ខេត្តមណ្ឌលគីរី ៖ អាវរងាចំនួន៤៥០អាវ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្រាប់ចែកជូនកងកម្លាំងយោធានារដូវរងា នឹងតាមរយៈឯកឧត្តមឧត្តមសេនីយ៏ឯក ហ៊ុន ម៉ាណែត អគ្គមេបញ្ជាការរងកងយុទ្ឋពលខេមរៈភូមិន្ទ ត្រូវបានលោកឧត្តមសេនីយ៏ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរី ចុះចែកជូនដល់កម្លាំងតាមបណ្តាលក្រុង-ស្រុកទាំងប្រាំនៅក្នុងខេត្ត ។
លោកឧត្តមសេនីយ៏ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរីបានមានប្រសាសន៏ថា សម្តេចតេជោតែងយកចិត្តទុកដាក់ដល់កងកម្លាំងទាំងអស់មិនថា តែនៅខេត្តមណ្ឌលគិរីឬខេត្តណានោះទេ គឺសម្តេចបានយកពេលវេលានឹងធនធានផ្ទាល់របស់សម្តេច ដើម្បីឧបត្ថមដល់នាយទាហាននឹងពលទាហាន ដែលកំពុងមានតួនាទីបម្រើជាតិមាតុភូមិ។ ឯកឧត្តមមេបញ្ជាការខេត្តបានប្រសាសន៏បន្តថា បន្ទាប់ពីបានទទួលអាវរងាពីឯកឧត្តមហ៊ុន ម៉ាណែតនៅថ្ងៃទី១០ វិច្ឆិកា ២០១៥រួច លោកក៏បានបន្តយករងាទាំងនោះមកចែកជូនជាបន្ទាន់ដល់កងម្លាំងដែលចំនុះឲ្យតំបន់ប្រតិបត្តិការសឹករងមណ្ឌលគិរីនៅព្រឹក ថ្ងៃទី១១ វិច្ឆិកា ២០១៥ នៅមូលដ្ឋានកងទ័ពស្រុកកោះញែក ភ្លាមៗដោយមិនទុកឲ្យហួសរដូវរងាឡើយ។
ក្រៅពីអាវរងាដែលបានចែកជូនដល់កម្លាំងយោធាខេត្តមណ្ឌលគិរី សម្តេចអគ្គមហាសេនាបតីតេជោហ៊ុនសែន ក៏បានឧបត្ថមដល់តំបន់ប្រតិបត្តិការសឹករងមណ្ឌលគិរី នូវរថយន្តម៉ាកវីហ្គោល សេរី២០១៣ មួយគ្រឿងផងដែរ ដើម្បីជាការងាយស្រួលដល់តំបន់ប្រតិបត្តិការសឹករងក្នុងការប្រើប្រាស់ដឹកជញ្ជូនកម្លាំងទាហាន បម្រើដល់ជាតិមាតុភួមិ។ លោកឧត្តមសេនីយ៏ត្រី ឃិន ម៉េងស្រេង បានថ្លែងអំណរគុណជាអនេកជូនដល់សម្តេចអគ្គមហាសេនាបតីតេជោ ហ៊ុន សែន ដែលជានិច្ចជាកាលសម្តេចតែងយកចិត្តទុកដាក់លើ បញ្ហាសន្តិសុខជាតិ ប្រជាជន នឹងជាពិសេសលើបញ្ហាសុខភាពរបស់កងទ័ព ។ ហើយលោកក៏បានផ្តាំផ្ញើរទៅដល់មេបញ្ជាការសឹងរងក្រុងស្រុកទាំងប្រាំនៅខេត្តមណ្ឌលគិរី ត្រូវយកអាវរងាទាំងនេះទៅចែកជូនដល់នាយទាហាននាយទាហានរង គ្រប់ៗគ្នា មិនត្រូវយកទៅទុកក្នុងឃ្លាំងឲ្យហួសរដូវរងាទេ ៕
ចិន្ដា កម្ពុជាអភិវឌ្ឍន៍
