ភ្នំពេញ ៖ សម្តេចនាយករដ្ឋមន្ត្រី ហ៊ុន សែន បានស្នើតែងតាំងរដ្ឋលេខាធិការ៤រូបទៀតបន្ថែមពីលើសំណើកែសម្រួលនិង បំពេញបន្ថែមសមាសភាពនៃសមាជិករដ្ឋាភិបាលនៃការរុះរើមន្ត្រីដែលលោក បានអះអាងថាជាកំណែទម្រង់ដើម្បីបង្កើនប្រសិទ្ធភាពការងារ។
តាមលិខិតផ្ញើទៅ សម្តេច ហេង សំរិន ប្រធានរដ្ឋសភា កាលពីថ្ងៃទី២៥ ខែមីនា ឆ្នាំ២០១៦ មន្ត្រីទាំង៤រូប ដែលនឹងត្រូវបានដាក់បញ្ចូល ក្នុងសមាសភាពនៃការរុះរើគណៈរដ្ឋមន្ត្រី នឹងត្រូវតែងតាំងជារដ្ឋលេខាធិការនោះ រួមមានឯកឧត្តម អុី ឈាន ជារដ្ឋលេខាធិការក្រសួងការពារជាតិ ឯកឧត្តម លុយ ដាវីត ជារដ្ឋលេខាធិការក្រសួងការបរទេស ឯកឧត្តម ណៅ ធួក ជារដ្ឋលេខាធិការក្រសួងកសិកម្ម និងលោក លី ផល្លា ជារដ្ឋលេខាធិការក្រសួងកសិកម្ម។
ឯកឧត្តម អ៊ី ឈាន ត្រូវបានស្គាល់ថា ជាអតីតមេបញ្ជាការខ្មែរក្រហម និងជាអង្គរក្សរបស់ ប៉ុល ពត ហើយលោក ធ្លាប់ជាអភិបាលខេត្តប៉ៃលិន ហើយលោកបានជាប់ឆ្នោតជាប្រធានក្រុមប្រឹក្សាខេត្តប៉ៃលិន ក្នុងការបោះឆ្នោតថ្នាក់ក្រោមជាតិ។ ក្រោយមក លោក ត្រូវបានផ្ទេរមកកាន់តំណែងជានាយរងខុទ្ទកាល័យសម្តេចនាយករដ្ឋមន្ត្រី ហ៊ុន សែន រហូតមកទល់បច្ចុប្បន្ននេះ។
ឯកឧត្តម លុយ ដាវីត ជាជំនួយការផ្ទាល់ឯកឧត្តមឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស ដែលបានស្នើសុំលាលែងតំណែង។ ឯកឧត្តម ណៅ ធួក ជាអតីតអគ្គនាយកនៃអគ្គនាយកដ្ឋានជលផល និងបច្ចុប្បន្នជា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។ ចំណែកឯកឧត្តម លី ផល្លា អតីតអគ្គនាយកនៃអគ្គនាយកដ្ឋាន ចម្ការកៅស៊ូ និងបច្ចុប្បន្នជាអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
អគ្គលេខាធិការនៃរដ្ឋសភា ឯកឧត្តម ឡេង ប៉េងឡុង បានឲ្យដឹងដែរថា សំណើបន្ថែមសមាសភាពនេះ នឹងត្រូវបញ្ជូនទៅគណៈកម្មាធិការអចិន្ត្រៃយ៍សភា ពិនិត្យតារាងបេក្ខជន ដើម្បីដាក់ជូនសភាសម្រេចអនុម័តជាផ្លូវការនៅថ្ងៃទី៤ ខែមេសា។ លោកថា៖ «ក្នុងសំណើទាំងពីរលើក ដែលកំណត់ពីសមាសភាពមន្ត្រីរាជរដ្ឋាភិបាល ដើម្បីបោះឆ្នោតសុំសេចក្ដីទុកចិត្តនេះ រដ្ឋលេខាធិការមានសរុប ១៤នាក់ បន្ទាប់ពីឯកឧត្ដម អ៊ឹម សួស្តី អតីតប្រធាន គ.ជ.ប. ត្រូវបានដំឡើងតំណែងជាទេសរដ្ឋមន្ត្រី»។
បើតាមសំណើសុំ រុះរើគណៈរដ្ឋមន្ត្រីចុះថ្ងៃទី១៦ ខែមីនា ឧបនាយករដ្ឋមន្ត្រីចំនួន២រូប និងទេសរដ្ឋមន្ត្រី១រូប ត្រូវបានបញ្ចប់មុខងារ ចំណែករដ្ឋមន្ត្រី ៥រូបផ្សេងទៀត ត្រូវបានផ្លាស់ប្ដូរទៅដឹកនាំក្រសួងផ្សេងវិញ ខណៈដែលមន្ត្រីរដ្ឋាភិបាល ១០រូបផ្សេងទៀត ក៏ត្រូវបានតែងតាំងជារដ្ឋលេខាធិការរបស់ក្រសួងមួយចំនួន ចំណែកឯកឧត្តម អ៊ឹម សួស្តី ដែលគ្រោងតែងតាំងជារដ្ឋលេខាធិការក្រសួងមហាផ្ទៃ ត្រូវបានដំឡើងជាទេសរដ្ឋមន្ត្រី ទទួលបន្ទុកការពារពិសេសវិញ។ ជាមួយគ្នានេះ មុខតំណែងផ្សេងទៀតរបស់មន្ត្រីជាន់ខ្ពស់ខ្លះ ក៏ត្រូវបានផ្លាស់ប្ដូរ និងជំនួសដោយបេក្ខភាពថ្មីមួយចំនួនផងដែរ។
យ៉ាងណាមិញ លទ្ធផលនៃសមាសភាពរុះរើគណៈរដ្ឋមន្ត្រីនេះ ត្រូវបានគណបក្សប្រឆាំង និងអ្នកវិភាគកន្លងមកចាត់ទុកថា ជា
កំណែទម្រង់ធ្វើឡើងបែបសើៗ ដកដាក់មនុស្សដដែល មិនមានប្រព័ន្ធកែទម្រង់ច្បាស់លាស់ នាំឲ្យការងារមិនមានប្រសិទ្ធិ ឬឆ្លើយតបនឹងការចង់បានរបស់ប្រជាពលរដ្ឋនោះទេ។
ឯកឧត្តមនាយឧត្តសេនីយ៍ អ៊ី ឈាន ប្រជុំអនុវត្តប្រកាស់តម្លើងឋានន្តរសក្តិជានាយឧត្តមសេនីយ៍
នៅថ្ងៃទី៣ខែឧសភាឆ្នាំ២០១៦ក្រោមអធិបតីភាពឯកឧត្តមនាយឧត្តមសេនីយ៍ ទៀ បាញ់ បានបើកកិច្ចប្រជុំសេចក្តីព្រាងរបាយការណ៍ថវិការក្រសួងការពារជាតិ ឆ្នាំ២០១៧និងប្រកាស់មុខងារថ្នាករដ្ឋលេខាធិការក្រសួងការពារជាតិ៣ រូបគឺឯកឧត្តម អ៊ី ឈាន ជារដ្ឋលេខាធិការក្រសួងការពារជាតិឯកឧត្តម ជៀ អ៊ំ ជារដ្ឋលេខាធិការក្រសួងការពារជាតិត្រូវបានតម្លើងឋានន្តរសក្តិជានាយ ឧត្តមសេនីយ៍និងឯកឧត្តម ខូ ឈា អនុរដ្ឋលេខាធិការក្រសួងការពារជាតិនិងត្រូបានតម្លើងឋានន្តរសក្តិជា នាយឧតកតមសេនីយ៍ផងដែល៕
ហុក វិបុល
