(ខេត្តកែប)÷ សិក្ខាសាលាចែករំលែកបទពិសោធន៍ ស្តីពីការស្រាវជ្រាវ និងអភិវឌ្ឍ(R&D)ផ្នែកវិទ្យាសាស្ត្រ និងបច្ចេកទេស ត្រូវបានរៀបចំឡើងនៅខេត្តកែប ក្រោមអធីបតីភាព លោក វី ហៀង រដ្ឋលេខាធិការក្រសួងផែនការ និងលោក កែន សត្ថា អភិបាល នៃគណ:អភិបាលខេត្តកែប និងមានការអញ្ជើញចូលរួម លោកស្នងការនគរបាលខេត្ត លោក លោកស្រីប្រធាន អនុប្រធាន និងមន្ត្រីជំនាញមន្ទីរផែនការមកពីបណ្តាខេត្តចំនួន០៥ រួមមាន ខេត្តកំពត ខេត្តកោះកុង ខេត្តតាកែវ ខេត្តកំពង់ស្ពឺ ខេត្តព្រះសីហនុ និងមន្ទីរអង្គភាពជុំវិញខេត្តកែបសរុបប្រមាណ១៥៣រូប ។
ក្នុងមតិស្វាគមន៍របស់ លោក កែន សត្ថា បានលើកឡើងថា ដោយមានការខិតខំប្រឹងប្រែង ពីថ្នាក់ដឹកនាំ និងមន្ត្រីក្រោមឱវាទ បានធ្វើឧ្យខេត្តកែបទទួលបាននូវការរីកចម្រើនជាបន្តបន្ទាប់។ ជាក់ស្តែងអាត្រាភាពក្រីក្រក្នុងខេត្តមានការថយចុះជាលំដាប់គួរឲ្យកត់សម្គាល់ គឺចំនួន១៤,៣៧% នៅឆ្នាំ២០១៥ ថយចុះមកត្រឹម ៤,៤៣% នៅឆ្នាំ២០១៩នេះ។ ទំហំសេដ្ឋកិច្ចសរុបប្រមាណ២០៥,៥២៦.៨ លានរៀលគិតជាដុល្លារ៥០.៧លានដុល្លា ស្មើនឹង០.២០% នៃសេដ្ឋកិច្ចជាតិសរុប ចំណូលសម្រាប់មនុស្សម្នាក់ៗ មានចំនួន១,២១៧ដុល្លា ក្នុងឆ្នាំ២០១៨ នេះ។
ថ្លែងបើកសិក្ខាសាលានាពេលនេះ លោក វី ហៀង រដ្ឋលេខាធិការក្រសួងផែនការ មានប្រសាសន៍ថា តាមរយ:ការសិក្សាស្រាវជ្រាវជាច្រើន បានបង្ហាញថា ប្រទេសមហាអំណាចសេដ្ឋកិច្ចលើពិភពលោក ដែលវិនិយោគខ្លាំងលើការស្រាវជ្រាវ និងអភិវឌ្ឍន៍(R&D)ផ្នែកវិទ្យាសាស្ត្រ និងបច្ចេកវិទ្យា សុទ្ធសឹងជាប្រទេស ដែលមានការអភិវឌ្ឍសេដ្ឋកិច្ចខ្លាំងក្លា។
លោកក៏បានបន្ថែមទៀតថា លទ្ធផលនៃការស្រាវជ្រាវ និងអភិវឌ្ឍន៍(R&D)ផ្នែកវិទ្យាសាស្ត្រ និងបច្ចេកវិទ្យានេះអាជួយឱ្យយើងធ្វើការសម្រេចចិត្តបានត្រឹមត្រូវ ចំគោលដៅ និងធ្វើឱ្យមានការអភិវឌ្ឍន៍ជឿនលឿនតាមយុគ្គសម័យទំនើប៕ សេង ណារិទ្ធ
