(ខេត្តកំពត)៖ នៅព្រឹកថ្ងៃព្រហស្បតិ៍ ៨កើត ខែស្រាពណ៍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៨ ខែសីហា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្តកំពត បានដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត លើកទី១៨ នៅសាលប្រជុំសាលាខេត្តកំពត។
សមាសភាពអញ្ជើញចូលរួមមាន៖ អភិបាលរងខេត្ត សាលាដំបូងខេត្ត ព្រះរាជអាជ្ញា នៃអយ្យការអមសាលាដំបូងខេត្ត យោធភូមិភាគ៣ បញ្ជាការដ្ឋានការពារកោះឆ្នេរ បញ្ជាការដ្ឋានកងពលតូចអន្តរាគមន៍លេខ៣១ មូលដ្ឋានសមុទ្រ ទីបញ្ជាការជួរមុខ និងនាយកដ្ឋាននគរបាលព្រំដែនទឹក នាយក នាយករងរដ្ឋបាលសាលាខេត្ត មន្ទីរអង្គភាពជុំវិញខេត្ត អភិបាលក្រុង ស្រុក និងទីចាត់ការចំណុះសាលាខេត្តសរុបចំនួន ៩១នាក់។
កិច្ចប្រជុំមានរបៀបវារៈដូចខាងក្រោម៖
១/.ពិនិត្យពិភាក្សាលើសេចក្តីព្រាងកំណត់ហេតុ នៃកិច្ចប្រជុំគណៈបញ្ជាការឯកភាពរដ្ឋបាលខេត្ត
២/.ពិនិត្យពិភាក្សាលើសេចក្តីព្រាងរបាយការណ៍គណៈបញ្ជាការឯកភាពរដ្ឋបាលខេត្ត ប្រចាំឆមាសទី១ ឆ្នាំ២០១៩
៣/.ពិនិត្យពិភាក្សាលើសេចក្តីព្រាងរបាយការណ៍គណៈបញ្ជាការឯកភាពរដ្ឋបាលខេត្ត ប្រចាំខែកក្កដា ឆ្នាំ២០១៩
៤/.សេចក្តីរាយការណ៍អំពីមណ្ឌលប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៩ ក្នុងខេត្តកំពត
៥/.សេចក្តីរាយការណ៍អំពីផែនការ ការពារសន្តិសុខ សណ្តាប់ធ្នាប់ពេលប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៩
៦/.សេចក្តីរាយការណ៍អំពីបញ្ហាប្រឈមនៅតាមបណ្តាក្រុងស្រុក។
ក្នុងកិច្ចប្រជុំព្រឹកនេះ លោក ជាវ តាយ ប្រធានអង្គប្រជុំបានគូសបញ្ជាក់ថា រយៈកាលនៃកិច្ចប្រជុំកន្លងមកនេះ នៅតាមបណ្តាក្រុង ស្រុកទាំង៨ តែងតែលើបញ្ហាករណីទន្ទ្រានដីរដ្ឋ និងរំលោភយកដីព្រៃជាច្រើនកន្លែង។លោកថា ចំពោះបញ្ហាបែបនេះ យើងគួរតែយកចិត្តទុកដាក់ទាំងអស់គ្នា ដោយចាត់វិធានការ ការពារដីរដ្ឋសម្រាប់គ្រប់គ្រងឲ្យបានគង់វង្ស ហើយបញ្ហាប្រឈមនានាគួរតែរកដំណោះស្រាយឲ្យបានឆាប់រហ័ស៕
សេង ណារិទ្ធ
