(ខេត្តកំពត)៖ នៅរសៀលថ្ងៃចន្ទ ១៣កើត ខែមិគសិរ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៩ ខែធ្នូ ឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត បានបញ្ជាក់ថា ក្រុមការងាររដ្ឋបាលខេត្ត ដឹកនាំដោយ លោក ប៉ឹល កុសល អភិបាលរងខេត្ត នឹងធ្វើការចុះសិក្សាផ្ទាល់លើវិវាទពីការកាប់បំផ្លាញដំណាំចេករបស់ប្រជាពលរដ្ឋទាំង២១គ្រួសារ ដោយបុគ្គលិកក្រុមហ៊ុនខេមទ្រី ដែលស្ថិតនៅភូមិជ័យសេនា ឃុំតាកែន ស្រុកឈូក ខេត្តកំពត។
លោក ជាវ តាយ ក៏បានបញ្ជាក់ទៀតថា រដ្ឋបាលខេត្តនឹងស្វែករកដំណោះស្រាយជូនបងប្អូនប្រជាពលរដ្ឋទាំង២១គ្រួសារនោះប្រកបដោយភាពយុត្តិធម៌បំផុត ហើយសុំប្រជាពលរដ្ឋសហការ ដោយរក្សាភាពនឹងនររង់ចាំក្រុមការងារចុះផ្ទាល់។
សូមជម្រាបថា ករណីវិវាទដីធ្លីស្ថិតក្នុងភូមិសាស្ត្រឃុំត្រពាំងភ្លាំង ស្រុកឈូក ខេត្តកំពត ពិតជាបានកើតឡើងមិនចេះចប់មិនចេះហើយ ដោយបញ្ហាទំនាស់នេះគឺបានអូសបន្លាយជាច្រើនឆ្នាំ ដែលធ្វើឱ្យអាជ្ញាធរខេត្តកំពតជាច្រើនជំនាន់ ខំរកដំណោះស្រាយយាំងវិលក្បុង ប៉ុន្តែហាក់មិនទាន់បានស្ងប់ស្ថាត់នៅឡើយទេ។
ជាមួយគ្នានេះ មហាជនបានសង្ឃឹមជឿជាក់ដ៏មុតមាំថា លោកអភិបាលខេត្តកំពតបច្ចុប្បន្ន នឹងជួយរកដំណោះស្រាយលើករណីវិវាទដីធ្លីដ៏រាំុរ៉ៃនេះប្រកបដោយយុត្តិធម៌ និងតម្លាភាព ដើម្បីបញ្ចប់វនូវវិវាទដីធ្លីដែលកើតឡើងជាយូរឆ្នាំមកហើយនោះ៕ សេង ណារិទ្ធ
