ខេត្តរតនគិរី ៖ បន្ទាប់ពីរាជរដ្ឋាភិបាលកំពុងមានការរឹតបន្តឹងដោយបង្កើតគណៈកម្មការថ្នាក់ជាតិអោយទប់ស្កាត់ និងបង្ក្រាបបទល្មើសព្រៃឈើនាំចេញល្មើសច្បាប់ និងសកម្មភាពកាប់បំផ្លាញនានានោះ គេសង្កេតឃើញថា បទល្មើសព្រៃឈើឆ្លងដែនមានសភាពស្ងប់ស្ងាត់ហើយ ដែរ ប៉ុន្តែសកម្មភាពកាប់បំផ្លាញនៅតែកើតមានជាបន្តបន្ទាប់ក្នុងដែនជម្រកសត្វព្រៃ និងព្រៃបំរុងរបស់រដ្ឋ។
នៅភូមិតាកុកច្រាយ ភូមិតាកុកព្នង ឃុំបខាំ ស្រុកអូរយ៉ាដាវ និងភូមិខ្វែង ឃុំយ៉ាទុង ស្រុកអូរយ៉ាដាវ គេឃើញមានកំពុងធ្វើសកម្មភាពកាប់បំផ្លាញព្រៃឈើយកដីធ្វើកម្មសិទ្ធផ្ទាល់ខ្លួនជាច្រើនហិកតា។
ពីសំណាក់អ្នកមានលុយនិងមានអំណាចកន្លែងខ្លះថែមទាំងមានប្រើគ្រឿងចក្រឈួសឆាយនិងក៏មានកន្លែងខ្លះប្រើរណាយន្តកាត់រំលំឈើប្រមូលដុតចោលដើម្បីបំបាត់ភ័ស្តុតាងទៀតផង់។
លោក ឃឹម ល័ក្ខ ជាអ្នកមើលការខុសត្រូវកន្លែងឈូសឆាយនោះបានបញ្ជាក់ថា ដីនេះគេបានទិញពីសហគមន៍ និងប្រជាពលរដ្ឋជាច្រើនអ្នកហើយមានការទទួលស្គាល់ពីអាជ្ញាធរឃុំទៀតផង។
លោក រម៉ាម ខេត មេឃុំបខាំបានឱ្យដឹងតាមទូរស័ព្ទថា អ្នកទិញចំណុចនោះ គេយកមកស៊ីញេចំនួនមួយដងដែរ តែលោកមិនព្រមស៊ីញ៉េទេ ទើបគេយកមកម្តងទៀត ដោយមានស្នាមផ្តិតមេដៃប្រជាពលរដ្ឋជាច្រើន ថែមទាំងមានហត្ថលេខារបស់នាយប៉ុស្តិ៍នគរបាលរដ្ឋបាលនោះដែរ ទើបលោកស៊ីញ៉េអោយគេតែម្តងទៅ។
លោកបន្តថា ដីព្រៃចំណុចនោះស្ថិតនៅជាប់ព្រំប្រទល់ចំនួន៣ភូមិ គឺភូមិតាកុកព្នង ភូមិតាកុកច្រាយ និងភូមិខ្វែងឃុំយ៉ាទុងស្រុកអូរយាដាវ។
ដោយ លោក រចំវីន មេឃុំយ៉ាងទុងថា បញ្ហានេះលោកមិនបានដឹងទេតំបន់នោះនៅឆ្ងាយពេក ចាំលោកអោយគេចុះទៅអង្កេតមើលបន្ត។
លោក ឡេង យុគ នាយផ្នែករដ្ឋបាលព្រៃឈើបកែវ បញ្ជាក់ប្រាប់ក្រុមអ្នកកាសែតថា ករណីនេះ លោកនឹងនាំកម្លាំងចុះទៅមើលនៅព្រឹកថ្ងៃទី០២ ខែកុម្ភៈ នេះហើយ ។ ប៉ន្តែលទ្ធផលយ៉ាងណានោះ គឺមិនទាន់ដឹងនៅឡើយ រហូតមកដល់ពេលនេះ ។
លោក ម៉ា វិចិត្រ អភិបាលស្រុកអូរយ៉ាដាវបានអោយដឹងថា ចំណុចដែលគេឈួសឆាយដីព្រៃនោះ លោកធ្វើការហាមឃាត់ជាច្រើនលើកមកហើយ តែគេនៅតែលួចធ្វើសកម្មភាពទៀត ដដែល កាលពីថ្ងៃទី៣០ ខែមករា នេះ លោកបាននាំកម្លាំងចុះមើលដែរតែពេលនោះ មិនទាន់ដឹងថា ម្ចាស់ដីនោះជាអ្នកណាពិតប្រាកដនៅឡើយទេ។
សកម្មភាពយ៉ាងអនាធិបតេយ្យ មិនត្រឹមតែលួចកាប់ព្រៃរានយកដីធ្វើជាកម្មសិទ្ធិ ពីសំណាក់អ្នកមានលុយប៉ុណ្ណោះទេ គឺនៅមានការកាប់និងដឹកជញ្ជូនជន្លង់ម្រេចយ៉ាងអនាធិបតេយ្យថែមទៀតផងដែរ នៅលើទឹកដីស្រុកទាំងបីនេះ គឺស្រុកលំផាត់ ស្រុកអូរយាដាវ និងស្រុកបកែវនេះតែម្តង។ ភាគច្រើន គេតែងតែប្រើរូបភាពខ្ចីដៃប្រជាពលរដ្ឋអោយចូលកាប់ជាលេសថា ប្រជាពលរដ្ឋកាប់ធ្វើចំការតិចតួច ជាលក្ខណៈគ្រួសារ តែធាតុពិត គឺឈ្មួញនៅពីក្រោយ៕
សន ចាន់ឌី
