(ខេត្តកំពត)៖ នៅព្រឹក ថ្ងៃចន្ទ ១៤កើត ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៥ ខែកក្កដា ឆ្នាំ២០១៩ នៅសាលាខេត្តកំពត លោក ជាវ តាយ អភិបាល នៃគណៈអភិបាលខេត្តកំពត បានប្រគល់រថយន្តពន្លត់អគ្គីភ័យ រថយន្តបូមទឹក និងរថយន្តសង្គ្រោះបន្ទាន់ ជូនដល់អង្គភាពជំនាញ ដោយរថយន្តទាំងនេះ គឺជាអំណោយរបស់រដ្ឋបាលខេត្ត ក្យុងគី នៃសាធារៈរដ្ឋកូរ៉េ តាមរយៈអង្គការមនុស្សធម៌ ហ្គោ អែន ឌូ (GO & DO)ដែលបានផ្តល់ជូន ក្នុងគោលបំណងបម្រើផលប្រយោជន៍សាធារណៈរបស់ខេត្តកំពត។
សម្រាប់រថយន្តទាំង ០៣គ្រឿងនេះ រដ្ឋបាលខេត្តកំពត បានបែងចែកជូន ៖
១/. រថយន្តពន្លត់អគ្គីភ័យ ០១គ្រឿង ប្រគល់ជូន កងរាជអាវុធហត្ថខេត្តកំពត
២/. រថយន្តបូមទឹក ០១គ្រឿង ប្រគល់ជូនរដ្ឋបាលក្រុងកំពត។
៣/. រថយន្តសង្គ្រោះបន្ទាន់ ០១គ្រឿង ប្រគល់ជូនស្នងការដ្ឋាននគរបាលខេត្តកំពត។
ក្នុងឱកាសប្រគល់រថយន្ត០៣គ្រឿងដល់អង្គភាពជំនាញព្រឹកនេះ លោក ជាវ តាយ អភិបាលខេត្តកំពត ក៏បានលើកឡើង ដោយជំរុញដល់អង្គភាពនិមួយៗត្រូវយករថយន្តទៅប្រើប្រាស់ដើម្បីបម្រើប្រយោជន៍រួម ពិសេសបម្រើផលប្រយោជន៍ប្រជាពលរដ្ឋរបស់យើងនៅគ្រប់មូលដ្ឋាន ខណៈពេលជួបបញ្ហាគ្រោះអគ្គីភ័យកើតឡើងជាយថាហេតុ។
សូមជម្រាបថា ពិធីប្រគល់រថយន្តចំនួន០៣គ្រឿងជូនអង្គភាពជំនាញព្រឹកនេះមានការអញ្ជើញចូលរួមពីសំណាក់ លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត នាយក នាយករងរដ្ឋបាលខេត្ត នាយកទីចាត់ការ ប្រធានអង្គភាពចំណុះសាលាខេត្ត អភិបាលក្រុងកំពត សរុប ប្រមាណ ៥០នាក់៕
