(ខេត្តកំពត)៖ នៅរសៀល ថ្ងៃអង្គារ ០៩រោច ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៧ ខែមីនា ឆ្នាំ២០២០ ពន្ធនាគារខេត្តកំពត បានប្រារព្ធពិធីប្រកាសតែងតាំងមុខតំណែង និងបំពាក់ឋានន្តរសកិ្ត ជូនមន្ត្រីពន្ធនាគារខេត្តកំពត ចំនួន៣៣ នាក់ ក្នុងនោះមានតំណែង អនុប្រធានពន្ធនាគារ ចំនួួន០១រូប និងបំពាក់ឋានន្តរសក្ដិចំនួួន ៣២រូប ស្រី ០៤រូប ក្រោមអធិបតីភាព លោកឧត្តមអគ្គានុរក្សថ្នាក់លេខ១ ម៉ៅ ណំ អគ្គនាយករង តំណាងដ៏ខ្ពង់ខ្ពស់ ឯកឧត្តម សនិ្តបណ្ឌិត អគ្គនាយកនៃអគ្គនាយដ្ឋានពន្ធនាគារ និង លោក សេង សិរីបុត្រ អភិបាលរងខេត្ត តំណាងដ៏ខ្ពង់ខ្ពស់ លោក ជាវ តាយ អភិបាល នៃគណៈអភិបាលខេត្ត។
កម្មវិធីនារសៀលនេះមានការអញ្ជើញចូលរួមពី លោកព្រះរាជអាជ្ញាអមសាលាដំបូងខេត្ត តំណាង សាលាដំបូងខេត្ត លោកមេបព្ជាការរងកងរាជអាវុធហត្ថខេត្ត និងមន្ត្រីពន្ធនាគារខេត្តកំពតសរុបចំនួន ៦៥ នាក់។
បន្ទាប់ពីស្តាប់នូវរបាយការណ៍ស្វាគមន៍របស់អង្គភាពរួចមក លោក សេង សេរីបុត្រ អភិបាលរងខេត្តកំពត ក៏បានលើកឡើងពីវឌ្ឍនភាព និងកិច្ចខិតខំប្រឹងប្រែងអស់ពីកម្លាំងកាយ-ចិត្ត កម្លាំងស្មារតី ការលះបង់ខ្ពស់របស់អង្គភាព ពិសេសមន្ត្រីពន្ធនាគារក្នុងខេត្តកំពតទាំងមូលដែលកន្លងមកបានបំពេញកាតព្វកិច្ចបានល្អប្រសើរ។
ជាមួយនឹងឱកាសនោះដែរ លោកឧត្តមអគ្គានុរក្សថ្នាក់កេខ១ ម៉ៅ ណំ ក៏បានថ្លែងការកោតសរសើរ និងវាយតម្លៃខ្ពស់ ចំពោះការខិតខំពង្រឹង និងអនុវត្តការងារបានល្អប្រសើរពីសំណាក់មន្ត្រីពន្ធនាគារគ្រប់ជាន់ថ្នាក់ និងការយកចិត្តទុកដាក់អនុវត្តតួនាទី ភារកិច្ចបានយ៉ាងល្អ ដោយធ្វើឱ្យអង្គភាពមានភាពរីកចម្រើនជាបន្តបន្ទាប់៕ សេង ណារិទ្ធ
