មណ្ឌលគីរី ៖ សំរាមគឺជាអ្វីដែលមនុស្សទាំងអស់គ្នាមិនចូលចិត្ត តែបែរជាពូកែខាងពង្រាយ ដោយមិនខ្វល់ ពីបរិស្ថាន អ្វីបន្តិចសោះ ។ នេះជាការលើកឡើងរបស់លោកអភិបាលក្រុងសែនមនោរម្យ ក្រោយពេលដែលការដាក់តាំងពិព័រណ៏ទំនិញថៃ ត្រូវបានបញ្ចប់នាពេលថ្មីៗនេះ ហើយបានបន្សល់ទុក នូវសម្រាមពាសវាលពាសកាល កណ្តាលក្រុងសែនមនោរម្យ។
ការតាំងពីព័រនេះមានរយៈពេល ៥ ថ្ងៃចាប់ពីថ្ងៃទី១៨ ធ្នូ ដល់ថ្ងៃទី២២ ធ្នូ ២០១៥ នៅសួនច្បារសម្តេចតេជោ (អតីតប្រលានយន្តហោះចាស់) ក្នុងក្រុងសែនមនោរម្យ ដែលជាបេះដូងខេត្តមណ្ឌលគិរី ។ ក្នុងការដាក់តាំងពិព័រផ្សារថៃនោះ គេសង្កេតឃើញមាន ផលិតផលរាប់រយប្រភេទត្រូវបានអាជីវករថៃដាក់លក់ រួមទាំងគ្រឿងបរិភោគរាប់សិបមុខទៀត ។ ជាការពិតណាស់ ការតាំងពិព័រណ៏របស់ក្រុមអាជីរកថៃ បានប្រកបទៅដោយភាពរលូន និងផ្តល់ផលចំណេញ មិនតិចទេដល់ពួកគាត់ដែលជាអ្នកលក់ ក៏ប៉ុន្តែអ្នកដែលទទួលរងផលប៉ះពាល់គឺ ប្រជាពលរដ្ឋ និងអាជ្ញាធរមូលដ្ឋាន ដែលត្រូវមកឈឺក្បាលនឹងសម្រាមដែលហោះហើរពេញអាកាស ព្រោះរដូវនេះនៅខេត្តមណ្ឌលគិរី មានជំនោរខ្យល់បក់ខ្លាំង។
លោកអភិបាលក្រុងសែនមនោរម្យបានមានប្រសាសន៏ថា នេះ គឺទិដ្ឋភាពក្រុងសែនមនោរម្យក្រោយវេទិកាខនសើត ហើយលោកសូមអរគុណ សការីទាំងអស់ដែលបានសម្អាតយ៉ាងយកចិត្តទុកដាក់ រហូតដល់មានសភាពដើមវិញ ។ លោកបានបញ្ជាក់ថា សូមចូលរួមទាំអស់គ្នាដើម្បីបរិដ្ថានសហគមន៍យើង ព្រោះខេត្តមណ្ឌលគិរីជាខេត្តទេសចរណ៏ធម្មជាតិគ្មានពីរ ៕
ហេង ចាន់ណុប
