មណ្ឌលគិរី៖ ក្មេងប្រុសសិស្សសាលាម្នាក់ត្រូវបែកក្បាលស្លាប់ ហើយម្នាក់ទៀត រងរបូសធ្ងន់ ក្រោយរងនូវការបុកពីរថយន្តកែឆ្នៃយ៉ាងពេញទំហឹង ។
ហេតុការណ៍នេះបានកើតឡើងនាវេលាម៉ោងប្រមាណជា៩និង៣០នាទីព្រឹក ថ្ងៃ៣១មករា២០១៦ ត្រង់ចំនុចផ្លូវបំបែកចូលភូមិទី០៤ ស្ថិតក្នុងភូមិពូទិល ឃុំប៊ូស្រា ស្រុកពេជ្រាដា ខេត្តមណ្ឌលគិរី។
អ្នកឃើញហេតុការណ៍ បានអោយដឹងថាមុនកើតហេតុគេឃើញ ក្មេងសិស្សសាលាទាំងពីរបានជិះម៉ូតូឌុបគ្នាចេញពីផ្ទះ ហើយឡើងមកដល់លើផ្លូវ ក៏ត្រូវគោយន្តដឹកដំឡូងមី១គ្រឿងបោះពួយពីទិសខាងកើត បុកពេញទំហឹង និងកិន តែម្តង ។ ប៉ុន្តែអ្នកបើកបរមិនបានឈប់នោះទេ ក៏ព្យាយាមបើកគេច រហូតដល់ចំនុចអូរប្លាយ ស្ថិតក្នុងភូមិស្រែអំពូម ឃុំស្រែអំពូម ស្រុកពេជ្រាដា ក៏ឈប់លាងកង់រថយន្ត ដែលប្រឡាក់ឈាម ដើម្បីបំភ័ន្ទភ្នែកសមត្ថកិច្ច ហើយក៏ត្រូវសមត្ថកិច្ចចាប់ខ្លួនតែម្តង ។
នគរបាលនៃអធិការដ្ឋានស្រុកពេជ្រាដា បានអោយដឹងថា ក្នុងករណីគ្រោះថ្នាក់ចរាចរណ៍នេះ បានបង្កអោយក្មេងសិស្សសាលាម្នាក់បានស្លាប់ និងម្នាក់ទៀតកំពុងត្រូវជួយសង្គ្រោះនៅមន្ទីរពេទ្យក្រុងភ្នំពេញ ។
មន្ត្រីរូបនោះបន្តថា ជនរងគ្រោះដែលបានស្លាប់មានឈ្មោះ រ័ត្ន ហេ ភេទប្រុស អាយុ១២ឆ្នាំ ជនជាតិខ្មែរ ហើយម្នាក់ដែលរងរបួសធ្ងន់មានឈ្មោះ នីន រាជ ភេទប្រុស អាយុ១៣ឆ្នាំ ជិះម៉ូតូឌុបគ្នាម៉ាកវេវ មានទីលំនៅក្បែរកន្លែងកើតហេតុ ។ ចំណែកអ្នកបើកបរមានឈ្មោះ សេង វណ្ណា ភេទប្រុស អាយុ២៧ឆ្នាំ មានទីលំនៅភូមិប៊ូស្រា ឃុំប៊ូស្រា ស្រុកពេជ្រា ។ បច្ចុប្បន្ននគរបាល បានចាប់ខ្លួនជនបង្កនិងបញ្ជួនទៅកាន់ស្នងការដ្ឋាននគរបាលខេត្ត ដើម្បីកសាងសំណុំរឿង ចាត់ការតាមនិតិវិធី។
សូមបញ្ជាក់ថា បច្ចុប្បន្នយាន្តយន្តខុស បច្ចេកទេសនៅតែមានចំនួនច្រើនដដែល នៅក្នុងខេត្តម ណ្ឌលគិរីនេះ ហើយវាបានបង្ករអោយមានករណីគ្រោះថ្នាក់ចរាចរណ៍កើនឡើង និងបានសំលាប់មនុស្សជារឿយៗផងដែរ៕
ដោយ ៖ ហេង ចាន់ណុប
