(ខេត្តកែប)÷ ក្នុងរយៈពេលបីថ្ងៃនៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ រមណីយដ្ឋានឆ្នេរកែប ទទួលបដិសណ្ឋារកិច្ចភ្ញៀវទេសចរណ៍ជាតិ-អន្តរជាតិប្រមាណជិត១០មឺុននាក់។
យោងតាមរបាយការណ៍របស់រដ្ឋបាលខេត្តកែប នៅព្រឹកថ្ងៃទី១៣ ខែវិច្ឆិកា ឆ្នាំ២០១៩នេះ បានឱ្យដឹងថា ក្នុងរយៈពេលបីថ្ងៃនៃឱកាសបុណ្យអំុទូក បណ្តែតប្រទីប អកអំបុក និងសំពះព្រះខែ គិតចាប់ពីថ្ងៃទី១០ រហូតដល់ថ្ងៃទី១២ ខែវិច្ឆិកា ឆ្នាំ២០១៩ រមណីយដ្ឋានខេត្តកែប មានក្រុមអ្នកទេសចរណ៍ជាតិ-អន្តរជាតិចូលមកសម្រាក លម្ហែ កម្សាន្តចំនួនសរុប ៩៩.៨០៦នាក់ បើធៀបនឹងឆ្នាំ២០១៨ដែលមានត្រឹមចំនួន៩៦.៧៤១នាក់ គឺកើនឡើង ៣.០៦៥នាក់ ស្មើនឹង៣,១៦%។
របាយការណ៍បានបញ្ជាក់ផងដែរថា ក្នុងចំណោមភ្ញៀវទេសចរណ៍ដែលមកទស្សនាកម្សាន្តនាឱកាសបុណ្យអុំទូក មានភ្ញៀវជាតិចំនួន ៩៧.៥២៨នាក់ និងភ្ញៀវអន្តរជាតិចំនួន ២.២៧៨នាក់។ក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ក្នុងរយៈពេលបីថ្ងៃនេះនៅក្នុងរមណីយដ្ឋានឆ្នេរកែប ក៏ដូចជាតំបន់ទេសចរណ៍ជាច្រើនទៀតក្នុងភូមិសាស្ត្រខេត្ត ពិតជាទទួលបានសុខ សុវត្ថិភាព និងមានរបៀបរៀបរយ សណ្តាប់ធ្នាប់ល្អ គ្មានបទល្មើសណាមួយកើតឡើងគួរឱ្យកត់សម្គាល់ឡើយ។
សូមជម្រាបផងដែរថា ការរៀបចំព្រះរាជពិធីបុណ្យអុំទូក អកអំបុក បណ្តែតប្រទីប និងសំពះព្រះខែ ឆ្នាំ២០១៩នេះ មិនថានៅរាជធានីភ្នំពេញ ឬគ្រប់បណ្តាខេត្ត ក្រុង និងតាមមូលដ្ឋាននានាទូទាំងប្រទេស ពិតជាបង្កលក្ខណៈល្អប្រសើរ ដោយប្រជាពលរដ្ឋបាននាំក្រុមគ្រួសារដើរកម្សាន្តនៅគ្រប់ទិសទី ពិសេសនៅតាមតំបន់ទេសចរណ៍នៅទូទាំងព្រះរាជាណាចក្រកម្ពុជាយ៉ាងសប្បាយរីករាយ ពោលគឺមិនខ្វល់ពីក្រុមឧទ្ទាមដែលចង់បង្កភាពអសន្តិសុខនោះឡើយ។
ស្របពេលជាមួយគ្នានេះដែរ គេសង្កេតឃើញប្រជាពលរដ្ឋនៅគ្រប់មូលដ្ឋានមានក្តីរីករាយ ដោយបានចូលរួមពិសារអំបុកដើម្បីការពារជាតិ សាសនា ព្រះមហាក្សត្រ ដោយមិនជឿនឹងពាក្យញុះញង់ និងការបោកបញ្ឆោតរបស់ជនក្បត់ជាតិ ដែលមានទណ្ឌិត សម រង្សុី ជាមេក្លោងឡើយ៕ សេង ណារិទ្ធ
