(ខេត្តកែប)៖ ប្រជាពលរដ្ឋរស់នៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប កំពុងផ្ទុះប្រតិកម្មយ៉ាងពុះកញ្ជ្រោល ខណៈបុគ្គលមួយគ្រួសារជួលរថយន្តដឹកដីទៅចាក់លុបស្រះទឹកដែលពួកគាត់ធ្លាប់ប្រើប្រាស់ជិត៣០ឆ្នាំ កន្លងមក។
ការផ្ទុះតវ៉ានេះបានកើតឡើងនៅព្រឹកថ្ងៃទី២៥ ខែសីហា ឆ្នាំ២០២០ ត្រង់ចំណុចស្រះទឹកមួយកន្លែង ស្ថិតក្នុងភូមិ ឃុំ ខាងលើ។
យោងតាមប្រភពព័ត៌មានពីប្រជាពលរដ្ឋក្នុងមូលដ្ឋានខាងលើបានឲ្យដឹងថា ស្រះទឹកនេះមានទំហំប្រមាណជាង៦០០ម៉ែត្រការ៉េ ដោយពួកគាត់បានប្រើប្រាស់រួមគ្នាចាប់តាំងពីឆ្នាំ១៩៩៤ រហូតមកទល់បច្ចុប្បន្ន តែពេលនេះត្រូវបានពលរដ្ឋមួយគ្រួសារហៅរថយន្តដឹកដីមកចាក់បំពេញដើម្បីក្រសោបយកធ្វើជាសម្បត្តិផ្ទាល់ខ្លួន។
ប្រភពដដែលបានបញ្ជាក់ផងដែរថា ដើមឡើយស្រះទឹកខាងលើ មុនដំបូងជាដីស្រែរបសប្រជាពលរដ្ឋឈ្មោះ ជួង ហាយ រស់នៅក្នុងភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប ដោយគាត់បានលក់ទៅឲ្យបងថ្លៃ នៅឆ្នាំ១៩៩៤ ដើម្បីជីកកាយយកអាចម៍ដីចាក់ក្នុងស្រែអំបិល។លុះក្រោយពីជីកកាយក្លាយជារណ្តៅស្រះដ៏ធំ បងថ្លៃក៏ប្រគល់ទៅឲ្យម្ចាស់ដី និងប្រជាពលរដ្ឋក្នុងភូមិវិញសម្រាប់យកទឹកក្នុងស្រះប្រើប្រាស់ទាំងអស់គ្នារហូតមកដល់សព្វថ្ងៃ។ស្រាប់តែពេលនេះដីឡើងថ្លៃក៏មានពលរដ្ឋមួយគ្រួសារបានជួលរថយន្តដឹកដីមកចាក់បំពេញស្រះ ដោយសំអាងលើឯកសារទិញលក់កាលពីឆ្នាំ១៩៩៤ ដើម្បីក្រសោបយកស្រះទឹកដែលពលរដ្ឋក្នុងភូមិធ្លាប់ប្រើប្រាស់តែម្តង។
ទាក់ទិននឹងការចាក់លុបស្រះទឹកបង្កឲ្យមានការតតាំងដាក់គ្នាយ៉ាងពុះកញ្ជ្រោល ស្ថិតក្នុងមូលដ្ឋានខាងលើនេះ គេហាក់ពុំទាន់ឃើញអាជ្ញាធរ ឬសមត្ថកិច្ចមូលដ្ឋាន ចុះមកធ្វើការសម្របសម្រួលបញ្ចប់វិវាទនៅឡើយិ។
ពាក់ព័ន្ធនឹងករណីលុបអណ្តូងខាងលើ លោកស្រី គឹម ចន្នី អភិបាលស្រុកដំណាក់ចង្អើរ បានប្រាប់អ្នកយកព័ត៌មានតាមបណ្តាញទូរស័ព្ទ នៅព្រឹកថ្ងៃទី២៥ ខែសីហា ឆ្នាំ២០២០ថា ស្រះទឹកដែលគេចាក់ដីលុបនេះ គេមានលិខិតទិញលក់ត្រឹមត្រូវ ដូច្នេះឲ្យគេចាក់លុបទៅក៏មិនអីដែរ….ដោយឡែកចំពោះអ្នកកាសែត ទាំងអស់បើទៅថតផ្តិតយករូបភាព សូមកុំញុះញង់ឲ្យគេឈ្លោះគ្នាឲ្យសោះ…!!?.។
ជុំវិញនឹងរឿងរ៉ាវខាងលើនេះដែរ អភិបាលខេត្តកែប លោក សោម ពិសិដ្ឋ បានប្រាប់កម្ពុជាថ្មី តាមទូរស័ព្ទ នៅព្រឹកថ្ងៃដដែលថា បើមានករណីលុបស្រះទឹកសាធារណៈពិតមែន លោកនឹងជំរុញទៅអាជ្ញាធរក្នុងតំបន់ឲ្យចុះទៅដោះស្រាយភ្លាមៗ ដោយមិនអាចទុកយូរបានឡើយ៕ សេង ណារិទ្ធ
