(ខេត្តកែប)៖ គិតត្រឹមវេលាម៉ោង៩ព្រឹក ថ្ងៃទី០៤ ខែមករា ឆ្នាំ២០២០នេះ ក្រុមអន្តរាគមន៍ សង្គ្រោះបន្ទាន់បានរុករកនិងជួយសង្គ្រោះកម្មករសំណង់ក្នុងអគារបាក់បែកបានចំនួន២៣នាក់ ក្នុងចំណោមនោះមាន៥នាក់បានស្លាប់បាត់បង់ជីវិតគួរឱ្យសោកស្តាយ ។ ហើយនៅពេលដំណាលគ្នានេះ ក្រុមសង្គ្រោះកំពុងកាត់ផ្តាច់បេតុងនិងសរសៃដែកដើម្បីយកសាកសព២នាក់ទៀតដែលកំពុងកៀបជាប់នៅក្នុងអគារបាក់បែក។
ទាក់ទិននឹងការបាក់រលំសំណង់អគារផ្ទះសំណាក់ដ៏ផុយស្រួយបែបនេះ បើយោងតាមការសន្និដ្ឋានពីក្រុមវិស្វករនិងមន្ត្រីជំនាញបានអះអាងថា មកពីការសាងសង់គ្មានស្តង់ដារបច្ចេកទេសត្រឹមត្រូវនិងការធ្វេសប្រហែស ពោលគឺការចាក់គ្រឹះសសរមិនបានរឹងមាំ គួបផ្សំនឹងការប្រើសរសៃដែកទ្របេតុងតូចពេកមិនស្របតាមបទដ្ឋានបច្ចេកទេសនៃសំណង់ និងប្រើថ្មក្រួសតិច ការបន្ថយគុណភាពស៊ីម៉ងត៍ ទើបសសរមិនអាចទ្រទម្ងន់បេតុងដែលមាន៦ឬ៧ជាន់បែបនេះ។
លោក វ៉ៅ សុខា ប្រធានមន្ទីររៀបចំ ដែនដីនគរូបនីយកម្ម សំណង់ និងសុរិយោដីខេត្តកែប បានបញ្ជាក់ថា អគារផ្ទះសំណាក់នេះ មុនពេលសាងសង់ម្ចាស់ផ្ទះបានសុំច្បាប់អនុញាត្តពីមន្ទីរជំនាញយ៉ាងត្រឹមត្រូវ ដោយខណៈនោះមន្ត្រីជំនាញក៏បានចុះត្រួតពិនិត្យផ្ទាល់ដើម្បីណែនាំឱ្យម្ចាស់អគារនេះសាងសង់ទៅតាមលក្ខណៈបច្ចេកទេស ប៉ុន្តែម្ចាស់ផ្ទះបែរជាមានការធ្វេសប្រហែស ដោយពេលសាងសង់បែរជាប្រើសរសៃដែកតូចៗ និងប្រើបេតុងខ្វះគុណភាព ដូចជាការប្រើថ្មតិច ខ្សាច់ច្រើន ប្រើស៊ីម៉ងត៍តិច ទើបបណ្តាលឱ្យអគារងាយបាក់ស្រុតបែបនេះ។
ដោយឡែក បើតាមការបង្ហើបពីមន្ត្រីជំនាញបានឱ្យដឹងថា ម្ចាស់សំណង់អគារដែលបាក់ស្រុតនេះ ជាអនិកជនមកពីប្រទេសបារាំង ហើយគាត់ក៏ជាវិស្វករម្នាក់ដោយបានចេញគំនូសប្លង់ និងជ្វើគម្រោងសាងសង់ដោយខ្លួនឯង គ្រាន់តែហៅមេជាងមកឱ្យម៉ៅការបន្តប៉ុណ្ណោះ ហើយម្ចាស់សំណង់អគារនេះត្រូវបានសមត្ថកិច្ចឃាត់ខ្លួន បន្ទាប់ពីអគារបាក់ស្រុតភ្លាមៗ។
សូមជម្រាបថា អគារដែលបាក់ស្រុតបណ្តាលឱ្យកម្មករសំណង់ជាច្រើននាក់ស្លាប់ និងរបួសនេះ ស្ថិតក្នុងភូមិកែប សង្កាត់កែប ក្រុងកែប ខេត្តកែប ។ ចំពោះចំនួនមនុស្ស ដែលជាប់ក្នុងគំនរបាក់បែកមិនទាន់បានកំណត់តួលេខជាក់លាក់នៅឡើយ ដោយប្រភពខ្លះថា មានកម្មករជាង៣០នាក់ ប្រភពខ្លះអះអាងថាមានជាង៤០នាក់ ប៉ុន្តែរហូតមកទល់វេលាម៉ោង១១ព្រឹក ថ្ងៃទី០៤ ខែមករា ឆ្នាំ២០២០នេះ កម្មករសំណង់ដែលបានរកឃើញសរុបមានចំនួន២៥នាក់ ក្នុងនោះស្លាប់៧នាក់ (២ នាក់កំពុងកាយយក) ៕ សេង ណារិទ្ធ
