(ខេត្តកំពត)៖ នៅរសៀលថ្ងៃចន្ទ ២រោច ខែ ពិសាខ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី២០ ខែឧសភា ឆ្នាំ២០១៩ លោក ជាវ តាយ ប្រធានគណៈកម្មាធិការគណបក្សខេត្ត និងជាអភិបាលខេត្តកំពត បានអញ្ជើញចូលរួមក្នុងពិធីសំណេះសំណាលជាមួយអង្គបោះឆ្នោតជ្រើសរើសក្រុមប្រឹក្សាខេត្ត ក្រុមប្រឹក្សាស្រុកដងទង់ និងស្រុកកំពង់ត្រាច អាណត្តិទី៣ នៅសាលប្រជុំទីស្នាក់ការគណបក្ស ប្រជាជនកម្ពុជាស្រុកដងទង់ ក្រោមអធិបតីភាព លោកបណ្ឌិត ប៉ែន ស៊ីម៉ន តំណាងរាស្ត្រមណ្ឌលកំពត និងជាប្រធានក្រុមការងារថ្នាក់កណ្តាលចុះជួយខេត្តកំពត ។
នៅក្នុងពិធីនេះដែរ មានការអញ្ជើញចូលរួមពី ក្រុមការងារថ្នាក់កណ្តាលទទួលស្រុក ក្រុមការងារថ្នាក់ជាតិទទួលស្រុក សមាជិកអចិន្ត្រៃយ៍គណៈបក្សខេត្តទទួលបន្ទុកស្រុក ប្រធានក្រុមការងារថ្នាក់ខេត្តទទួលឃុំ បេក្ខជនក្រុមប្រឹក្សាខេត្តពេញសិទ្ធិ និងបម្រុង បេក្ខជនក្រុមប្រឹក្សាស្រុកដងទង់ បេក្ខជនក្រុមប្រឹក្សាស្រុកកំពង់ត្រាច ពេញសិទ្ធិ និងបម្រុង គណៈអចិន្ត្រៃយ៍ស្រុក និងអង្គបោះឆ្នោតក្រុមប្រឹក្សាឃុំ ស្រុកដងទង់ និងស្រុកកំពង់ត្រាច សរុបចំនួន ៣៦០នាក់។
ថ្លែងសំណេះសំណាលក្នុងឱកាសនោះ លោកបណ្ឌិត ប៉ែន សីុម៉ន បានគូសបញ្ជាក់ថា អង្គបោះឆ្នោតទាំងពីរស្រុកត្រូវបន្តយកចិត្តទុកដាក់អនុវត្តគោលការណ៍តាមលក្ខខណ្ឌការងាររបស់បក្ស ដោយត្រូវបោះឆ្នោតជូនគណបក្សប្រជាជនកម្ពុជាតាមលំដាប់លេខរៀងក្នុងសន្លឹកឆ្នោត។
លោកបណ្ឌិតក៏បានរម្លឹកផងដែរពីផលវិបាកនៃសង្គ្រាម ដែលបានធ្វើឲ្យប្រទេសកម្ពុជាយើងស្ទើតែបាត់បង់ទាំងស្រុង នូវហេដ្ឋារចនាសម្ព័ន្ធ ទាំងអាណាចក្រ ទាំងពុទ្ធចក្រ ពិសេសប្រទេសជាតិគ្មានការអភិវឌ្ឍ គឺដោយសារតែសង្គ្រាមនេះឯង។
លោកបណ្ឌិត ប៉ែន សីុម៉ន បានបន្ថែមថា ពេលនេះប្រទេសជាតិយើងកំពុងមានសន្តិភាព និងមានការអភិវឌ្ឍ ប្រជាពលរដ្ឋរស់នៅប្រកបដោយសុខក្សេមក្សាន្តមានសុភមង្គល មានភាពរីកចម្រើន នេះគឺបានកើតចេញពីកត្តាសន្តិភាព ស្ថិរភាព។ដូច្នេះយើងទាំងអស់គ្នាត្រូវតែរួមគ្នា ថែរក្សាសន្តិភាពឲ្យបានស្ថិតស្ថេរ គង់វង្ស បើទោះជាស្ថិតក្នុងតម្លៃណាក៏ដោយ៕ សេង ណារិទ្ធ
