លោក ឡង គីសឹង អភិបាលស្រុកសណ្តាន់បានដឹកនាំកំលាំងសមត្ថកិច្ចមួយក្រុម ឆ្មក់ចូលតំបន់ព្រៃឡង់ ច្រកតោល ដើម្បីចុះបង្ក្រាបការកាប់បំផ្លាញព្រៃនៅក្នុងតំបន់ព្រៃឡង់ ជាលទ្ធផល កំលាំងសមត្ថកិច្ចបង្ក្រាបបាន រណារ យន្តខ្នាតធំចំនួន 9 គ្រឿង និងកាឡេថង ដឹកឈើចំនួន 4 គ្រឿង ផ្ទុកដោយឈើប្រភេទដួងចែម និងឈើផ្តៀក ។
តាមរយៈការបង្ក្រាបនេះ លោកអភិបាលស្រុកបានមានប្រសាសន៌ថា លោកពិតជាមានការខកចិត្តយ៉ាងខ្លាំងចំពោះជំនាញរដ្ឋបាលព្រៃឈើ ដែលហាក់ដូចជាបក់ល្វើយ ក្នុងយន្តការ បង្ក្រាបបទល្មើសព្រៃឈើ ដែលបច្ចុប្បន្នជាប្រធានបទដ៌ក្តៅសំរាប់រាជរដ្ឋាភិបាលកម្ពុជា ឬក៌អស់លោកគិតថា ព្រៃឡង់នឹងជិតក្លាយខ្លួនជាព្រៃការពារ ហើយជាបន្ទុករបស់ក្រសួងបរិស្ថានគ្រប់គ្រងទៅវិញ?
សូមជំរាបថា រណារយន្តមានរាប់រយ នៅកណ្តាលព្រៃឡង់ ហើយសំលេងរណារយន្តលាន់រំពងព្រៃ កាឡេថង ហែរចូលព្រៃដូចហែរកឋិន ។ តែទោះជាយ៉ាងណា លោកអភិបាលស្រុកសណ្តាន់ថ្មីបានបេជ្ញាចិត្ត និងដាក់កំលាំងចុះបង្ក្រាប ជារៀងរហូត ហើយសុំអោយជំនាញទាំងអស់ចូលរួមសហការជាមួយអាជ្ញាធរស្រុកប្រកបដោយការទទួលខុសត្រូវ”ជំនាន់នេះត្រូវទទួលខុសត្រូវ ចំពោះជំនាន់ក្រោយ” ៕
