សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតី ក្នុងកិច្ចប្រជុំផ្សព្វផ្សាយលទ្ធផលការងារដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកាន់កាប់ប្រើប្រាស់ និងការទទួលពាក្យសុំប្រកាសទទួលស្គាល់ ជាជនបរទេសអន្តោប្រវេសន្តនិងប័ណ្ណស្នាក់នៅអចិន្ត្រៃយ៍ នាព្រឹកថ្ងៃពុធ ១រោច ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៧ ខែកក្កដា ឆ្នាំ២០១៩ ។
ប្រសាសន៍សំខាន់របស់សម្តេចក្រឡាហោម ស ខេង៖
-មានការលើកឡើងរបស់គណបក្សនយោបាយខ្លះ ដែលចោទថា មានជនអន្តោប្រវេសន៍ដល់ទៅ១លានឬ២លាននាក់ កំពុងរស់នៅ និងធ្វើការក្នុងប្រទេសកម្ពុជា បញ្ហានេះសម្តេចបានច្រាលចោលទាំងស្រុង ដោយសារជនបរទេសនៅកម្ពុជានាពេលបច្ចុប្បន្ន មានប្រមាណ៩ម៉ឺននាក់ប៉ុណ្ណោះ ដោយក្នុងនោះ ជនជាតិវៀតណាម មានច្រើនជាងគេ
-ការងារដកហូតឯកសាររដ្ឋបាលកម្ពុជាមិនប្រក្រតីដែលជនបរទេសកាន់កាប់ប្រើប្រាស់ និងការទទួលពាក្យសុំប្រកាសទទួលស្គាល់ជាជនបរទេសអន្តោប្រវេសន្ត និងប័ណ្ណស្នាក់នៅអចិន្ត្រៃយ៍ ត្រូវបានបញ្ចប់
-ជនបរទេសមកវិនិយោគ និងមកទេសចរណ៍ ត្រូវបន្តយកចិត្តទុក
-ជំរុញអោយស្នងការដ្ឋាននគរបាលរាជធានី-ខេត្ត បន្តបង្ក្រាបគ្រឿងញៀន
-ប្រយុទ្ធប្រឆាំងការលាងលុយទាំងផ្លូវគោក ផ្លូវទឹក និងផ្លូវអាកាស ដោយសារបេីសិនគេចោទប្រកាន់ថាកម្ពុជាជាប្រទេសលាងលុយ វានឹងប៉ះពាល់ដល់វិស័យធនាគារនៅកម្ពុជា
-ជំរុញសមត្ថកិច្ច និងអ្នកពាក់ព័ន្ធបន្តប្រយុទ្ធប្រឆាំងការជួញដូរមនុស្ស ៕
