(ខេត្តកំពត)៖ បើយើងបានក្រឡេកមើលឃើញទិដ្ឋភាពភ្នំជាច្រើន នៅក្នុងភូមិសាស្ត្រខេត្តកំពត ត្រូវគេជីកកកាយយកអាចម៍ដី និងថ្មធ្វើអាជីកម្ម ស្ទើតែបាត់រូបរាងបែបនេះ យើងពិតជាមានចិត្តសង្វេគខ្លាំងបំផុត ហើយចំពោះករណីការជីកកាយរំលើងយកអាចម៍ដីស្ទើដល់កំពូលភ្នំនេះ គេមិនទាន់ដឹងថា ក្រុមអ្នកធ្វើអាវកម្មមានអាជ្ញាប័ណ្ណឬគ្មាននោះឡើយ។
តាមប្រភពព័ត៌មានពីពលរដ្ឋរស់នៅក្នុងទីរួមខេត្តកំពតបានលួចទម្លាយថា ភ្នំដែលកំពុងរងការជីកកាយយកអាចម៍ដី និងថ្មយ៉ាងពេញបន្ទុកនោះ ភាគច្រើនគឺនៅមិនឆ្ងាយពីទីប្រជុំជនខេត្តកំពតនោះឡើយ ដូចជាភ្នំជប់ ដែលស្ថិតក្នុងភូមិសាស្ត្រក្រុងកំពត និងភ្នំត្នោត ស្ថិតនៅឃុំថ្មី ស្រុកទឹកឈូ ខេត្តកំពត។
ក្រៅពីភ្នំដែលបានបង្ហាញខាងលើ ក៏មានភ្នំមួយទៀតដែលគេកំពុងធ្វើអាជីវកម្មយកអាចម៍ដីដឹកជញ្ជូនលក់ដូចគ្នាដែរ គឺភ្នំកកេះប៉ែកខាងត្បូងដោយភ្នំកកេះនេះស្ថិតក្នុងភូមិអូរតូច សង្កាត់អណ្ដូងខ្មែរ ក្រុងកំពត ហើយក៏មានភ្នំមួយទៀតមានឈ្មោះថាភ្នំស ភ្នំនេះស្ថិតតក្នុងភូមិព្រៃឃ្មុំ ឃុំព្រៃឃ្មុំ ស្រុកទឹកឈូ ខេត្តកំពត។
ប្រភពដដែលបានបញ្ជាក់ផងដែរថា ភ្នំដែលគេកំពុងជីកកកាយស្ទីររលាយនេះ ត្រូវគេកាយយកអាចម៍ដី និងថ្មធ្វើអាជីវកម្មយ៉ាងពេញបន្ទុក ហើយក៏មិនដែលឃើញផ្នែកជំនាញណាម្នាក់ទៅត្រួតពិនិត្យឡើយ បើទោះជាពេលនេះភ្នំនិមួយៗត្រូវគេប្រើគ្រឿងចក្រជីកកាយស្ទើបាត់រូបរាងយ៉ាងណាម៏ដោយ។
ប្រភពច្បាស់ការណ៍ខាងលើបានបង្ហើបឱ្យដឹងទៀតថា បច្ចុប្បន្នភ្នំជប់និងភ្នំត្នោតមានការដ្ឋានចំនួន៣កន្លែង គឺការដ្ឋានដឹកដីមួយកន្លែងនិងការដ្ឋានបំផ្ទុះយកថ្មមានពីរកន្លែង ប៉ុន្តែគេមិនដឹងជាក្រុមហ៊ុនណាខ្លះទេ ដោយការដ្ឋានទាំងបីនេះបាននិងកំពុងតែធ្វើសកម្មភាពជីកកាយយកអាចម៍ដី និងថ្ម ស្ទើរលាយភ្នំអស់ទៅហើយ។
ទាក់ទិននឹងការជីកយកអាចម៍ដីចំណុចភ្នំជប់ និងភ្នំតូច ខាងលើ លោក សោម វិចិត្រ ប្រធានមន្ទីររ៉ែ និងឋាមពលខេត្តកំពត បានបញ្ជាក់ប្រាប់ កម្ពុជាថ្មីតាមទូរស័ព្ទ នៅរសៀលថ្ងៃទី១៣ ខែធ្នូ ឆ្នាំ២០១៩ នេះថា តាមការពិតអ្នកធ្វើអាជីវកម្មយកដីនិងថ្មភ្នំខាងលើ សុទ្ធតែបានសុំច្បាប់អនុញ្ញាតត្រឹមត្រូវ ដោយការធ្វើអាជីវកម្មនេះមានអាជ្ញាប័ណ្ណដែលមានរយៈពេល៥០ឆ្នាំ ទើបអស់សុពលភាព។
លោកប្រធានមន្ទីររ៉ែ និងឋាមពលខេត្តកំពត ក៏បានរំលឹកដល់អ្នកកាសែតថា សូមកុំប្រើពាក្យជីកយកដីស្ទើរលាយភ្នំឱ្យសោះ ព្រោះភ្នំនិមួយៗដែលមានច្បាប់អនុញ្ញាតសុទ្ធតែមានរយៈពេលវែង ពោលគឺអាជ្ញាប័ណ្ណមានរយៈពេលចាប់ពី៥០ឆ្នាំឯណោះទើបផុតកាលកំណត់៕ សេង ណារិទ្ធ
