(ខេត្តកំពត)៖ មហាជនកំពុងសង្ស័យថា មន្ត្រីប៉ូលិសពាក់ស័ក្តិ៤កន្លះ ឈ្មោះ កែវ មុន្នី ហៅផុក មានតួនាទីប្រធានការិយាល័យសន្តិសុខឯកជន នៃស្នងការដ្ឋាននគរបាលខេត្តកំពត កំពុងរត់ការខ្វែងដៃខ្វែងជើងដោយពឹងពាក់លើស្ថាប័នច្បាប់ ដើម្បីប្តឹងយកដីរបស់ប្រជាពលរដ្ឋមួយគ្រួសារ ដែលរស់នៅក្នុងភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត។
ទាក់ទិននឹងករណីនេះ បើតាមការបញ្ជាក់ពីភាគីម្ចាស់ដី ឈ្មោះ ឆាយ ផាន់នី ហៅនាង រស់នៅក្នុងភូមិ ឃុំ ខាងលើ បានរៀបរាប់ប្រាប់អ្នកយកពត៌មានថា ដីដែលលោកប៉ូលិសថ្លើមធំ ឈ្មោះ កែវ មុន្នី ហៅផុក កំពុងប្តឹងទាមទារយកនេះមានទំហំដី៥ហិកតា ស្ថិតជាប់នឹងជើងភ្នំបូកគោ ក្នុងភូមិចង្ហោន ឃុំព្រែកត្នោត ស្រុកទឹកឈូ ខេត្តកំពត។
លោក ឆាយ ផាន់នី ហៅនាង បានបញ្ជាក់ផងដែរថា ដីនេះគាត់រស់នៅអាស្រ័យផលតាំងពីឆ្នាំ១៩៩៨មកម្លេះ ហើយកាលណោះគាត់បានទិញបន្តពីឈ្មោះ លឹម មូជ ដោយការទិញដីនេះក៏ទទួលស្គាល់ពីអាជ្ញាធរមូលដ្ឋានផងដែរ។ម្ចាស់ដីបានបន្តថា គាត់រស់នៅអាស្រ័យផលលើដីនេះ២១ឆ្នាំមកហើយ ពុំដែលមានអ្នកណាមកបង្កបញ្ហាឡើយ ហើយឈ្មោះកែវ មុន្នីហៅផុកនេះក៏មានដីជាប់ព្រំប្រទល់គ្នាជាមួយដីរបស់គាត់ដែរនៅពេលនោះពួកគាត់ទាំងពីរនាក់ក៏មិនដែលមានពាក្យសំដីធំតូចដាក់គ្នានោះទេសូម្បីតែដីរបស់ ឈ្មោះ កែវ មុន្នី ហៅផុក ដែលទិញពីប្រជាជនដែលមានព្រំប្រទល់ជាប់គ្នានេះក៏សុទ្ឋតែព្រៃទាំងអស់ហើយពេលនោះបានជួលរូបគាត់ឱ្យជួយឈូសឆាយទៀតផង ហើយរស់នៅជិតគ្នាល្អូកល្អើន គ្មានដែលទំនាស់គ្នារឿងដីធ្លីដែលមានព្រំជាប់គ្នានោះឡើយ ពិសេសជាងនេះទៅទៀតលោកកែវ មុន្នី ហៅផុក កាលពីមុនឡើយរាប់អានគ្នាហូបបាយហូបទឹកតែជាមួយគាត់ទេ។ ស្រាប់តែពេលនេះពេលហាងឆេងដីមានតម្លៃ ស្រាប់តែ លោកប៉ូលិសស័ក្តិ៤កន្លះ ឈ្មោះ កែវ មុន្នី ហៅផុក មិនដឹងសំអាងទៅលើអ្វីបែរជាមកប្តឹងទាមទារយកដីគាត់ ដែលមានទំហំ៥ហិកតាមានព្រំប្រទល់ជាប់គ្នាដើម្បីយកធ្វើជាសម្បត្តិផ្ទាល់ខ្លួនទៅវិញ។
លោក ឆាយ ផាន់នី បានរៀបរាប់ទៀតថា ចាប់តាំងពីមានករណីប្តឹងរំលោភយកដីនេះ ក្រុមគ្រួសាររបស់គាត់ទាំងមូលមិនហ៊ានទៅដេកនៅផ្ទះចំណុចដីទំនាស់នេះទេដោយសារខ្លាចគេមកកាប់សម្លាប់បំបិតមាត់។ជាមួយនឹងការរំលោភបំពាននេះ លោក ឆាយ ផាន់នី ហៅនាង ក៏បានលើកម្រាមដៃដប់ អំពាវនាវដល់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សូមមេត្តាជួយរកយុត្តិធម៌ជូនដល់ក្រុមគ្រួសារគាត់ដែលជាប្រពលរដ្ឋស្លូតត្រង់កំពុងរងការរំលោភបំពានពីសំណាក់ឈ្មោះ កែវ មុន្នី ហៅផុក ជាមន្ត្រីប៉ូលិសនេះផង។
ពាក់ព័ន្ធនឹងដីទំនាស់នេះដែរ លោក គង់ ប៊ុនរា មេឃុំព្រែកត្នោត បានបញ្ជាក់ប្រាប់អ្នកយកព័ត៌មាននៅព្រឹកថ្ងៃទី៣០ ខែមករា ឆ្នាំ២០២០នេះថា ដីដែលកំពុងទំនាស់នេះគឺដីស្ថិតក្នុងតំបន់វិនិច្ឆ័យ ហើយលោកពិតជាទទួលស្គាល់ថា ឈ្មោះ ឆាយ ផាន់នី ហៅនាង ព្រមទាំងក្រុមគ្រួសារបានរស់នៅនិងអាស្រ័យផលនៅលើដីនេះប្រាកដមែន ប៉ុន្តែក្នុងសាលាកបត្រ (០១) មានដីទំហំតែជាង១ហិកតាប៉ុណ្ណោះ តែគាត់ចេះតែកាប់វាទយកដើម្បីអាស្រ័យផលចាប់ពីឆ្នាំ១៩៩៨រហូតមកដល់បច្ចុប្បន្ន បានរហូតបានទំហំសរុប៥ហិកតា។
សូមបញ្ជាក់ថា កាលពីថ្ងៃទី២១ ខែមករា ឆ្នាំ២០២០ លោក អាំង សុភា ចៅក្រមសាលាដំបូងខេត្តកំពត បានដឹកនាំកម្លាំងជំនាញចុះទៅពិនិត្យនិងវាស់វែងដីទំនាស់មួយកន្លែងខាងលើដើម្បីរកទំហំពិតប្រាកដ ហើយការចុះមកពិនិត្យនេះ ហើយបើតាមលោកចៅក្រមរូបនេះបានបញ្ជាក់ប្រាប់អ្នកសារពត៌មានយើងថា ការចុះពិនិត្យនេះគឺបានធ្វើឡើង’ទៅតាមបណ្តឹងរបស់ ឈ្មោះ កែវ មុន្នី ហៅផុក ជាមន្ត្រីប៉ូលិសស័ក្តិ៤កន្លះ ដែលបានប្តឹងទៅលោកឲ្យជួយអន្តរាគមន៍។
ដោយឡែកនៅរសៀលថ្ងៃទី៣០ខែមករាឆ្នាំ២០២០នេះ លោកអាំង សុភា ចៅក្រមសាលាដំបូងខេត្តកំពតបានប្រាប់អ្នកព័ត៌មានថា បើដីទំនាស់នេះស្ថិតក្នុងតំបន់វិនិច្ឆ័យ លោកចាំទទួលសំណុំឯកសារពីមន្ត្ត្រីជំនាញសិនរួចហើយត្រូវបង្វែរសំណុំរឿងនេះចូលទៅគណៈកម្មការវិវាទដីធ្លីថ្នាក់ខេត្ត ជាអ្នកសម្របសម្រួលនិងដោះស្រាយជូនភាគីវិវាទខាងលើវិញ។
លោកចៅក្រមក៏បានមានប្រសាសន៍បន្តថា
យកល្អគួរតែភាគីទាំងពីរធ្វើការសម្របសម្រួលគ្នាដោយសន្តិវិធីទៅល្អជាងពីព្រោះដែលទំនាស់គ្នានេះគឺគ្មានប្លង់កម្មសិទ្ឋនោះទេជាដីក្នុងតំបន់វិនិច្ឆ័យដូចគ្នាគ្រាន់តែភាគីទំនាស់ទាំងពីរមករស់នៅអាស្រយ័ផលជាយូរឆ្នាំដូចគ្នាតែប៉ុណ្ណោះ៕ សេង ណារិទ្ធ
