(ខេត្តកែប)៖ នៅព្រឹកថ្ងៃអាទិត្យ ទី២៣ ខែកុម្ភៈ ឆ្នាំ២០២០ រដ្ឋបាលខេត្តកែប បានសហការសម្របសម្រួលជាមួយសហព័ន្ធអត្តពលកម្មអ្នកស្ម័គ្រចិត្ត រៀបចំព្រឹត្តការណ៍រត់ប្រណាំងពាក់កណ្តាលម៉ារ៉ាតុង(Kep Haft Marathon) ដែលទិវានេះត្រូវបានកំណត់ទីតាំងស្ថិតចំណុចមុខសួនច្បារសាលាខេត្តកែប។
ទិវារត់ប្រណាំងពាក់កណ្តាលម៉ារ៉ាតុងនេះ ត្រូវបានជ្រើសរើសតាម៣ដំណាក់កាល រួមមាន៖១-ចំងាយ ៥គីឡូម៉ែត្រ មានកីឡាចូលរួម ចំនួន ៧៥នាក់ ,២-ចំងាយ១០គីឡូម៉ែត្រ មានកីឡាករចូលរួមចំនួន ៣៣នាក់ និងទី៣- ចំងាយ២១គីឡូម៉ែត្រ មានកីឡាករ ចូលរួមចំនួន ២៧នាក់ ដែលមកពី ០៦ប្រទេស ក្រោមការអញ្ជើញចូលរួមពីសំណាក់ លោក កែន សត្ថា អភិបាល នៃគណៈអភិបាលខេត្តកែប។
ដំណាក់កាល នៃការរត់ប្រណាំងនេះ កីឡាអត្តពលកម្មត្រូវបានបញ្ចេញអស់សមត្ថភាពដើម្បីដណ្តើមយកពានរង្វាន់ជ័យលាភី ហើយក្នុងឱកាសរត់ប្រណាំងនេះ កីឡាករដែលទទួលចំណាត់ថ្នាក់លេខ១ ត្រូវបានគណៈអធិបតីផ្តល់រង្វាន់នូវថវិកាចំនួន ៣០០ដុល្លារ ពានរង្វាន់កេខ២ ទទួលបានថវិកាចំនួន ២០០ដុល្លារ និងពានរង្វាន់លេខ៣ ត្រូវបានឧបត្ថម្ភនូវថវិកាចំនួន១០០ដុល្លារ ផងដែរ។
សូមជម្រាបថា ការរៀបចំព្រឹត្តិការណ៍រត់ប្រណាំងពាក់កណ្តាលម៉ារ៉ាតុងឆ្នាំ២០២០ជាលក្ខណៈអន្តរជាតិនេះ ជាផ្នែកមួយជំរុញដល់វិស័យកីឡាអត្ថពលកម្មរបស់យើងឱ្យកាន់តែមានភាពរស់រវើក ពិសេសជួយបង្កើនឋាមពលរបស់យើងឱ្យមានកម្លាំងខ្លាំងក្លា មានសុខភាពល្អ និងមានជីវិតស្រស់ស្រាយ ហើយនេះជាលើកទី១ដែលរដ្ឋបាលខេត្តកែប បានសហការសម្របសម្រួល ជាមួយសហព័ន្ធអត្តពលកម្មដើម្បីរៀបចំនូវព្រឹត្តិការណ៍នេះឡើងដើម្បីជំរុញដល់វិស័យកីឡាកម្ពុជាឱ្យកាន់តែមានភាពរស់រវើក៕ សេង ណារិទ្ធ
