(ខេត្តកំពត) ៖ ជនជាតិចិនដែលសមត្ថកិច្ចឃាត់ខ្លួនពាក់ព័ន្ធនឹងករណីលួចបើកសេវាបម្រើផ្លូវភេទក្នុងក្រុងកំពត ត្រូវបានសមត្ថកិច្ចជំនាញរៀបចំបញ្ជូនទៅកាន់សាលាដំបូងខេត្តកំពតនៅរសៀលថ្ងៃទី២១ ខែសីហា ឆ្នាំ២០១៩នេះ។
យោតាមការបង្ហើបឲ្យដឹងពីនគរបាលការិយាល័យអន្តោរប្រវេសនៃស្នងការដ្ឋាននគរបាលខេត្តបានបញ្ជាក់ថា ការចុះបង្ក្រាបទីតាំងបម្រើសេវាផ្លូវភេទមួយកន្លែង កាលពីយប់ថ្ងៃទី១៩ខែសីហា ឆ្នាំ២០១៩ កម្លាំងបានឃាត់ខ្លួនមនុស្សប្រុស ស្រីជាជនជាតិចិនចំនួន ៩ នាក់នាំមកកាន់ការិយាល័យនគរបាលអន្តោប្រវេសន៍ដើម្បីធ្វើការសាកសួរធ្វើកំណត់ហេតុ និងបន្តអនុវត្តតាមនីតិវិធីច្បាប់។
ទាក់ទិននឹងករណីខាងលើ លោកឧត្តមសេនីយ៍ទោ ម៉ៅ ចន្ទ័មធុរិទ្ធ ស្នងការខេត្តបានប្រាប់កម្ពុជាថ្មីឲ្យដឹងថា ទីតាំងដែលកម្លាំងសមត្ថកិច្ចចុះបង្ក្រាបខាងលើ ស្ថិតនៅក្នុងសង្កាត់ ក្រាំងអំពិល ក្រុងកំពត ខេត្តកំពត ដោយប្រតិបត្តិការនេះស្ថិតក្រោមការសម្របសម្រួលពីលោក ខា ដែនណា ព្រះរាជអាជ្ញារងអមសាលាដំបូងខេត្ត។
លោកស្នងការខេត្តបានបន្តថា កម្លាំងសមត្ថកិច្ចជំនាញរបស់ស្នងការក្នុងការចុះបង្ក្រាបនេះបានឃាត់ខ្លួនមនុស្សជាជនជាតិចិនទាំងអស់ចំនួន៩នាក់ ក្នុងនោះមានស្រីចំនួន៥នាក់និងវត្ថុតាងខិតប័ណ្ណផ្សព្វផ្សាយសេវាបំរើផ្លូវភេទ ព្រមទាំងស្រោមអនាម័យមួយចំនួនផងដែរ។
ក្រោយពីធ្វើការឃាត់ខ្លួនសមត្ថកិច្ចការិយាល័យជំនាញ កំពុងកសាងសំណុំរឿងដើម្បីបញ្ជូនទៅតុលាការចាត់ការតាមនីតិវិធី៕ សេង ណារិទ្ធ
