ខេត្តរតនគិរី ៖ ឈ្មួញរកស៊ីឈើខុសច្បាប់នៅតែបន្តការដឹកជញ្ជូនឈើប្រណិតប្រភេទធ្នង់ និងសុក្រំ ចេញពីស្រុកវើនសៃ ឆ្ពោះមកកាន់ក្រុងបានលុង នឹងដឹកបន្តទៅកាន់ប្រទេសវៀតណាមដោយរលូន បើទោះបីជាមានកម្លាំងសមត្ថកិច្ចនៅតាមដងផ្លូវច្រើនដូចស្និតចេកយ៉ាងណាក៏ដោយ ។ ជាក់ស្តែងឈ្មួញរកស៊ីដឹកជញ្ជូនឈើដុះស្លែមួយចំនួនដែលគេស្គាល់ឈ្មោះ ម៉េង(ធំ) រស់នៅភូមិថ្មដា សង្កាត់បឹងកន្សែង ក្រុងបានលុង បានកំពុងតែធ្វើសកម្មភាពយ៉ាងគឃ្លើន ដោយមិនញញើតនឹងសមត្ថកិច្ចឡើង ដោយធ្វើសកម្មភាពជញ្ជូនឈើពីឃុំកោះពាក្យ ឆ្លងតាមទូកផង តាមរថយន្តផង មកកាន់ត្រើយម្ខាងទន្លេឃុំការចូន ស្រុកវើនសៃ ទើបដឹកបន្តតាមរថយន្តទំនើបៗម៉ាកធុនត្រា និងតាកូមា ឆ្ពោះមកកាន់ក្រុងបានលុង បន្ទាប់មកដឹកបន្តទៅកាន់ប្រទេសវៀតណាម និងឈ្មោះនី លំនៅដ្ឋាននៅការចាញ បានដឹកចេញពីស្រុកវើនសៃមួយចំនួន និងមួយចំនួនទៀតដឹកចេញពីដែនជម្រកសត្វព្រៃ ស្រុកលំផាត់ ខេត្តរតនគិរីនិងពីស្រុកកោះញ៉ែកខេត្តមណ្ឌលគិរី ។
ប្រភពពីប្រជាពលរដ្ឋ និងមជ្ឈដ្ឋានបានខ្សិបក្សេវថា ការដែលមិនមានការបង្ក្រាបដោយសារតែក្រុមឈ្មួញមានការបង់លុយឲ្យសមត្ថកិច្ចនៅតាមដងផ្លូវ និងឈ្មួញមានអ្នកមានអំណាចនៅពីក្រោយខ្នងផងដែរ ទើបមិនមានអ្នកណាហ៊ានបង្ក្រាបនោះទេ ហើយម្យ៉ាងទៀតបើបង្ក្រាបវាអាចប៉ះពាល់ដល់ឆ្នាំងបាយរបស់ពួកគេ ។ ឈើទាំងនោះគឺមានការលួចកាប់ និងដឹកចេញពីតំបន់ឧទ្យានជាតិវីរៈជ័យ និងតំបន់ដែនជំរកសត្វព្រៃលំផាត់ ដែលជាតំបន់អភិរក្ស ហើយនៅកំពង់ទឹកដែលគេស្តុកនោះវាសឹងក្លាយជាទីផ្សារទៅហើយ ដោយសារគំនឈើជាច្រើនដាក់គរលើគ្នា ។ ចំណែកឯរថយន្តម៉ាកត្រូពិច និងសាំយ៉ុង បានកែច្នៃតដំបូលនិងទម្លាក់បាតសម្រាប់លាក់ឈើ និងរថយន្តទំនើបៗ បានធ្វើចរាចរណ៏ចេញតាមច្រកទ្វាអន្តរជាតិអូរយ៉ាដាវជារៀងរាល់ថ្ងៃជាច្រើនគ្រឿងក្នុងមួយថ្ងៃៗ ។
លោក មូល សាំវ៉ាង នាយផ្នែករដ្ឋបាលព្រៃឈើវើនសៃ បានឲ្យដឹងថាលោកមិនបានដឹងពីបញ្ហានេះទេ លោកឲ្យសួរទៅខាងសង្កាត់រដ្ឋបាលព្រៃឈើវើនសៃជាអ្នកគ្រប់គ្រងនៅទីនោះផ្ទាល់ ។
ដោយឡែក លោក កង នី នាយសង្កាត់រដ្ឋបាលព្រៃឈើស្រុកវើនសៃ បនាឲ្យដឹងតាមទូរស័ព្ទថា ករណីនេះវាកើតមានឡើងជាយូរមកហើយលោកក៏បានដឹងដែរ តែខាងលោកគ្មានកម្លាំងសម្រាប់ធ្វើការបង្ក្រាបនោះទេ ហើយអ្នកដែលរកស៊ីទាំងនោះសុទ្ធតែមានខ្នងបង្អែកធំៗនៅពីក្រោយ ។
សូមបញ្ជាក់ថា ឈើទាំងនេះគេបានដឹកយកទៅលក់បន្តនៅឯប្រទេសវៀតណាម តាមរយៈច្រករបៀងលេខ១៩ក្រោមការគ្រប់គ្រងដោយនគរបាលប៉ុស្ត៏ច្រកទ្វាអន្តរជាតិ ហើយនៅទីនេះគេបានស្តុកទុកនៅដែនសមត្ថកិច្ចរបស់នគរបាលប៉ុស្តិ៏ច្រកទ្វាអន្តរជាតិអូរយ៉ាដាវ និងសាងតាមរយៈមធ្យោបាយម៉ូតូបន្តទៅលក់នៅឯប្រទេសវៀតណាម ជាងនេះទៅទៀត គេសង្កេតឃើញមានដាក់បារ៉ាស់បំភ្លឺភ្លើងឲ្យរថយន្តបទល្មើសឆ្លងកាត់ ដោយប៉ារ៉ាស់ទី១ គឺជានគរបាលច្រកទ្វារ ទី២គយ និងទី៣ កាំកុងត្រូល ។
សូមបញ្ជាក់ថា ករណីការកាប់បំផ្លាញព្រៃឈើត្រូវបានមជ្ឈដ្ឋានធ្វើការរិះគន់មកលើរាជរដ្ឋាភិបាលកម្ពុជា ដែលធ្វើឲ្យបាត់បង់ព្រៃឈើ រហូតដល់ប្រមុខរាជរដ្ឋាភិបាល ជាពិសេស ក្រសួងមហាផ្ទៃបានជំរុញឲ្យសមត្ថកិច្ចមូលដ្ឋានត្រួតពិនិត្យ និងទប់ស្កាត់ការកាប់បំផ្លាញព្រៃឈើ តែទោះជាយ៉ាងណាក៏ដោយ ក៏នៅតែមានការឃុបខិតគ្នា ដោយលួចដឹកជញ្ជូនឈើតាមមធ្យោបាយផ្សេងៗ គ្រប់រូបភាព សមត្ថកិច្ចនៅខេត្តរតនគិរីមិនចង់អោយឈ្មួញឈើដែលមានឈ្មោះខាងលើនេះទៅណាង ឫក៏ងាប់ចោទនោះទេព្រោះឈ្មួញទាំង២នាក់នេះយកលុយទាំងបាច់ៗអោយជារៀងរាល់ខែតាមការណាត់របស់សមត្ថកិច្ច ៕
ជីវ៉ា
