(ខេត្តកំពត)÷ ដើម្បីអបអរសាទរក្នុងពិធីបុណ្យអំុទូក បណ្តែតប្រទីប អកអំបុក និងសំពះព្រះខែ ស្រុកកំពង់ត្រាច បានរៀបចំព្រឹត្តិការណ៍ប្រកបដោយភាពសប្បាយរីករាយ គឺការប្រណាំងសេះនិងការប្រណាំងទូក។
ព្រឹតិ្តការណ៍នេះបានរៀបចំឡើងក្នុងរយៈពេលបីថ្ងៃ ចាប់ពីថ្ងៃទី១០រហូតដល់ថ្ងៃទី១២ ខែវិច្ឆិកា ឆ្នាំ២០១៩ ក្រោមការអញ្ជើញចូលរួមពីសំណាក់លោក អូន ខន អភិបាលស្រុកកំពង់ត្រាច និងលោក សីុតទ័រ ហែននីង អគ្គនាយកក្រុមហ៊ុនហាទៀងវេហ្គាស រីស៊ត។
ជាមួយនឹងឱកាសដែលធ្វើឱ្យមហាជនបានផ្តោតការចាប់អារម្មណ៍ក្នុងព្រះរាជពិធីបុណ្យអំុទូកនេះ ស្រុកកំពង់ត្រាចក៏បានរៀបចំព្រឹត្តិការពិសេសមួយដែលមិនធ្លាប់មានកន្លងមក គឺការប្រណាំងសេះ ដែលកម្មវិធីនេះបានរៀបចំឡើងនៅវត្តរាជាលំពូ ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច។ដោយឡែកការប្រណាំងទូកបានរៀបចំឡើងរយៈពេលបីថ្ងៃ នៅចំណុចទំនប់អូរច្រនៀង នៃឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
ទាក់ទិននឹងពិធីដ៏មហាឡារិកនេះ លោក អូន ខន អភិបាលស្រុកកំពង់ត្រាច បានបញ្ជាក់ថា ការរៀបចំព្រឹត្តិការណ៍នេះឡើងគឺដើម្បីអបអរសាទរព្រះរាជពិធីបុណ្យអំុទូក បណ្តែតប្រទីប អកអំបុក និងសំពះព្រះខែ ដែលជាប្រពៃណីជាតិរបស់យើង ពិសេសការអបអរនៃការជួបជុំពិសារអំបុកការពារជាតិ សាសនា ព្រះមហាក្សត្រ ដោយការរៀបចំឡើងរបស់រដ្ឋបាលស្រុក និងមានការឧបត្ថម្ភពីក្រុមហ៊ុនហាទៀងវេហ្គាស សប្បុរសជន អាជីវករ និងប្រជាពលរដ្ឋ ដោយប្រមូលបានថវិកាប្រមាណជាង៨លានរៀល។
សូមជម្រាបថា ការបើកព្រឹត្តិការណ៍ប្រណាំងទូកក្នុងរយៈពេលបីថ្ងៃនេះ ក្រោមការផ្តួចផ្តើមពីរដ្ឋបាលស្រុកកំពង់ត្រាច និងក្រុមហ៊ុនហាទៀងវេហ្គាស ព្រមទាំងមានការឧបត្ថម្ភពីសប្បុរជនានា និងប្រជាពលរដ្ឋគ្រប់មជ្ឈដ្ឋាន។ហើយចំពោះការប្រណាំងទូកផ្តាច់ព្រ័តនារសៀលថ្ងៃទី១២ ខែវិច្ឆិកា ឆ្នាំ២០១៩ ទូកដែលទទួលបានជ័យលាភីលេខ១ គឺទទួលបានការឧបត្ថម្ភថវិកាចំនួន ១,០០០,០០០រៀល ជ័យលាភីលេខ២ ទទួលបានថវិកាចំនួន ៥០០,០០០រៀល និងលេខ៣ ទទួលបានថវិកាចំនួន ៣០០,០០០រៀលផងដែរ៕ សេង ណារិទ្ធ
