(ខេត្តកំពត)៖ នៅព្រឹកថ្ងៃទី១៣ ខែមីនា ឆ្នាំ២០១៩ លោក ជាវ តាយ អភិបាលនៃគណៈអភិបាលខេត្តកំពត ដឹកនាំមន្ទីរ-អង្គភាពជំនាញពាក់ព័ន្ធជុំវិញខេត្តកំពត អភិបាលក្រុង ស្រុក ទទួលស្វាគមន៍គណៈប្រតិភូគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃព្រឹទ្ធសភា(គណៈកម្មការទី២)ដែលដឹកនាំដោយលោក ជា ជេដ្ឋ ប្រធានគណៈកម្មការ។
ក្នុងឱកាសនោះ លោក ជាវ តាយ អភិបាលខេត្ត បានរាយការណ៍ជូនគណ:ប្រតិភូ អំពីសភាពការណ៍រួមទូទៅ និងវឌ្ឍនភាពរីកចម្រើនព្រមទាំងលទ្ធផលការងារសំខាន់ៗ ដែលរដ្ឋបាលខេត្តកំពតសម្រេចបានកន្លងមក និងផែនការទិសដៅអនុវត្តបន្តនូវកម្មវិធីនយោបាយយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាល ព្រមទាំងបញ្ហាប្រឈមនិងសំណូមពរនានា ដែលរដ្ឋបាលខេត្តកំពតបានជួបប្រទះកន្លងមកនិងកំពុងបានខិតខំជម្រុញការអភិវឌ្ឍន៍ជាប្រចាំផងដែរ។ ជាមួយឱកាសនោះដែរ លោក ជាវ តាយ អភិបាលខេត្តនិងថ្នាក់ដឹកនាំមន្ទីរអង្គភាពពាក់ព័ន្ធក៏បានរាយការណ៍អម្អិតឲ្យដឹងផងដែរអំពីលទ្ធផលនិងសមិទ្ធផលសំខាន់ៗពាក់ព័ន្ធលើវិស័យមួយចំនួនរួមមានការងារអភិវឌ្ឍនូវហេដ្ឋារចនាសម្ព័ន្ធ ការងារសេដ្ឋកិច្ច ហិរញ្ញវត្ថុ ការងារពន្ធដារ ការងាររតនាគារ ការងារសវនកម្មនិងការផ្ដល់សេវាសាធារណៈក្នុងដែនសមត្ថកិច្ចរដ្ឋបាលថ្នាក់ក្រោមជាតិជូនគណៈប្រតិភូឲ្យបានដឹងផងដែរ។
លោក ជា ជេដ្ឋ ប្រធានគណៈកម្មការទី២នៃព្រឹដ្ឋសភា ក៏បាន កោតសរសើរវាយតម្លៃខ្ពស់ចំពោះលទ្ធផលការងារដែលរដ្ឋបាលខេត្តកំពតក៏ដូចជាមន្ទីរអង្គភាពជំនាញ បានរួមគ្នាខិតខំជំនះរាល់ការលំបាកនិងបញ្ហាប្រឈមនានាក្នុងដំណើរការជម្រុញល្បឿននៃកិច្ចអភិវឌ្ឃន៍ខេត្តមានការរីកច្រើនគួរជាទីមោទនៈនាប៉ុន្មានឆ្នាំចុងក្រោយនេះ។ លោក ក៏បានសំណូមពរផ្ដាំផ្ញើដល់ថ្នាក់ដឹកនាំខេត្តកំពតគ្រប់លំដាបថ្នាក់បន្តខិតខំចូលរួមជំរុញកិច្ចអភិវឌ្ឍន៍បន្ថែមទៀតពិសេសការចូលរួមជំរុញ ការងារប្រតិបត្តិច្បាប់ឲ្យបានកាន់តែប្រសើរឡើងថែមទៀត៕
សេង ណារិទ្ធ
