(ខេត្តកំពត)៖ ក្រុមហ៊ុន ជីប ម៉ុង អ៊ិនស៊ី ស៊ីមេន ដែលជាក្រុមហ៊ុនផលិតស៊ីម៉ងត៍ធំជាងគេ នៅខេត្តកំពត នៅតែបន្តបណ្តុះបណ្តាលជំនាញបច្ចេកទេស និងបទពិសោធន៍ល្អៗដល់និស្សិតកម្ពុជា ដើម្បីរួមចំណែកអភិវឌ្ឍន៍ធនធានមនុស្សឱ្យកាន់តែទទួលបានប្រសិទ្ធភាព។
ការលើកឡើងបែបនេះជាប្រសាសន៍របស់លោក មួង ផាស៊ី នាយករង នៃវិទ្យាស្ថានជាតិពហុបច្ចេកទេសកម្ពុជា ក្នុងពិធីប្រគល់សញ្ញាបត្រដល់និស្សិតជំនាន់ទី១ ដែលបានបញ្ចប់កម្មវិធីវគ្គបណ្តុះបណ្តាលវិជ្ជាជីវៈនៅរោងចក្រជីបម៉ុង អ៊ិនស៊ីស្ថិតក្នុងឃុំស្តេចគង់ខាងលិច ស្រុកបន្ទាយមាស ខេត្តកំពត កាលពីរសៀលថ្ងៃទី០៥ ខែធ្នូ ឆ្នាំ២០១៩ ដោយកម្មវិធីនេះក៏មានវត្តមានលោក លាង ម៉េង ប្រធានក្រុមប្រឹក្សាភិបាល ក្រុមហ៊ុន ជីប ម៉ុង អ៊ិនស៊ី ស៊ីមេន លោក នីកូឡាស់ ចច នាយកប្រតិបត្តិ ក្រុមហ៊ុន ជីប ម៉ុង អ៊ិនស៊ី ស៊ីមេន និងលោក អៃដែន លីណាំ ជានាយកប្រតិបតិ្ត Insee Group និងជាអតីតនាយកប្រតិបតិ្តក្រុមហ៊ុន ជីប ម៉ុង អ៊ិនស៊ី។
លោកបានបញ្ជាក់ទៀតថា ការរៀបចំប្រគល់សញ្ញាបត្រដល់និស្សិតជំនាន់ទី១នៃកម្មវិធីវគ្គបណ្តុះបណ្តាលវិជ្ជាជីវៈ(Enterprise-based Vocational Education ដែលហៅកាត់ថា EVE) ពិតជាមានអត្ថន័យយ៉ាងធំធេង។ ចំពោះកម្មវិធីបណ្តុះបណ្តាលនេះដែរ នឹងផ្តល់ចំណេះដឹងយ៉ាងទូលំទូលាយដល់សិស្សកម្ពុជាគ្រប់កម្រឹត ក្រោយពីពួកគេបានឆ្លងកាត់វគ្គបណ្តុះបណ្តាលរយៈពេល៣ឆ្នាំ។លោកថា សិស្ស(EVE)ជំនាន់ទី១ដែលត្រូវទទួលសញ្ញាបត្រមានចំនួន១២រូប មានស្រី៤នាក់ ហើយក្នុងចំណោមនោះមាន១០នាក់ ត្រូវទទួលបានការងារធ្វើនៅរោងចក្រផលិតស៊ីម៉ងត៍ ជីបម៉ុង អ៊ិនស៊ី ផងដែរ។
ដោយឡែក លោក នីកូឡាស់ ចច នាយកប្រតិបតិ្តក្រុមហ៊ុន ជីប ម៉ុង អ៊ិនស៊ី ស៊ីមេន បានលើកឡើងថា ក្រុមហ៊ុន ជីប ម៉ុង អ៊ិនស៊ី នឹងប្តេជ្ញាចិត្តជួយបណ្តុះបណ្តាលប្រជាជនកម្ពុជាគ្រប់កម្រឹត ហើយគោលដៅរបស់យើង គឺបណ្តុះបណ្តាលដល់យុវជនដែលចេញពីសហគមន៍ជុំវិញទីតាំងរោងចក្រ ដើម្បីឱ្យពួកគេក្លាយជាអ្នកជំនាញ ក្នុងឱកាសអនុវត្តការងារជាមួយក្រុមហ៊ុនរបស់យើង ហើយស្នាក់នៅជិតក្រុមគ្រួសាររបស់ពួកគេផ្ទាល់តែម្តង។
សូមជម្រាបថា៖ ដើម្បីរួមចំណែកអភិវឌ្ឍន៍ធនធានមនុស្ស រោងចក្រផលិតស៊ីម៉ងត៍ ជីប ម៉ុង អ៊ិនស៊ី បានផ្តួចផ្តើមរៀបចំវគ្គបណ្តុះបណ្តាលវិជ្ជាជីវៈ(EVE)នេះឡើងកាលពីឆ្នាំ២០១៦ គឺនៅពេលដែលរោងចក្រកំពុងស្ថិតនៅក្នុងដំណាក់កាលសាងសង់ បន្ទាប់មកបានដាក់សម្ពោធដាក់ឱ្យប្រើប្រាស់ជាផ្លូវការនៅខែកុម្ភៈឆ្នាំ២០១៨ ហើយរហូតដល់ពេលនេះក្រុមហ៊ុនបានទទួលឱ្យសិស្សចូលរៀនបាន៤ជំនាន់មកហើយ ដោយមួយជំនាន់ក្រុមហ៊ុនទទួលយកសិស្ស១២នាក់ ដែលសិស្សទាំងនោះបានបញ្ចប់មធ្យមសិក្សាទុតិយភូមិ៕ សេង ណារិទ្ធ
