(ខេត្តកំពត)៖ នៅរសៀលថ្ងៃទី០២ ខែឧសភា ឆ្នាំ២០១៩នេះ អាជ្ញាធរឃុំបឹងសាលាខាងជើង បានបើកកិច្ចប្រជុំ ស្ថិតចំណុចសាលាដំណាក់ នៃភូមិដាសស្គរ ឃុំបឹងសាលាខាងជើង ស្រុកកំពង់ត្រាច ខេត្តកំពត ដើម្បីពិគ្រោះយោបល់ជាមួយបងប្អូនប្រជាពលរដ្ឋឲ្យចូលរួមសហការស្តាបឹងធម្មជាតិរបស់រដ្ឋ សម្រាប់យកទឹកប្រើប្រាស់ ដោយការពិគ្រោះយោបល់នេះតម្រូវឲ្យស្តាបឹងចាប់ពីប្រឡាយនៃព្រំប្រទល់រវាងឃុំបឹងសាលាខាងជើង និងឃុំអង្គសុរភី។ចំណែកបឹងឈូក ដែលជាជ្រលងផ្លូវទឹក មិនទាន់មានគោលការណ៍ឲ្យស្តារនោះទេ ទើបការពិគ្រោះយោបល់ក្នុងរសៀលនេះមិនទាន់បានផលវិជ្ជមាន។
ជាលទ្ធផលក្នុងអង្គប្រជុំ គឺប្រជាពលរដ្ឋមួយផ្នែកយល់ស្របឲ្យស្តាបឹង ឯអ្នកខ្លះបានបដិសេធមិនយល់ព្រមនៅឡើយ ដោយពួកគាត់លើកឡើងថា បើស្តាបឹងត្រូវតែស្តាទាំងអស់ គឺស្តាចាប់ពីចំណុចបឹងឈូកដែលជាជ្រលងផ្លូវទឹកមកមុនទើបអាចទៅរួច…ស្តាបានប្រយោជន៍អី្វ មុខទឹកមិនស្តា ទៅស្តាបឹងផ្នែកខាងក្រោយ ចុះបើភ្លៀងមកទឹកជន់គ្មានផ្លូវបណ្តោះទឹកចេញតែដដែលហ្នឹង…!!។
ចំពោះគម្រោងស្តាបឹងនេះពួកគាត់មានចិត្តរីករាយណាស់ ឲ្យតែអនុវត្តទៅតាមជំនាញ បច្ចេកទេស ពោលគឺត្រូវតែស្តាបឹងធម្មជាតិទាំងអស់ ដាច់ខាតមិនត្រូវទុកចំណុចបឹងឈូកដែលគេកំពុងទន្ទ្រានចង់បានបែបនេះទេ។
ជាមួយគ្នានេះ មជ្ឈដ្ឋានជាច្រើនហាក់មានភាពស្រពិចស្រពិល ខណៈគោលការណ៍ស្តារបឹងធម្មជាតិនេះ ស្តារតែទីតាំងខាងក្នុង ដោយមិនអនុវត្តចាប់ពីចំណុចក្តៅមុន ពិសេសចំណុចបឹងឈូកដែលកំពុងមានភាពចម្រូងចម្រាស់ដ៏ពុះកញ្ជ្រោលនោះ។
ឆ្លើយតបនឹងរឿងរ៉ាវស្តាបឹងឈូកដើម្បីយកទឹកប្រើប្រាស់នេះដែរ លោក ស្រី អាន់ មេឃុំបឹងសាលាខាងជើង បានលើកឡើងថា ការស្តាបឹងគឺតម្រូវឲ្យស្តាត្រឹមតែព្រំប្រទល់នៃដែនសមត្ថកិច្ចរបស់លោកគ្រប់គ្រងប៉ុណ្ណោះ។ ដោយឡែកចំពោះចំណុចបឹងឈូករបស់រដ្ឋដែលកំពុងមានបញ្ហាចម្រូងចម្រាស់ ស្ថិតក្នុងភូមិសាស្ត្រឃុំអង្គសុរភី គឺលោកគ្មានសិទ្ធិសម្រេចនោះឡើយ។
ដូច្នេះការពិគ្រោះយោបល់រឿងស្តាបឹងខាងលើចាត់ទុកជារឿងអត់បានប្រយោជន៍ ព្រោះគម្រោងនេះហាក់ដូចជាមានអាថិកំបាំង ពោលគឺប្រៀបបានទៅនឹងពាក្យថាចាប់ត្រីឆ្លូញ ព្រលែងត្រីរ៉ស់៕ សេង ណារិទ្ធ
