ខេត្តសៀមរាប ៖ មួយរយៈពេលកន្លងទៅនេះ នៅក្រុងសៀមរាប ខេត្តសៀមរាប គេសង្កេតឃើញអាជ្ញាធរ និងសមត្ថកិច្ច នគរបាល ព្រមទាំងកងរាជអាវុធហត្ថ បានដុតដៃដុតជើង ចុះបង្ក្រាបល្បែងស៊ីសងដូចជា បៀ អាប៉ោង ឆ្នោតកន្ទុយលេខ យ៉ាងសកម្មបំផុត ដែលធ្វើឱ្យប្រជាពលរដ្ឋក្នុងក្រុងសៀមរាប មានការសាទរយ៉ាងខ្លាំងចំពោះចំណាត់ការចុះចាប់ល្បែងស៊ីសង ទាំងនេះ ក៏ប៉ុន្តែសកម្មភាពរបស់អាជ្ញាធរ និងសមត្ថកិច្ចពាក់ព័ន្ធ ហាក់ធ្វើឡើងតែមួយចំអិនកំពឹសតែប៉ុណ្ណោះ មិនបានជាប់ លាប់ឡើយ និងពុំមានប្រសិទ្ធភាពនោះទេ ដែលគេនៅតែសង្កេតឃើញល្បែងស៊ីសងបៀ អាប៉ោង និងឆ្នោតកន្ទុយលេខ នៅតែ មានសកម្មភាពបើកលេង និងឆ្នោតកន្ទុយលេខនៅតែលក់លួចលាក់តាមគេហដ្ឋាន និងតាមទីផ្សារមួយចំនួន ក្នុងក្រុងសៀមរាប ខេត្តសៀមរាបនៅឡើយ ។ ជាងនេះទៅទៀតគេសង្កេតឃើញឆ្នោតកន្ទុយលេខ ២កន្លែង ក្នុងសង្កាត់ស្វាយដង្គុំ ក្រុងសៀមរាប នៅតែដំណើរការយ៉ាងរលូនដដែល ។
ទីតាំងទី ១ ដែលគេស្គាល់មានម្ចាស់ឈ្មោះ ស្រីនា ស្ថិតក្នុងសង្កាត់ស្វាយដង្គុំ, ទី២-ឈ្មោះ សុខុម មានទីតាំងស្ថិតនៅចំ ខាងក្រោយប៉ុស្តិ៍នគរបាលរដ្ឋបាលសង្កាត់ស្វាយដង្គុំតែម្តង ។ ទីតាំងទាំងពីរខាងលើ បានដំណើរការបើកលេងឆ្នោតមានឆ្នោត ខ្មែរ-យួន និងឆ្នោតសៀម អស់រយៈពេលជាយូរណាស់មកហើយ ដែលគេតែងតែឃើញ ក្រុមអ្នកញៀនល្បែងឆ្នោត បានចូល ទៅចាក់ឆ្នោតជារៀងរាល់ថ្ងៃយ៉ាងពពាក់ពពូនដោយពុំឃើញមានការរំខាន ឬចុះទប់ស្កាត់ពីសមត្ថកិច្ចណាមួយឡើយ ជាពិសេសគឺលោកមេប៉ុស្តិ៍ស្វាយដង្គុំ វ៉ាន់ ដេត ដែលតែងតែសម្ងំស្ងៀមមិនមានវិធានការទប់ស្កាត់ និងមិនអនុវត្តបានគោល នយោបាយភូមិ-ឃុំមានសុវត្ថិភាពរបស់រាជរដ្ឋាភិបាលកម្ពុជា ជាហេតុធ្វើឱ្យបទល្មើសគ្រប់ប្រភេទដូចជា ចោរលួច ចោរឆក់កាបូបតាមដងផ្លូវ ចោរកាច់.កម៉ូតូ និងគ្រឿងញៀនមានការកើនឡើងគួរឱ្យព្រួយបារម្ភធ្វើឱ្យប៉ះពាល់ដល់សន្តិសុខ សង្គមប្រជាពលរដ្ឋបានដាក់ការសង្ស័យថា ទំនងជាលោកមេប៉ុស្តិ៍ ស្វាយដង្គុំ ទទួលបានលាភសក្ការៈពីក្រុមបនល្បែងស៊ីសង ឆ្នោតកន្ទុយលេខទាំង២ខាងលើនេះ ហើយមើលទៅ ទើបទីតាំងឆ្នោតទាំងនេះអាចដំណើរការបានយ៉ាងរលូនមិនមានការ រំខានពីសមត្ថកិច្ចយ៉ាងដូច្នេះ ។
ប្រជាពលរដ្ឋក្នុងក្រុងសៀមរាប ខេត្តសៀមរាប បានអំពាវនាវទៅដល់លោកអភិបាលនៃគណៈអភិបាលខេត្ត ឃឹម ប៊ុនសុង និងស្នងការដ្ឋាននគរបាលខេត្ត លោក ស៊ត ណាឌី មេត្តាចាត់វិធានការទប់ស្កាត់ល្បែងស៊ីសងទាំងនោះជាបន្ទាន់ និងគួរ ត្រួតពិនិត្យមើលមន្ត្រីក្រោមឱវាទដូចជា លោក វ៉ាន់ ដេត មេប៉ុស្តិ៍នគរបាលសង្កាត់ ស្វាយដង្គុំ ក្រុងសៀមរាប ដែលមានភាព អសកម្មក្នុងការបំរើប្រជាពលរដ្ឋ និងដើម្បីរក្សាសន្តិសុខ សង្គមដល់ការរស់នៅរបស់ប្រជាពលរដ្ឋទូទៅ ក្នុងក្រុងសៀមរាបនេះ ផង ៕
សៀមរាប ៖ ឃុន
