ខេត្តបន្ទាយមានជ័យ៖ លោក លី សារី អភិបាលរងខេត្តបន្ទាយមានជ័យចុះបើកការដ្ឋាន ជួសជុលផ្លូវមេ ចំនួន៣ខ្សែ ក្នុងសង្កាត់អូរអំបិល កាលថ្ងៃទី៣០ ខែតុលា ឆ្នាំ២០១៥ បន្ទាប់ពីរងការខូចខាត ទ្រុឌទ្រោម ពិបាកធ្វើចរាចរណ៍។
លោក ឈុំ ពេជ្រ ចៅសង្កាត់ អូរអំបិលបានលើកឡើងថា ផ្លូវដែលត្រូវបើកការដ្ឋាននេះ មានចំនួន ៣ ខ្សែប្រវែង១៥៩០ម៉ែត្រ ដោយផ្លូវចំនួន៣ ខ្សែនេះ ជាផ្លូវមេសម្រាប់ឲ្យពលរដ្ឋ ធ្វើដំណើរបានស្រួល ចរាចរ ឆ្លងកាត់ប្រើប្រាស់ ជារៀងរាល់ឆ្នាំអាជ្ញាធរតែងតែស្នើសុំថវិកាជួសជុល ដោយឡែកសម្រាប់ឆ្នាំនេះ រដ្ឋាភិបាលបានផ្តល់ថវិកា ១០៣លានរៀល និងថវិកាពលរដ្ឋ១លានរៀល។
លោក លី សារី អភិបាលរងខេត្តបន្ទាយមានជ័យ បានមានប្រសាសន៍ថា ជានិច្ចជាកាលរដ្ឋាភិបាល ដែលមានសម្ដេច ហ៊ុន សែន ជាប្រមុខតែងផ្ដោត សំខាន់លើវិស័យផ្លូវថ្នល់ក្នុងនោះមិនថា ផ្លូវជាតិនិងផ្លូវលំគ្រប់ទីកន្លែងនោះទេ ត្រូវបានស្ថាបនាពីគ្មានផ្លូវទៅជាផ្លូវ ក្រាលគ្រួសក្រហម ប្រែក្លាយទៅជាផ្លូវបេតុង ឬកៅស៊ូផ្សារភ្ជាប់ពីជនបទមកទីរួមក្រុង ស្របតាមអនុសាសន៍ទីណា មានផ្លូវទីនោះមានក្តីសង្ឃឹម ៕
