ខេត្តមណ្ឌលគិរី ៖ មន្ត្រីនគរបាលប៉ុស្តិ៍ម្នាក់និងអភិបាលរងស្រុកកែវសីមាម្នាក់ បានបើករថយន្តពីរគ្រឿងប្រមាញ់ម៉ូតូបានកញ្ចាស់មួយគ្រឿង ដឹកឈើប្រណិតពីរ-បីដុំគ្រាន់ចិញ្ចឹមអាត្មា បណ្តាលឲ្យដួលច្រងាប់ច្រងិល កាលពីវេលាម៉ោង១២យប់រំលងអធ្រាត ឈានចូលថ្ងៃទី១៦ តុលា ២០១៥ នៅតាមបណ្តោយផ្លូវជាតិលេខ៧៦ ។
ហេតុការណ៏នេះបានកើតឡើងនៅចំនុចជិតមុខមូលដ្ឋានកងរាជអាវុធហត្ថស្រុក ស្ថិតនៅភូមិអូរអាម ឃុំស្រែខ្ទុម ស្រុកកែវសីមា។
ប្រភពព័ត៌មានបានឲ្យដឹងថា មុនពេលកើតហេតុគេឃើញម៉ូតូដឹកឈើខាងលើ បានដឹកឈើចេញពីព្រៃតាមផ្លូវជាតិ៧៦ ឆ្ពោះទៅផ្សារកែវសីមា លុះនៅពេលមកដល់មុខអធិការនគរបាលស្រុក ក៏ស្រាប់តែមានរថយន្តពីរគ្រឿង ម៉ាកហាយឡិនឌ័រ នឹងម៉ាកកាមរីបាឡែនបានបើកប្រដេញម៉ូតូដឹកឈើខាងលើប្រមាណជាង៣០០ម៉ែត្រ ក៏ស្រាប់តែម៉ូតូដឹកឈើនោះដួលទៅខាងស្តាំដៃ ។ ភ្លាមៗនោះ គេឃើញម្ចាស់ម៉ូតូបានរត់គេចខ្លួនបាត់ ដោយមិនដឹងថា មានរបួសឬអត់ទេ។
ចំណែកលោក សាន គីមអៀត អភិបាលរងស្រុក អ្នកយកព័ត៌មានមិនអាចសុំការបំភ្លឺបានទេ នៅរសៀលថ្ងៃទី១៦ តុលា ២០១៥ ។
លោកនាយប៉ុស្តិ៍រដ្ឋបាលស្រែខ្ទុមបានមានឲ្យដឹងថា មន្ត្រីប៉ូលិសឈ្មោះ សាវឿន ពិតជាកូនចៅរបស់លោកមែន… តែគាត់មិនបានបញ្ជា ឬអនុញ្ញាតឲ្យបុគ្គលរូបនោះ ដើរធ្វើព្យុះធ្វើភ្លៀងឡើយ ។ លោកបន្តថា មន្ត្រីរូបនេះតែងធ្វើអ្វីខុសបទបញ្ជាពីថ្នាក់លើ ហើយរហូតមកដល់ពេលនេះករណីខាងលើលោកនៅមិនទាន់ទទួលព័ត៌មាននៅឡើយ ៕
ដោយ ៖ ចិន្តា
