(ខេត្តកែប)៖ មានថ្ងៃ៧មករា ទើបមានសុខសន្តិភាព និងមានការអភិវឌ្ឍន៍ដូចសព្វថ្ងៃ ដែលធ្វើឱ្យប្រទេសយើងមានភាពរីកចម្រើន សម្បូរសប្បាយ។
នេះជាប្រសាសន៍របស់ លោក កែន សត្ថា អភិបាល នៃគណៈអភិបាលខេត្តកែប ថ្លែងក្នុងឱកាសប្រារព្ធខួបលើកទី៤១ នៃទិវាជ័យជម្នះ៧មករា នៅសួនច្បារសម្តេចតេជោ ហ៊ុនសែន វិមានឯករាជ្យខេត្តកែប នាព្រឹកថ្ងៃទី០៧ ខែមករា ឆ្នាំ២០២០ ដោយទិវានេះ ក៏ស្ថិតក្រោមវត្តមាន លោក ស៊ឹម ស៊ីថា ប្រតិភូរាជរដ្ឋាភិបាល តំណាងឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម លោក សំ សារីន ប្រធានក្រុមប្រឹក្សាខេត្តតំណាងរាស្ត្រមណ្ឌលខេត្តកែប និងមន្ត្រីរាជការ កងកម្លាំងប្រដាប់អាវុធទាំងបី សិស្សានុសិស្ស យុវជនគ្រប់ប្រភេទ និងបងប្អូនប្រជាពលរដ្ឋសរុបប្រមាណចំនួន ៣,០០០នាក់។
លោក កែន សត្ថា បានថ្លែងទៀតថា ការប្រារព្ធមិទ្ទិញអបអរសាទរថ្ងៃជ័យជម្នះ ៧ មករា ថ្ងៃនេះ គឺបង្ហាញឱ្យឃើញនូវ ស្មារតីចងចាំជានិច្ច ចំពោះគុណូបការៈដ៏ឧត្តុង្គឧត្តមរបស់វីរកម្មាភិបាល យុទ្ធជនយុទ្ធនារី នៃរណសិរ្សសាមគ្គីសង្គ្រោះជាតិកម្ពុជាដែល បានធ្វើការលះបង់យ៉ាងធំធេង ក្នុងការប្រយុទ្ធផ្តួលរំលំ របបប្រល័យពូជសាសន៍ ប៉ុល ពត និងបាននាំមកនូវការបង្រួបបង្រួមជាតិ និងការជួបជុំគ្រួសារខ្មែរឡើងវិញ ជាពិសេសការពារការរស់ឡើងវិញ នៃរបបដ៏អាក្រក់នេះ។
ក្នុងការរម្លឹកខួប នៃការបញ្ចប់របប ខ្មែរក្រហម នៅថ្ងៃអង្គារនេះ គឺជាថ្ងៃ ៧ មករា ទិវាជ័យជម្នះលើការផ្តួលរំលំរបបកម្ពុជាប្រជាធិបតេយ្យ។ ៧មករា គឺជាទិវាជាតិជាប្រវត្តិសាស្ត្រ ដែលប្រជាពលរដ្ឋទូទៅស្រលាញ់សន្តិភាពចាត់ទុកជាកំណើតទី២ របស់ខ្លួនរួចមកហើយដែរ។
ក្នុងអំឡុងនៃការដឹកនាំប្រទេសកន្លងមក រដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជា មានសម្តេចអគ្គមហាសេនាបតីតេជោ ហ៊ុន សែន ជាប្រមុខ បានខិតខំប្រឹងប្រែងយ៉ាងខ្លាំង ក្នុងការស្តារសន្តិភាព ស្ថិរភាពសង្គមកម្ពុជាទើបប្រទេសជាតិ មានសុខសន្តិភាព និងមានការអភិវឌ្ឍន៍ដូចសព្វថ្ងៃនេះ៕ សេង ណារិទ្ធ
