ខេត្តប៉ៃលិន ៖ នៅថ្ងៃទី១៦ខែ ឧសភា ឆ្នាំ២០១៦ លោក ជំទាវ ជាលាភ អភិបាលរងខេត្តប៉ៃលិន រួមដំណើរដោយ លោកជំទាវ ស៊ុំ ហៀង ប្រធានសភាពាណិជ្ជកម្មខេត្ត មន្ត្រីរាជការសាលាខេត្ត និងដោយមានកិច្ចសហការជាមួយងទ័ពផ្នែកសឹងរងស្រុកសាលាក្រៅ នគរបាលការពារព្រំដែន វរៈ៨២១ បានចុះជួយដល់ប្រជាពលរដ្ឋចំនួន៣គ្រួសារ នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដែលរងគ្រោះដោយខ្យល់កន្ត្រាក់ប៉ើងដំបូលផ្ទះកាលពីរសៀលថ្ងៃទី១៥ ខែឧសភាកន្លងទៅនេះ។
តាមគោលបំណងសំខាន់របស់ក្រុមការងារដែលបានចុះជួយដល់ប្រជាពលរដ្ឋរងគ្រោះទាំង៣គ្រួសារនេះ គឺត្រូវជួយប្រក់ដំបូលផ្ទះប្រជាពលរដ្ឋទាំងនោះឡើងវិញ ប៉ុន្តែដោយមើលឃើញភាពជាក់ស្តែងថា មិនអាចយកឈើ និងសង្កសីដែលខ្យល់បក់ប៉ើងនោះមកធ្វើវិញបាន ហើយដោយសារប្រជាពលរដ្ឋទាំងបីគ្រួសារមិនត្រូវការឈើ និងសង្កសីចាស់មកធ្វើឡើងវិញផងដែរ ទើបក្រុមការងារបានសម្រេចផ្តល់ជាថវិកា និងអំណោយខ្លះដល់ប្រជាពលរដ្ឋទាំងបីគ្រួសារនោះ ដោយក្នុងមួយគ្រួសារៗទទួលបាន អង្ករ២៥គីឡូក្រាម មីមួយកេះ ទឹកត្រី២ដប ទឹកសុទ្ធពីយួរ តង់មួយ និងថវិការ២៥ម៉ឺនរៀល។
លោក ជំទាវ ជា លាភអភិបាលរងខេត្តប៉ៃលិនបានមានប្រសាសន៍ថា បច្ចុប្បន្ននេះគ្រោះធម្មជាតិ បានកើតឡើងច្រើនលើប្រជាពលលរដ្ឋ ដូចជា ពេលមានភ្លៀង មានខ្យល់កន្ត្រាក់បាក់ផ្ទះ ប៉ើងដំបូលផ្ទះ មានទឹកជំនន់ជន់លិចផលដំណាំ ផ្ទះសំបែងប្រជាពលរដ្ឋ , លុះដល់ពេលរាំងភ្លៀង ក៏រាំងអូសបន្លាយធ្វើអោយមានការខ្វះខាតទឹកប្រើប្រាស់។ ក្នុងស្ថានភាពបែបនេះ រាជរដ្ឋាភិបាល ក្រោមការដឹកនាំរបស់សម្តេចអគ្គមហាសេនា បតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កំពុងមានការគិតគូរ រកគ្រប់បធ្យោបាយដើម្បីជួយដល់ប្រជាពលរដ្ឋ បញ្ជៀសនូវគ្រោះធម្មជាតិទាំងនេះ ។
លោកជំទាវ បានបន្តថា នៅក្នុងមូលដ្ឋានខេត្តប៉ៃលិនយើង ឯកឧត្តម កើត សុធា អភិបាលនៃគណអភិបាលខេត្ត មានការយកចិត្តទុកដាក់ខ្ពស់ចំពោះសុខទុក្ខ ជីវភាពរស់នៅរបស់បងប្អូនប្រជាពលរដ្ឋយើង ទីណាមានទុក្ខលំបាក ឯកឧត្តម តែងតែណែនាំដល់ក្រុមការងារថ្នាក់ខេត្ត ថ្នាក់ក្រុង ស្រុក ចុះសួរសុខទុក្ខ និងនាំយកអំណោយខ្លះៗមកចែកជូនដល់ប្រជាពលរដ្ឋ មិនអោយប្រជាពលរដ្ឋណាម្នាក់រងគ្រោះដោយមិនទទួលបានការជួយជ្រោមជ្រែងពីអាជ្ញាធរឡើយ។
លោកជំទាវបានណែនាំសូមអោយប្រជាពលរដ្ឋមានការប្រុងប្រយ័ត្នខ្ពស់ចំពោះគ្រោះធម្មជាតិខ្យល់កន្ត្រាក់ ត្រូវធ្វើផ្ទះសំបែងអោយបានមាំទាំ ទោះតូចក្តី ធំក្តីកុំមានការធ្វេសប្រហែសឡើយ ព្រោះរដូវនេះភ្លៀងក៏ចាប់ផ្តើមធ្នាក់ជាបណ្តើរៗនិងនាំយកខ្យល់កន្ត្រាក់មកជាមួយផងដែរដែរ៕
