ប៉ៃលិន ៖ រដ្ឋបាលខេត្តប៉ៃលិននឹងមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្តប៉ៃលិនបានប្រារព្ធពិធីផ្សព្វផ្សាយសេចក្តីប្រកាសបើកតំបន់វិនិច្ឆ័យការចុះបញ្ជីដីធ្លី មានលក្ខណៈជាប្រព័ន្ធ នៅព្រឹកថ្ងៃទី០៩ ខែសីហា ឆ្នាំ២០១៩ នៅក្នុងភូមិអូរបេង និងភូមិដូង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដែលពិធីនេះស្ថិតក្រោមអធិបតីភាពឯកឧត្តម ហុក សុផល អភិបាលរងខេត្តប៉ៃលិន និងមានការអញ្ជើញចូលរួមពីលោក ទិត ធី អភិបាលរងស្រុកសាលាក្រៅ លោក សូ សុខុន ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្ត ព្រមទាំងមន្ត្រីភូមិបាលស្រុក/ក្រុង ,មន្ត្រីសុរិយោដីខេត្ត ,មេឃុំ,មេភូមិ និងប្រជាពលរដ្ឋជាង១០០នាក់។
លោក សូ សុខុន ប្រធានមន្ទីររៀបចំដែនដីខេត្តប៉ៃលិន បានមានប្រសាសន៍ថា ក្នុងខេត្តប៉ៃលិន មានក្រុមការងារចុះបញ្ជីដីធ្លី មានលក្ខណៈជាប្រព័ន្ធ ចំនួនពីរក្រុម ដើម្បីធ្វើការចុះបញ្ជីដីធ្លី នៅតាមស្រុក/ក្រុង ក្នុងខេត្តប៉ៃលិន។
លោក សូ សុខុន ប្រធានមន្ទីររៀបចំដែនដីខេត្តប៉ៃលិន លោកបានបន្តថា៖ ការចុះបញ្ជីដីធ្លីនេះគឺធ្វើឡើងតាមអនុក្រិតលេខ៤៦ ដែលក្នុងនោះមាន៥ដំណាក់កាល ហើយនៅពេលនេះគឺយើងធ្វើក្នុងដំណាក់កាលទី១ ចំណែកដំណាក់កាលទី២គឺជាដំណាក់កាលសំខាន់បំផុត សូមឲ្យបងប្អូនប្រជាពលរដ្ឋយើងមានការសហការជាមួយមន្ត្រីផងដែរ លោកប្រធានមន្ទីរក៍បានបញ្ជាក់ដែរថា៖ ការប្រជុំផ្សព្វផ្សាយសេចក្តីប្រកាសបើកតំបន់វិនិច្ឆ័យ ការចុះបញ្ជីដីធ្លី មានលក្ខណៈជាប្រព័ន្ធ នៅក្នុងភូមិអូរបេង និងភូមិដូង ឃុំស្ទឹងកាច់ ស្រុកសាលាក្រៅនេះ ដែលមានផ្ទៃដីទាំងពីរភូមិសរុបចំនួន៧៥៥ ហិកតា និងមានប្រជាពលរដ្ឋរួមទាំងពីរភូមិចំនួន៨០៦នាក់ ព្រមទាំងមានគ្រួសារទាំងពីរភូមិសរុប២០១គ្រួសារផងដែរ ។
នៅក្នុងឱកាសនេះផងដែរ ឯកឧត្តម ហុក សុផល អភិបាលរងខេត្ត ប៉ៃលិន ជាតំណាងដ៏ខ្ពង់ខ្ពស់ឯកឧត្តម ផាន់ ចាន់ធុល អភិបាលនៃគណៈអភិបាលខេត្តប៉ៃលិន មានប្រសាសន៍រំលឹកពីសម័យអាវខ្មៅ ប៉ុល ពត បានដកកម្មសិទ្ធឯកជនទាំងអស់ រួមទាំងកម្មសិទ្ធដីធ្លីផងដែរ ត្រូវបានដកហូត ដាក់ជាសមូហភាព រហូតមកដល់ថ្ងៃរំដោះ ៧ មករា ១៩៧៩ ទើបរដ្ឋាភិបាលកម្ពុជាបានស្តារឡើងវិញ ដែលចាប់ផ្តើមពីចំណុចសូន្យ។
ឯកឧត្តម ហុក សុផល បានបញ្ជាក់ថា៖ ខេត្តប៉ៃលិន ក្រោយពីការធ្វើសមាហរណកម្ម ខ្មែរក្រហមចុះចូលជាមួយរាជរដ្ឋាភិបាល ក្រោមនយោបាយឈ្នះៗ របស់សម្តេចតេជោ ហ៊ុន សែន ជាប្រមុខដឹកនាំនោះ រាជរដ្ឋាភិបាលកម្ពុជា បានធ្វើការបែងចែកដីជូនបងប្អូនកងទ័ពប្រចាំព្រំដែនខេត្តប៉ៃលិន ដែលបានមករួមរស់ជាមួយ ជាប្រពលរដ្ឋវិញ ក្នុងជាតិខ្មែរតែមួយ ហើយនៅពេលនេះឯកឧត្តម ក៍បានសំដែងនូវការត្រេកអរ ចំពោះប្រជាពលរដ្ឋក្នុងភូមិអូរបេង និងភូមិដូង ឃុំស្ទឹងកាច់ ស្រុកសាលាក្រៅ ដែលទទួលបានការធ្វើប្លងរឹងលើដីកម្មសិទ្ធរបស់ខ្លួន ដែលអាចអោយបងប្អូនយកទៅដាក់បញ្ចំខ្លីប្រាក់ធនាគារធ្វើដើមទុនរកស៊ីបាន ។
ឯកឧត្តម បានមានប្រសាសន៍បន្តថា៖ ការចុះបញ្ជីដីធ្លីនេះ ក៍នឹងធ្វើឲ្យដីធ្លីមានសុវត្ថិភាព ផ្លូវច្បាប់ គ្មានអ្នកណាអាចរំលោភបំពានបានឡើយ។ ឯកឧត្តមក៍បានសំណូមពរដល់មន្ត្រី ដែលចុះកំណត់តំបន់វិនិច្ឆ័យ ត្រូវសហការជាមួយប្រជាពលរដ្ឋ ហើយក៍ត្រូវមានការអនុគ្រោះ ចំពោះករណីប្រជាពលរដ្ឋខ្លះ ដែលមិនទាន់មានឯកសារគ្រប់គ្រាន់ ដើម្បីអោយពួកគាត់អាចចូលរួមការចុះបញ្ជីដីធ្លីលក្ខណៈជាប្រព័ន្ធនេះបានផងដែរ៕
