(ខេត្តកែប)៖ ជនជាតិចិនម្នាក់ត្រូវគេប្រទះឃើញដេកស្លាប់ក្នុងុផ្ទះសំណាក់មួយកន្លែងស្ថិតក្នុងភូមិសាស្ត្រទឹកដីក្រុងកែប ដោយការស្លាប់នេះសមត្ថកិច្ចបានអះអាងថា បណ្តាលមកពីធ្លាយក្រពះព្រោះតែផឹកស្រាហួសកម្រិត។
ការប្រទះឃើញសពជនជាតិចិនខាងលើនៅវេលាម៉ោង៩និង៣០នាទីព្រឹក ថ្ងៃទី១០ ខែធ្នូ ឆ្នាំ២០១៩ ត្រង់ចំណុចផ្ទះសំណាក់ ប៊ិចថោន ស្ថិតក្នុងភូមិថ្មី សង្កាត់ព្រៃធំ ក្រុងកែប ខេត្តកែប។
ពាក់ព័ន្ធនឹងករណីខាងលើ លោកសូង សុិន អធិការនគរបាលក្រុងកែបបានឱ្យដឹងថា នៅព្រឹកថ្ងៃទី១០ ខែធ្នូ ឆ្នាំ២០១៩ នេះមានករណីជនជាតិចិនម្នាក់បានដេកស្លាប់ក្នុងផ្ទះសំណាក់យីហោ ប៊ិចថោន បន្ទប់លេខ២១១ ដែលមានទីតាំងស្ថិតនៅភូមិថ្មី សង្កាត់ព្រៃធំ ក្រុងកែប ហើយបន្ទាប់ពីមានសេចក្តីរាយការណ៍ភ្លាមៗ កម្លាំងសមត្ថកិច្ចជំនាញព្រមទាំងគ្រូពេទ្យ បានចុះទៅពិនិត្យធ្វើកោសល្យវិច័យដើម្បីរកអាថិ៍កំបាំងនៃការស្លាប់របស់ជនជាតិបរទេសនេះ។ហើយបើតាមការពិនិត្យជនជាតិចិនខាងលើគឺស្លាប់ដោយសារធ្លាយក្រពះ ព្រោះតែផឹកស្រាច្រើនពេក។
លោកបានបញ្ជាក់ទៀតថា ជនជាតិចិនដែលស្លាប់បាត់បង់ជីវិតនេះ គ្មានលិខិតស្នាមសម្រាប់សម្គាល់ខ្លួននោះទេ ដោយសពមានអាយុប្រហែល៤០ឆ្នាំ ភេទប្រុស ស្លៀកខោខ្លីលើជង្គង់ ពាក់អាវយឺតដៃខ្លី។
បច្ចុប្បន្នសពជនជាតិចិនក្រោយពីពិនិត្យធ្វើកោសល្យរួចរាល់ ត្រូវបានសមត្ថកិច្ចវេចខ្ចប់យ៉ាងត្រឹមត្រូវ ហើយយកទៅរក្សាទុកនៅសាលរក្សាសពនៅមន្ទីរពេទ្យខេត្តកែប៕ សេង ណារិទ្ធ
