បាត់ដំបង ៖ កាលពីរសៀលថ្ងៃទី២១ ខែសីហា ឆ្នាំ២០២០ លោកវរសេនីយ៍ឯក ហុក ប៊ុនហ៊ត នាយការិយាល័យទី៣ យោធភូមិភាគទី៥ តំណាង លោកឧត្តមសេនីយ៍ទោ សេង ធារិន មេបញ្ជការរង នាយសេនាធិការ យោធភូមិភាគទី៥ បានចុះត្រួតពិនិត្យកម្លាំងត្រៀមអន្តរាគមន៍នៅមន្ទីពេទ្យយោធភូមិភាគទី៥ ដែលអនុវត្តន៍តាមបទបញ្ជារបស់ ឯកឧត្តម មេបញ្ជាការ កងទ័ពជើងគោក ស្ដីពីការត្រៀមកម្លាំងអន្តរាគមន៍ការពារ សន្តិសុខ សុវត្ថិភាពក្នុងឱកាសសងថ្ងៃឈប់សម្រាកបុណ្យចូលឆ្នាំថ្មី និងត្រៀមអន្តរាគមន៍សម្រាប់ដោះស្រាយយថាហេតុ។
លោកវរសេនីយ៍ឯក ហុក ប៊ុនហ៊ត បានលើកបញ្ជាក់ពីតួនាទីភារកិច្ចរបស់កងកម្លាំងអាវុធ ត្រូវតែគោរពអនុវត្តន៍រាល់បទបញ្ជារបស់ថ្នាក់លើដាក់ចុះ ស្មោះត្រង់ ការពារដាច់ខាតចំពោះជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ការពារឲ្យបាននូវសុខសន្តិភាព ស្ថិរភាពនយោបាយ សណ្តាប់ធ្នាប់សង្គមជាតិមាតុភូមិ ។
ក្នុងឱកាសនោះលោកវរសេនីយ៍ឯក ក៏បានអញ្ជើញចុះត្រួតពិនិត្យសួរសុខទុក្ខអ្នកជំងឺដែលកំពុងតែសម្រាកព្យាបាលនៅក្នុងមន្ទីរពេទ្យយោធភូមិភាគទី៥ ហើយបានធ្វើការកោតសរសើរដល់ លោកគ្រូ អ្នកគ្រូពេទ្យ របស់យោធភូមិភាគទី ៥ ដែលបានខ្នះខ្នែងយកចិត្តទុកដាក់ ជួយព្យាបាលជំងឺជូនកងកម្លាំងប្រដាប់អាវុធក៏ដូចជាប្រជាជនដែលមានជំងឺ មកសម្រាកនៅមន្ទីពេទ្យប្រកបដោយប្រសិទ្ធភាពខ្ពស់។
គួរជម្រាបជូនថា ពិធីបុណ្យចូលឆ្នាំប្រពៃណីជាតិខ្មែរ ដែលជាទូទៅតែងត្រូវបានប្រារព្ធធ្វើក្នងអំឡុងខែមេសារៀងរាល់ឆ្នាំ។ ដោយសារវិធានការទប់ស្កាត់ការឆ្លងរីករាលដាលនៃជំងឺកូវីដ-១៩ ក៏ត្រូវធ្វើការផ្អាកជាបណ្តោះអាសន្ន ដោយរងចាំពេលវេលាសមស្រប ដែលប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានកំណត់រយៈពេលឈប់សម្រាកសង៥ថ្ងៃ គឺចាប់ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០នេះ៕
