បាត់ដំបង ៖ លោក ងួន រតនៈ អភិបាលខេត្តបាត់ដំបង បានជំរុញឲ្យសមត្ថកិច្ចពាក់ព័ន្ធ ជាមន្ត្រីនគរបាលយុត្តិធម៌ ត្រូវត្រួតពិនិត្យ ពង្រឹងការអនុវត្តច្បាប់ និងដោះស្រាយបញ្ហាប្រឈមនានា ក្នុងការអនុវត្តកន្លងមករួមគ្នាដោះស្រាយ ពាក់ព័ន្ធទៅនឹងបទល្មើសផ្សេងៗ គ្រប់ប្រភេទ។
ការជំរុញរបស់លោកអភិបាលខេត្ត ត្រូវបានធ្វើឡើងនៅព្រឹកថ្ងៃទី២១ ខែសីហា ឆ្នាំ២០១៩ ក្នុងកិច្ចប្រជុំស្តីពីការត្រួតពិនិត្យ ពង្រឹងការអនុវត្តច្បាប់ និងដោះស្រាយបញ្ហានានាក្នុងខេត្ត និងលើកទិសដៅអនុវត្តការងារបន្តដែលរៀបចំដោយសាលាដំបូង និងអយ្យការអមសាលាដំបូងខេត្តបាត់ដំបង នគរបាលយុត្តិធម៌។
ក្នុងកិច្ចប្រជុំនេះ ក៏មានការចូលរួមពីលោក ជា វណ្ណ: ប្រធានសាលាដំបូងខេត្ត, លោក នួន សាន ព្រះរាជអាជ្ញាសាលាដំបូងខេត្ត, លោកឧត្តមសេនីយ៍ត្រី ជេត វណ្ណនី ស្នងការរងនគរបាលខេត្ត, លោក អ៊ន ជ្រីសៅរ៍មណ្ឌល មេបញ្ជាការរងកងរាជអាវុធហត្ថខេត្ត, លោក ឃុត ណារី តំណាង UN និងលោកចៅក្រម ព្រះរាជអាជ្ញរង ប្រធាន អនុប្រធាន លេខាធិការដ្ឋានរដ្ឋបាល មន្ត្រីក្រឡាបញ្ជីតុលាការ អភិបាលក្រុង ស្រុកទាំង១៣ អធិការក្រុង ស្រុក មន្ទីរពាក់ព័ន្ធមន្ត្រីនគរបាលក្នុងខេត្ត។
បន្ទាប់ពីសុន្ទរកថាស្វាគមន៍របស់លោក ជា វណ្ណ: ប្រធានសាលាដំបូងខេត្ត និងលោក នួន សាន ព្រះរាជអាជ្ញាសាលាដំបូងខេត្ត ក្នុងកិច្ចប្រជុំរួចមក លោក ងួន រតនៈ បានថ្លែងថា នៅក្នុងកិច្ចប្រជុំស្តីពីការត្រួតពិនិត្យ ពង្រឹងការអនុវត្តច្បាប់ និងដោះស្រាយបញ្ហានានានៅសាលាដំបូង និងអយ្យការអមសាលាដំបូង ខេត្តបាត់ដំបង និងនគរបាលយុត្តិធម៌នេះថា ដើម្បីអនុវត្តការងារនេះទៅឲ្យបានល្អបាន ផ្តោតទៅលើចំណុចសំខាន់ៗរួមមាន៖
ទី១៖ ការអនុវត្តដីកាផ្សេងៗ ឆ្លើយតបឲ្យបានទាន់ពេលវេលា, ទី២៖ការបង្ក្រាបបទល្មើសផ្សេងៗ ពិសេសបទល្មើសនេសាទ ដែលមន្ត្រីនគរបាលយុត្តិធម៌ ត្រូវពង្រឹងអនុវត្តច្បាប់ និងទប់ស្កាត់ឲ្យបានក្នុងការទន្ទ្រានដីរដ្ឋជាដើម និងទី៣៖ដំណោះស្រាយពន្លឿនបញ្ហាជនជាប់ឃុំ ឲ្យមានការបញ្ជូនខ្លួនបានទាន់វេលា។
លោកអភិបាលខេត្ត បានបន្តថា ដើម្បីឲ្យអនុវត្តការងារនេះមានភាពរលូនល្អ ហើយថ្នាក់ដឹកនាំគ្រប់លំដាប់ថ្នាក់ ពិសេសមន្ត្រីនគរបាលយុត្តិធម៌ ខិតខំបម្រើការងារ ទៅតាមតួនាទីរបស់ខ្លួន និងត្រូវចេះ ត្រួតពិនិត្យការងារនេះ អប់រំ កសាង អនុវត្តច្បាប់ គ្រប់គ្រងដល់ប្រជាពលរដ្ឋ ពិសេសជនដែលបានប្រព្រឹត្តបទល្មើស បានស្គាល់បទល្មើសរបស់ខ្លួនផងដែរ៕
(ដោយ គេហទំព័រ កម្ពុជា អភិវឌ្ឍន៍)
www.Kap-news.com
