បាត់ដំបង ៖ ប្រធានច្រកអូរអន្លក់បើករថយន្តលុចស៊ីសក្នុងល្បឿនលឿនឆ្លងផ្លូវកាត់ទទឹងបុករថយន្តឆ្លាមបន្តទៅបុករបងផ្ទះសេរីភាពជួសជុលអាយកូមបណ្តាលអោយរបួស៤នាក់កាលវេលាម៉ោង២២យប់ថ្ងៃទី៣០ខែធ្នូឆ្នាំ២០១៤ចំណុចផ្លូវទាចំរ៉ាត់(៥២០)ភូមិចំការសំរោង ២ សង្កាត់ចំការសំរោង ក្រុងបាត់ដំបង ។
សមត្ថកិច្ចចរាចរណ៍ផ្លូវគោកខេត្តបានអោយដឹងថា រថយន្តរងគ្រោះម៉ាកឆ្លាមពណ៌សពាក់ស្លាកលេខភ្នំពេញ 2H5046 បើកបរដោយយុវជនឈ្មោះ ម៉ាត់ រ៉សាត អាយុ២៤ឆ្នាំ ជនជាតិឥស្លាម មានទីលំនៅភូមិវត្តរំដួលសង្កាត់ចំការសំរោង ក្រុងបាត់ដំបង ។ អ្នកជិះជាមួយមានឈ្មោះ ចុះ ម៉ារីយ៉ា ភេទស្រីអាយុ២២ឆ្នាំ ជាគូដណ្តឹងអ្នកបើកបរ និងឈ្មោះ ហ៊ីម លីណា ភេទស្រីអាយុ២២ឆ្នាំ រងរបួសនិងក្មេងប្រុសស្រី ៣ នាក់ទៀត រងរបួសមានទីលំនៅភូមិផ្សារត្រាចឃុំលង្វែក ស្រុកសាមគ្គីមានជ័យខេត្តកំពង់ឆ្នាំង ។ ចំណែករថយន្តបង្កម៉ាកលុចស៊ីសពណ៌ស្ក ពាក់ស្លាកលេខភ្នំពេញ 2X8301 បើកបរដោយឈ្មោះថា ប្រធានច្រកទ្វាព្រំដែនអូរអន្លក់ស្រុកកំរៀង ។
ប្រភពសាក្សីបានអោយដឹងថា មុនពេលកើតហេតុរថយន្តឆ្លាមបើកបរពីជើងទៅត្បូង ស្រាប់តែពេលនោះ រថយន្តលុចស៊ីសបើកពីកើតទៅលិចបុកគូថរថយន្តឆ្លាមរុលទៅបុករបងផ្ទះសេរីភាពជួសជុលអាយកូម បណ្តាលអោយអ្នកជិះក្នុងរថយន្តឆ្លាមរងរបួសជាច្រើននាក់ ។
ក្រោយកើតហេតុ សមត្ថកិច្ចប្រមូលរថយន្តទាំង ២ គ្រឿងយកទៅរក្សាទុកនៅការិយាល័យចរាចរណ៍ផ្លូវគោកខេត្តរងចាំដោះស្រាយជាក្រោយ ៕
