មណ្ឌលគិរី ៖ នៅក្នុងស្រុកពេជ្រាដាខេត្តមណ្ឌលគិរី លំនៅឋានប្រជាពលរដ្ឋចំនួន ១៥២ ខ្នង បានរងការខូចខាតដោយសារតែការវាយប្រហារពីខ្យល់កន្ត្រាក់ និងបានធ្វើឲ្យមានមនុស្សស្លាប់ម្នាក់ រងរបួសធ្ងន់ស្រាលពីរនាក់ ។ គ្រោះមហន្តរាយដែលធ្វើឲ្យមានសោកនាថកម្មនេះ បានកើតឡើងនៅឃុំពូជ្រៃ នឹងឃុំក្រង់តេះ ស្រុកពេជ្រាដា កាលពីវេលាម៉ោង១៧នឹង៣០នាទី ថ្ងៃទី៥ ឧសភា ២០១៦ ។
ប្រភពបានឲ្យដឹងថា នៅវេលាម៉ោង៥និង៣០នាទីថ្ងៃដដែល មានខ្យល់កន្ត្រាក់មួយយ៉ាងខ្លាំង បណ្តាលអោយដំបូលផ្ទះប្រក់ដោយសង្ក័សីហោះមកបុកចំក្បាលបុរសម្នាក់ដែលកំពុងជិះម៉ូតូតាមផ្លូវស្លាប់ភ្លាមៗ រីឯម្ចាស់ផ្ទះរងរបួសធ្ងន់ទាំង២នាក់ប្តីប្រពន្ធផងដែរ ។
លោក ព្រហ្ម សាវេន មេបញ្ជាការមូលដ្ឋានអាវុធហត្ថស្រុកពេជ្រាដាបានឲ្យដឹងថា ជនរងគ្រោះដែលបានស្លាប់មានឈ្មោះ ឆោម ឆើត ភេទប្រុសអាយុ៣២ឆ្នាំរស់នៅភូមិចុងផាងឃុំពូជ្រៃស្រុកពេជ្រាដា អ្នករបួសមានឈ្មោះសឿង កុសល និងប្រពន្ធ។
សេចក្តីរាយការណ៏បានឲ្យដឹងថា នៅឃុំក្រង់តេះមានផ្ទះខូចខាតចំនួន៤១ខ្នង នៅឃុំពូជ្រៃមានផ្ទះខូចខាតចំនួន១១១ខ្នង ។
សូមបញ្ជាក់ថា នេះជាលើកទី២ហើយសម្រាប់ស្រុកពេជ្រាដា ដែលជួបគ្រោះខ្យល់កន្ត្រាក់ ព្រោះកាលអំឡុងខែមេសា ស្រុកពេជ្រាដាក៏ធ្លាប់រងគ្រោះខ្យល់កន្ត្រាក់ម្តងរួចមកហើយនឹងធ្វើឲ្យមានផ្ទះប្រជាពលរដ្ឋខូចខាតអស់ចំនួនជាង៦០ខ្នងផងដែរ៕
គឹម ចំរើន
