគឺមន្ទីរពេទ្យបង្អែកបានទទូលអ្នកជំងឺចាប់ពី៥០ទៅ៦០នាក់តែប៉ុណ្ណោះ ដោយកាលពីមួយរយះពេល មុននោះ ស្ថានភាពជំងឺហក់ឡើងខ្លាំងគឺមានដល់ទៅជាង១០០នាក់ឯណោះក្នុង១ថ្ងៃ។
ជំងឺគ្រុនឈាមក៏ត្រូវបានគេរាយការណ៍ថា បានកើតឡើងនៅក្នុងតំបន់មួយចំនួនក្នុងខេត្តមណ្ឌលគិរីពិសេស គឺក្នុងភូមិ ចម្ការតែ ក្រុងសែនមនោរម្យនិងភូមិពូលូង ក្រុងសែនមនោរម្យដូចគ្នា ប៉ុន្តែដោយសារតែការចុះពិនិត្យនិងបាញ់ ថ្នាំសំ លាប់មូស ចំគោលដៅពីសំណាក់មន្ត្រីជំនាញនោះ អត្រានៃជំងឺនេះក៏បានថមថយទៅវិញ។ទោះជាមានការថមថយ យ៉ាងណា ក៏ដោយ មន្ត្រីជំនាញនៅតែអះអាងថា និងបន្តយុទ្ធនាការបន្ថែមទៀត ដើម្បីកំចាត់ជំងឺប្រភេទនេះ អោយ អស់ពីក្នុងតំបន់៕
